އޭއެފްސީކަޕް މެޗަށް ވެލެންސިޔާއަށް ނުފުރޭކަން ޔަޤީން!

އޭއެފްސީކަޕްގެ ޕްރިލިމިނަރީ ދެވަނަ ބުރުގައި ބަންގްލަދޭޝްގެ ޑާކާ އަބަހާނީއާއި ދެކޮޅަށް ކުޅޭ މެޗަށް ވެލެންސިޔާއަށް ނުފުރޭނެކަން ޔަޤީންވެއްޖެއެވެ. އަންނަ އަންގާރަ ދުވަހު ބަނގްލަދޭޝްގައި ކުލޭ މެޗަށް ފުރަން އެންމެ ފަހުން ވެލެންސިޔާއިން މަސައްކަތްކުރީ މިއަދުއެވެ. އެކަމަކު ފައިސާގެ ތާށިކަމުގެ ސަބަބުން ފުރެން ނެތްކަން ކުޅުންތެރިންނަށް މިހާރު ވަނި އަންގާފައެވެ.

ވެލެންސިޔާގެ ހެޑްކޯޗު އަހުމަދު މުޖުތަބާ (ފެސްކޯ) ބުނީ މައްސަލައަކީ ފައިސާކަމަށާއި, ޓިކެޓް ހަމަޖެހުނަސް އެހެން ޚަރަދުތައް ކުރެވެން ނެތްކަން މެނޭޖްމަންޓުން އަންގާފައިވާކަމަށެވެ.

ވެލެންސިޔާ ވަނީ ޕްރިލިމިނަރީ ބުރުގެ ފުރަތަމަ މެޗުން ބޫޓާންގެ ޕަރޯ އެފްސީ އަތުން މާލޭގައި މޮޅުވެފައެވެ. އެމެޗުން ވެލެންސިޔާ މޮޅުވީ ނަތީޖާ ނެރުމަށް ކުޅުނު 15 މިނިޓްގެ ދެހާފް ތެރޭގައި ލަނޑު ޖަހައިގެން 2-1 ނެވެ. ފުރިހަމަ ވަގުތު ހަމަވީ 1-1 ނެވެ. ވެލެންސިޔާގެ ކޯޗު ފެސްކޯ ބުނީ ވެލެންސިޔާއަށް މޮޅުވެވޭނެވަރުގެ މެޗެއް މިގޮތަށް ނުކުޅެ ދޫކޮށްލަން ޖެހުމަކީ ދެރަކަމެއްކަމަށާއި, އެކަމަކު މިވަގުތު މެޗަށް ދެވެން ނެތްކަމަށެވެ.

ކުޅުންތެރިންނަށް މުސާރަ ނުދެވި ޕްރެކްޓިސް ހުއްޓާލަން ޖެހޭ ހިސާބަށް ކްލަބްގެ ހާލަތު ދިޔަކަމަށްވެސް މީގެކުރިން ބައެއް މީޑިޔާތަކުން ވަނީ ރިޕޯރޓްކޮށްފައެވެ. އަދި ފަހުން ޕްރެކްޓިސް ފެށީ ދިވެހި ކުޅުންތެރިންނަށް ދޭންޖެހޭ މުސާރައިގެ ބައެއް ދީގެންނެވެ. ޕަރޯ އެފްސީ މެޗަށް ތައްޔާރުވިއިރުވެސް ކޯޗު ބުނެފައިވަނީ މުހިއްމު ބައެއް ކުޅުންތެރިން ނުކުޅޭނެކަމަށެވެ. އޭގެ ތެރޭގައި ބިދޭސީ ކުޅުންތެރިން ހިމެނެއެވެ. އެނގިފައިވާގޮތުގައި އެއީވެސް މުސާރައިގެ މައްސަލައިގައެވެ. އެކަމަކު ނިންމުން ބަދަލުކޮށް މެޗުގައި ބިދޭސީ ކުޅުންތެރިންވެސް ކުޅުނެވެ. ވެލެންސިޔާގެ އެއްވަނަ ކީޕަރު މުޙައްމަދު ފައިސަލްވެސް ޓީމާ ދުރުގައި ހުރީ މުސާރަ ނުދޭތީއެވެ.

ވެލެންސިޔާގެ އިތުރުން އެހެން ކްލަބްތަކުގައިވެސް މުސާރައިގެ މައްސަލަ ބޮޑެވެ. އެހެން ބައެއް ކްލަބްތަކަށްވެސް މުސާރަ ނުދެވުމުގެ މައްސަލަ ބޮޑުވެ, ޕްރެކްޓިސް އެކަށީގެންވާ ގޮތެއްގައި ނުގެންދެވެއެވެ. މުސާރައިގެ މައްސަލަ ދިމާނުވެ އޮތީ މާޒިޔާއެވެ.

ވެލެންސިޔާއިން މެޗަށް ނުދިއުމުން އެމެޗު ޑާކާ އަބަހާނީއަށް ލިބޭނެކަމަށް ބެލެވެއެވެ. ގްރޫޕް ސްޓޭޖްގެ ފަހު ޖާގައަށް އޭރުން ވާދަކުރާނީ ޑާކާ އަބަހާނީއާއި އިންޑިޔާގެ އޭޓީކޭ މޯހަން ބަގާން ނުވަތަ ބްލޫ ސްޓާއާއެވެ.