މިދައުރުގެ ތެރޭގައި 200 ދޯނީގައި މަސްފިނިކުރާ ނިޒާމު ޤާއިމްކުރެވޭނެ - މިނިސްޓަރު
ދިވެހި ކުންފުނިތަކެއް އިންޓަރނޭޝަނަލް ބިޑިންގެ ތެރެއަށް ވެއްދުމަށް ވަނީ ނިންމާފައި
މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޑޮކްޓަރ ޙުސައިން ރަޝީދު ޙަސަން އާއި ސުވާލުކުރެއްވުން
މި ދައުރުގެ ތެރޭގައި 200 ދޯނީގައި މަސް ފިނިކުރެވޭނެ ނިޒާމް ގާއިމްކޮށް، ޚިދުމަތް ދޭން ފެށޭނެކަމަށް މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޑރ. ޙުސައިން ރަޝީދު ޙަސަން ވިދާޅުވެއްޖެއެވެ.
މިނިސްޓަރު މިހެން ވިދާޅުވީ ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި މެމްބަރުން ދެންނެވި ސުވާލުތަކަށް ޖަވާބުދެއްވަމުންނެވެ.
މިނިސްޓަރު ވިދާޅުވީ، ސަރުކާރުން މަސައްކަތްކުރަނީ ދޯނިފަހަރުގައި ރެފްރިޖެރޭޓެޑް ސީވޯޓާރ ސިސްޓަމް ބޭނުންކޮށްގެން މަސް ފިނިކުރުމުގެ ނިޒާމް ޤާއިމްކުރުމަށްކަމަށެވެ. އެ މަސައްކަތްކުރުމަށް ހަމަޖެހިފައިވަނީ ދިވެހި ދައުލަތުގެ ބަޖެޓުން ޚަރަދުކޮށްގެންނާއި، އިސްލާމިކް ޑިވެލޮޕްމަންޓް ބޭންކުގެ އެހީއާއި ސައުދީ ފަންޑުގެ އެހީގައިކަމަށް މިނިސްޓަރު ވިދާޅުވިއެވެ. މި ޚިދުމަތް ފެށުމަށް ކުރިން ބިޑުކުރެވުނުކަމަށާއި، ނަމަވެސް ހުށައެޅިފައިވާ ބިޑުތަކަކީ އެކަށީގެންވާ ބިޑުތަކަކަށް ނުވާތީ ބިޑްތައް ބާތިލުވެފައިވާކަމަށް މިނިސްޓަރު ވިދާޅުވިއެވެ.
އެހެންކަމުން މިހާރު ނިންމާފައިވަނީ ދިވެހި ކުންފުނިތަކެއް އިންޓަރނޭޝަނަލް ބިޑިންގެ ތެރެއަށް ވެއްދުމަށްކަމަށާއި، އެ މަޝްރޫއު ފަށާނީ އެ ކުންފުނިތަކަށް އެސްއެމްއީ ލޯން ދީގެންކަންވެސް މިނިސްޓަރު ފާހަގަކުރެއްވިއެވެ. އޭރުން މި ޚިދުމަތް ފެށުމަށް ފަސޭހަވެގެންދާނެކަމަށް މިނިސްޓަރު ވިދާޅުވިއެވެ.
ލޮނު ފެނުން މަސް ފިނިކުރާ ނިޒާމް ޤާއިމުކުރުމަށް މިއަހަރުގެ ތެރޭގައި 59 މިލިއަން ރުފިޔާގެ ލުއި ލޯނު ސަރުކާރުން ދޫކުރައްވާނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް ވަނީ މިއަހަރުގެ ރިޔާސީ ބަޔާނުގައި ވިދާޅުވެފައެވެ.
