ނޭކުރެންދޫގައި އައު އިންޖީނެއް ބަހައްޓައި ޚިދުމަތް ދޭން ފަށައިފި
ނޭކުރެންދޫއަށް ގެންގޮސްފައިވަނީ 400 ކިލޯވޮޓުގެ އިންޖީނެއް
ނޭކުރަންދޫއަށް ގެންދިޔަ އިންޖީނު
ހދ. ނޭކުރެންދޫގައި 400 ކިލޯވޮޓުގެ އައު އިންޖީނެއް ބަހައްޓައި މިއަދު ޚިދުމަތް ދޭން ފަށައިފިއެވެ.
ޚިދުމަތް ދޭން ފެށި ޖަނަރޭޓަރު ނޭކުރެންދޫއަށް ގެންގޮސްފައިވަނީ މިދިޔަ ފެބްރުއަރީ މަހު 10 ވަނަ ދުވަހުއެވެ. ފެނަކައިން މައުލޫމާތުދިން ގޮތުގައި ޖަނަރޭޓަރު ބެހެއްޓުމަށް ގިނަ ދުވަސްތަކެއް ވެގެން ދިޔައީ އިންޖީނުގޭގައި އިންޖީނު ވެއްދުމަށް ކަނޑާފައި ހުރި ޖާގަ ކުޑަވުމުން އެތަން ބޮޑުކުރަން ޖެހުމާއި، ކުރިން އިންޖީނު ބަހައްޓަން ހަދާފައި ހުރި ބެޑު ބޮޑުކުރަން ޖެހުމުންނާއި ޖަނަރޭޓަރު ބަހައްޓަން އިތުރު މަސައްކަތްތަކެއް ކުރަން ޖެހުމުންނެވެ.
ނޭކުރަންދޫގައި ސަރުކާރުން ރައްޔިތުންނަށް ކަރަންޓުގެ ޚިދުމަތް ފޯރުކޮށްދޭން ފަށާފައިވަނީ 2011 ވަނަ އަހަރުއެވެ. އޭގެ ކުރިން ނޭކުރެންދޫގައި އެންމެ ފުރަތަމަ ކަރަންޓުގެ ޚިދުމަތް ފޯރުކޮށްދޭން ފަށާފައިވަނީ މީގެ 37 އަހަރު ކުރިން 1985 އަހަރު އަމިއްލަ ފަރާތަކުންނެވެ. އޭގެ 16 އަހަރު ފަހުން 2001 ވަނަ އަހަރު ރައްޔިތުންގެ ނަމުގައި ވަނީ ކަރަންޓުގެ ޚިދުމަތް ދޭން ފަށާފައެވެ.
އެންމެ ފަހުން ނޭކުރެންދޫއަށް އައު ޖަނަރޭޓަރެއް ގެންގޮސްފައިވަނީ 2015 ވަނަ އަހަރުއެވެ. އެފަހަރު ގެންގޮސްފައިވަނީ 200 ކިލޯވޮޓްގެ ޖަނަރޭޓަރެކެވެ.
