އިދިކޮޅުން ހުށައަޅާ މައްސަލަތައް މަޖިލީހުން ބަލައި ނުގަތުމުގެ ކަންބޮޑުވުން އިދިކޮޅު ކޯލިޝަނުން ފައުޅުކޮށްފި
12 އެޕްރީލު 2022 | އަންގާރަ 14:28އޮޑިޓް ރިޕޯޓުގައި ހުރީ ގޮސް މައުލޫމާތުތަކެއް ނޫން
އިދިކޮޅު ކޯލިޝަނުން މަޖިލީހުގެ އިދާރާގައި ބޭއްވި ނޫސްވެރިންގެ ބައްދަލުވުމުގެ ތެރެއިން
ރައްޔިތުންނާ ގުޅުން ހުރި ކަންކަމުގެ ކަންބޮޑުވުމާއެކު ރައްޔިތުންގެ މަޖިލީހަށް ހުށައަޅާ މައްސަލަތައް މަޖިލީހުން ބޭރުކުރުމަކީ ކަންބޮޑުވާ ކަމެއް ކަމަށް އިދިކޮޅު ކޯލިޝަނުން ބުނެފިއެވެ.
އެ ކޯލިޝަނުން، ރައްޔިތުންގެ މަޖިލީހުގެ އިދާރާގައި ބޭއްވި ނޫސްވެރިންގެ ބައްދަލުވުމުގައި މަޑުއްވަރީ ދާއިރާގެ މެމްބަރު އާދަމް ޝަރީފް ވިދާޅުވީ، ޕްރޮގްރެސިވް ކޯލިޝަނުން މިހަފްތާގައި ހުށައެޅި ރައްޔިތުންނާ ގުޅުން ހުރި ދެ މައްސަލަވެސް މަޖިލީހުން ބޭރުކޮށްލާފައިވާ ކަމަށާއި، މި ދެ މައްސަލައަކީވެސް ރައްޔިތުންނާ ގުޅުންހުރި ދެ މައްސަލަ ކަމަށެވެ. އެމްޑީޕީގެ ސުޕަރ މެޖޯރިޓީ ބޭނުންކޮށް އެ އަޑުތައް ފަނޑުކޮށްލުމަށް މަސައްކަތް ކުރަނީ ކަމަށް އާދަމް ޝަރީފް ތުހުމަތު ކުރެއްވިއެވެ.
އާދަމް ޝަރީފް މިގޮތަށް ތުހުމަތު ކުރައްވާފައިވާއިރު މަޖިލީހަށް އިދިކޮޅުން ހުށައަޅާ ބައެއް ކުއްލި މައްސަލަތައް އަންނަނީ ބަލައިގަނެ ތަޅުމުގައި ބަހުސްކުރަމުންނެވެ.
ހޯމަ ދުވަހުގެ ޖަލްސާއަށް ފަރެސް މާތޮޑާ ދާއިރާގެ މެމްބަރު ޙުސައިން މުޙައްމަދު ލަޠީފް ހުށައެޅުއްވި މައްސަލައަކީ، ދެކުނަށް މަސްވެރިކަން ރަނގަޅުވެ މަސް ގަންނަ އަދަދު ކޮންޓްރޯލް ކޮށްފައި އޮތް އޮތުން ނިމުމަކަށް ގެނައުމަށް ގޮވާލާ ހުށައެޅި ކުއްލި މައްސަލައެކެވެ.
އަންގާރަ ދުވަހުގެ ޖަލްސާއަށް މަޑުއްވަރީ ދާއިރާގެ މެމްބަރު އާދަމް ޝަރީފް ވަނީ ހިޔާ ފްލެޓްގެ ފިނިޝިންގ މަސައްކަތަށް ބައެއް ކުންފުނިތަކުން ފައިސާ ނަގައި އެމަސައްކަތް ނިންމާފައި ނުވާތީއާއި ރައްޔިތުންގެ ފައިސާއަށް އެ ކުންފުނި ތަކުން ޚިޔާނާތްތެރިވެފައިވާތީ އެކަން ސަރުކާރުގެ ސަމާލުކަމަށް ގެނައުމަށް ގޮވާލާ ކުއްލި މައްސަލައެއް ހުށައަޅުއްވާފައެވެ.
މި ދެ މައްސަލަ ބޭރުކޮށްލުމަކީ ކަންބޮޑުވާ ކަމެއް ކަމަށާއި، ބައެއް ކުންފުނިތަކުން ފައިސާ ނަގައި އެމަސައްކަތް ނިންމާފައި ނުވާތީ އެކަމުން 70ށްވުރެ ގިނަ އާއިލާއަށް ގެއްލުން ލިބެމުން އަންނަ ކަމަށާއި، މަސައްކަތް ކުރާނެ ކަމަށްބުނެ ބައެއް ކުންފުނިތަކުން 6 މިލިއަނަށްވުރެ ގިނަ ރުފިޔާއަށް ޚިޔާނާތްތެރިވެފައިވަ ކަމަށް އާދަމް ޝަރީފް ވިދާޅުވިއެވެ.
