މިއަހަރުގެ މިހާތަނަށް ޕީޖީ އޮފީހުން އެންމެ ގިނަ މައްސަލަ ނިންމީ މާރޗް މަހު
12 އެޕްރީލު 2022 | އަންގާރަ 14:07މާރޗް މަހު 149 މައްސަލައެއް ވަނީ ބަލައި ނިންމާފައި
ޕީޖީ ހުސައިން ޝަމީމް ނޫސްވެރިންގެ ބައްދަލުވުމެއްގައި ވާހަކަ ދައްކަވަނީ
މިއަހަރުގެ މިހާތަނަށް ޕްރޮސެކިއުޓަރ ޖެނެރަލް އޮފީހުން އެންމެ ގިނަ މައްސަލަ ނިންމާފައިވަނީ މިދިޔަ މާރޗް މަހުގައި ކަމަށް އެ އޮފީހުން ހާމަކޮށްފިއެވެ.
ޕީޖީ އޮފީހުން އާންމުކޮށްފައިވާ އެ އޮފީހުގެ މާރޗް މަހުގެ ތަފާސްހިސާބުތައް ދައްކާގޮތުން މާރވް މަހު އެ އޮފީހުން ވަނީ 149 މައްސަލައެއް ބަލައި ނިންމާފައެވެ. މީގެ ތެރެއިން 113 މައްސަލައެއް ސާބިތުވެފައިވެއެވެ. ސާބިތުނުވާ 31 މައްސަލަ ހިމެނެއެވެ. މަދަނީ މިންގަނޑުން ދައުވާ ބާތިލުކުރެވިފައިވާ 5 މައްސަލައެއް ހިމެނޭކަމަށް ޕީޖީ އޮފީހުން ހާމަކޮށްފައިވެއެވެ.
ޕީޖީ އޮފީހުން ބުނީ މާރޗް މަހު ދައުވާކުރުމަށް އެދި އެ އޮފީހުގެ ޑިއުޓީ ޕްރޮސެކިއުޝަންއަށް 244 މައްސަލައެއް ހުށަހަޅާފައިވާކަމަށެވެ. މީގެ ތެރޭގައި އެންމެ ގިނައީ މަސްތުވާތަކެތި ބޭނުންކުރުމުގެ މައްސަލަތަކެވެ. މި ބާވަތުގެ 62 މައްސަލައެއް ހިމެނެއެވެ. އެހެނިހެން 56 މައްސަލައެއް ހުށަހަޅާފައިވާއިރު، މަސްތުވާތަކެތި ޓްރެފިކް ކުރުމުގެ 51 މައްސަލައެއް ހުށަހަޅާފައިވެއެވެ. ވައްކަމުގެ މައްސަލަތަކުގެ ގޮތުގައި 27 މައްސަލައެއް ހުށަހަޅާފައިވާކަމަށް ޕީޖީ އޮފީހުން ބުނެފައިވެއެވެ. ކުޑަކުދިންނާއެކު ބަދުއަޚުލާގީ އަމަލު ހިންގި ކަމުގެ 15 މައްސަލައެއް ހުށަހަޅާފައިވާއިރު، މާރާމާރީ ހިންގުމުގެ 12 މައްސަލައެއް، މަކަރާއި ހީލަތުގެ 11 މައްސަލައެއްގެ އިތުރުން ބަނގުރަލުގެ 10 މައްސަލައެއް ހުށަހަޅާފައިވާކަމަށް ޕީޖީ އޮފީހުން ބުނެފައިވެއެވެ.
މާރޗް މަހު އެންމެ ގިނަ ދައުވާތައް ހުށަހެޅިފައިވަނީ ކްރިމިނަލް ކޯޓަށެވެ. ކްރިމިނަލް ކޯޓަށް 69 މައްސަލައެއް ހުށަހަޅާފައިވާއިރު، އެހެނިހެން ކޯޓުތަކަށް 52 މައްސަލައެއް އަދި ޑްރަގް ކޯޓަށް 47 މައްސަލައެއް ހުށަހަޅާފައިވެއެވެ. މާފުށި މެޖިސްޓްރޭޓް ކޯޓަށް 15 މައްސަލައެއް ހުށަހަޅާފައިވާއިރު، ހުޅުމާލެ މެޖިސްޓްރޭޓް ކޯޓަށް 12 މައްސަލައެއް، މާމިގިލީ މެޖިސްޓްރޭޓް ކޯޓަށް 7 މައްސަލަ، ތިމަރަފުށި މެޖިސްޓްރޭޓް ކޯޓަށް 7 މައްސަލަ އަދި ފުވައްމުލަކު މެޖިސްޓްރޭޓް ކޯޓަށް 5 މައްސަލަ ހުށަހަޅާފައިވާކަމަށް ޕީޖީ އޮފީހުން ބުނެފައިވެއެވެ.
މަރޗް މަހު 214 މައްސަލައެއް ދައުވާކުރުމަށް ކޯޓުތަކަށް ހުށަހަޅާފައިވެއެވެ. އޭގެ ތެރޭގައި ހިމެނެނީ މަސްތުވާތަކެއްޗާ ގުޅުންހުރި 52 މައްސަލައަކާއި، މުދަލާއި ގުޅުންހުރި 54 މައްސަލައެއް، އެހެނިހެން 32 މައްސަލަ، އެނގިހުރެ ހުއްދަ ނޫން ތަނަކަށް ވަނުމުގެ 26 މައްސަލަ، ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގާ ކުރުމުގެ 11 މައްސަލައަކާއި، އަނިޔާއާ ގުޅުންހުރި 9 މައްސަލަ ކަމަށް ޕީޖީ އޮފީހުން ބުނެފައިވެއެވެ. މި މައްސަލަތަކުގައި ޖުމްލަ 168 މީހަކަށް ދައުވާ ލިބޭކަމަށް ޕީޖީ އޮފީހުން ބުނެއެވެ.
މި މައްސަލަތަކުގެ ތެރޭގައި އަލަށް ދައުވާކުރެވުނު 101 މައްސަލައެއް ހިމެނެއެވެ. އެނޫން 113 މައްސަލައެއް ހިމެނެއެވެ.
