ރަމަޟާން ކްރިކެޓު ކާނިވަލުގެ އޯޕަން ޓޭޕްބޯލް މުބާރާތުގެ ސެމީފައިނަލުން މޯލްޑިވްސް އެއާޕޯރޓްސް ކޮމްޕެނީ (އެމްއޭސީއެލް) ޖާގަ ހޯދައިފިއެވެ. އެމްއޭސީއެލް ސެމީގެ ޖާގަ ހޯދީ ގްރޫޕް ސްޓޭޖްގައި ކުޅުނު ތިން މެޗުވެސް ކާމިޔާބުކޮށްގެންނެވެ. އެމްއޭސީއެލް އޮތީ ގްރޫޕް ސީގައެވެ.

އެމްއޭސީއެލްގެ ތިންވަނަ މެޗުގައި ހޯމަ ދުވަހު ކުރި ހޯދީ ކިންޒާ ކެފޭ އާއި ވާދަކޮށް 6 ވިކެޓުންނެވެ. ކިންޒާ ކެފޭ ފުރަތަމަ ކުޅެން އަރާ 8 އޯވަރުގެ ތެރޭގައި 5 ކުޅުންތެރިން ނުބައިވެގެން ހެދުނީ 60 ލަނދެވެ. އެމްއޭސީއެލްއިން ވަނީ 2.5 އޯވަރުގެ ތެރޭގައި އެންމެ ކުޅުންތެރިއަކު ނުބައިވެގެން 66 ލަނޑު ހަދާ މެޗު ކާމިޔާބުކޮށްފައެވެ. މިމެޗުގެ ކުރިން އެމްއޭސީއެލްއިން ވަނީ ލަވަލިއާ އާއި, ގަލޮޅު ކަންމަތި ބަލިކޮށްފައެވެ.

މިގްރޫޕްގައި ހޯމަ ދުވަހު ލަވަލިއާ އާއި ވާދަކޮށް ކުރި ހޯދީ ގަލޮޅު ކަންމައްޗެވެ. އެއީ 60 ލަނޑުންނެވެ. ގަލޮޅު ކަންމަތިން ވަނީ 8 އޯވަރުގެ ތެރޭގައި 10 ކުޅުންތެރިން ނުބައިވެގެން 155 ލަނޑު ހަދާފައެވެ. ލަވަލިއާއަށް 8 އޯވަރުގެ ތެރޭގައި 3 ކުޅުންތެރިން ނުބައިވިއިރު ހެދުނީ 95 ލަނޑެވެ.