ހިޔާ ފްލެޓްގެ ކުއްޔާ ބެހޭގޮތުން ވާހަކަފުޅުދައްކަވަމުން ވިދާޅުވީ، ޕީޕީއެމް ސަރުކާރެެއްގައި އަގު ކުޑަކޮށްދެއްވާނެ ކަމަށެވެ. އަދި ސަރުކާރުން ކުލި ކުޑަ ނުކުރަނީ ރިޔާސީ އިންތިޚާބާ ދިމާކޮށް ކުލި ކުޑަކުރުމަށް ކަމަށްވެސް ވިދާޅުވިއެވެ. އެހެންނަމަވެސް އިދިކޮޅުން މަސައްކަތްކުރަނީ އޭގެ ކުރިން އެކަން ކުރުމަށް ބާރު އެޅުމަށް ކަމަށް އާދަމް ޝަރީފް ވިދާޅުވިއެވެ. ހިޔާ ފްލެޓްގެ ކުލި ކުޑަކުރުމަށް އެދި އެތަނުގައި ދިރިއުޅޭ މީހުން އެދެމުންދާއިރު އެ އަޑު ކަނޑުވާލުމަށް އެޗްޑީސީން އިސްވެ އޮވެ، ސަރުކާރުން މަސައްކަތް ކުރަމުން އަންނަ ކަމަށް އާދަމް ޝަރީފް ވަނީ ތުހުމަތު ކުރައްވާފައެވެ. އޭނާ ވިދާޅުވީ، ގާނޫނު އަސާސީން ޚިޔާލު ފާޅުކުރުމުގެ މިނިވަންކަން ލިބިދީފައިވާއިރު، ކުލި ކުޑަކުރުމަށާއި، ބޮޑު ކުއްޔެއް ނުދެއްކުމަށް ބުނަމުންދާ މީހުންނަށް ފިޔަވަޅު އަޅާނެ ކަމަށް ނުބުނެވޭނެ ކަމަށެވެ.
ހިޔާ ފްލެޓަށް މަހުން މަހަށް ދައްކަންޖެހޭ ފައިސާއާ ގުޅޭ ގޮތުން ހަދާފައިވާ އޮޑިޓުންވެސް ދައްކާގޮތައި، އެތަނަށް މިހާރު ކަނޑައަޅާފައިވާ އަގަކީވެސް މެނޭޖް ކުރެވޭ އަގެއް ނޫނެވެ. ހޯމަދުވަހު މާލިއްޔަތު ކޮމިޓީގައި އޮޑިޓަރ ޖެނެރަލް ހުސައިން ނިޔާޒީ ވިދާޅުވީ، އެޗްޑީސީން އެތަނުގެ އަގުގެ ގޮތުގައި މަހުން މަހަށް ދައްކަން ޖެހޭކަމަށް ކަނޑައަޅާފައިވާ 11،000 ރުފިޔާ އަކީ ވިޔަފާރީގެ ގޮތުން ބަލާއިރު ސަަސްޓެއިނަބްލް އަގެއް ކަމަށެވެ. އޮޑިޓަރ ޖެނެރަލް ވިދާޅުވި ފްލެޓްގެ އަގު 8،500އަށް ކުޑަކޮށްފައި ވުމުގެ ސަބަބުން 138 މިލިއަނުގެ ކޭޝް ފްލޯ ޑެފިސިޓެއް މުޅި މަޝްރޫޢުގެ މުއްދަތުގައި ކުރިމަތިވާނެކަމަށެވެ. އަދި ކުލީގެ ޢަދަދު 6،600 ރުފިޔާއަށްކުޑަކޮށްފި ނަމަ، 9.2 ބިލިއަން ރުފިޔާގެ ޑެފިސިޓެއް ކުރިމަތިވާނެކަމަށް އޮޑިޓަރ ޖެނެރަލް ވިދާޅުވިއެވެ.
މިކަންކަން މިއީ ގޯސް މައުުލޫމާތެއް ކަމަށް ގަބޫލް ކުރައްވަނީތޯ ރާއްޖެއެމްވީ ދެންނެވި ސުވާލުގެ ޖަވާބުގައި އާދަމް ޝަރީފް ވިދާޅުވީ، އޮޑިޓް ރިޕޯޓުގައި ހުރީ ގޮސް މައުލޫމާތުތަކެއް ނޫން ކަމަށެވެ.
