ފިޝަރީޒް މިނިސްޓަރު މަޖިލީހަށް ހާޒިރުކުރެވުނީ އިދާރީ އޮޅުމަކުން
ދިއްދޫ ދާއިރާގެ މެމްބަރުގެ ސުވާލަކީ ލިޔުމުން ޖަވާބު ހޯދުމަށް އެދި ފޮނުއްވާފައިވާ ސުވާލެއް
މުހައްމަދު ނަޝީދު- ރައްޔިތުންގެ މަޖިލީހުގެ ރައީސް
ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާއަށް ފިޝަރީޒް މިނިސްޓަރު ޑރ. ހުސައިން ރަޝީދު ހަސަން ހާޒިރުކުރައްވާ ތަޅުމުގައި ސުވާލުކުރެއްވުނީ އިދާރީ އޮޅުމަކުންކަމަށް ރިޔާސަތުން ވިދާޅުވެއްޖެއެވެ.
ރިޔާސަތުގައި އިންނެވި މަޖިލީހުގެ ރައީސް މުހައްމަދު ނަޝީދު މިހެން ވިދާޅުވީ، މިނިސްޓަރާއި ތަޅުމުގައި ގިނަ ސުވާލުތަކެއް ކުރައްވާފައިވަނިކޮށް މަރަދޫ ދާއިރާގެ މެމްބަރު އިބްރާހިމް ޝަރީފް ނިޒާމީ ނުކުތާ ނަންގަވައި، ވަޒީރާއި ސުވާލުކުރެއްވުމަށް އޮތީ ލިޔުމުންކަމަށް ދެންނެވުމުންނެވެ. ޝަރީފްގެ ނިޒާމީ ނުކުތާ ބަލައިގަންނަވާ ރައީސް ނަޝީދު ވަނީ މިނިސްޓަރު މަޖިލީހަށް ހާޒިރުކުރެއްވުނީ އިދާރީ އޮޅުމަކުން ކަމަށް ވިދާޅުވެފައެވެ. އަދި އެހާ ހިސާބުން ސުވާލުކުރުން ނިމުނީ ކަމަށް އިއުލާންކުރައްވާ ރައީސް ނަޝީދު ވިދާޅުވީ، ކަން ހިނގާ ދިޔައީ ކަން ހިނގައިގެންވާނެ ގޮތަކަށް ނޫންކަމަށެވެ. އަދި ލިޔުމުން ޖަވާބު ހޯދުމަށް އެދިފައިވާ ސުވާލަކަށް މިނިސްޓަރު ތަޅުމަށް ހާޒިރު ކުރެއްވުނީތީ މައާފަށް އެދިވަޑައިގަންނަވާ ކަމަށް ވިދާޅުވިއެވެ.
ފިޝަރީޒް މިނިސްޓަރު ޖަލްސާއަށް ހާޒިރުވެވަޑައިގެންފައިވަނީ ސައުދީ ފަންޑުގެ އެހީގައި ހއ. ދިއްދޫގައި 25 ޓަނުގެ އައިސް ޕްލާންޓެއް ގާއިމުކުރުމުގެ މަސައްކަތް އިއުލާނުކޮށް އެ މަސައްކަތް ކުރިއަށްނުދާތީ އެކަން ސާފުކުރަން ދިއްދޫ ދާއިރާގެ މެމްބަރު އަބްދުﷲ ވަހީދު ކުރައްވާ ސުވާލަށް ޖަވާބު ދެއްވުމަށެވެ.
މި ސުވާލަކީ މެމްބަރު ލިޔުމުން ޖަވާބު ހޯދުމަށް އެދި ފޮނުއްވާފައިވާ ސުވާލެކެވެ.
މި ސުވާލަށް ޖަވާބު ދެއްވުމަށްފަހު އިތުރު މެމްބަރުން ކުރެއްވި ސުވާލުތަކަށްވެސް މިނިސްޓަރު ވަނީ ޖަވާބު ދެއްވާފައެވެ.
