42 ކިލޯ ޑްރަގް: ހައްޔަރުކުރި ނަޝީދަކީ އުމުރަށް ޖަލަށްލާފައި ހުއްޓައި ޕެރޯލްގެ ދަށުން ދޫކޮށްލި މީހެއް
މި އޮޕަރޭޝަންގައި މާލޭގެ ދެ ގެއަކާއި އަމިއްލަ އޮފީހެއް ބަލައި ފާސްކޮށްފައިވޭ
42 ކިލޯގެ މަސްތުވާތަކެތީގެ މައްސަލައިގައި ހިމެނޭ 2 މީހުން
މާލެ ސިޓީ ގެއެއްގެ ތަޅުންގަނޑު ދަށުގައި ހުރި 42 ކިލޯގެ މަސްތުވާތަކެތީގެ މައްސަލައިގައި ހިމެނޭ އެއް ފަރާތަކީ އުމުރަށް ޖަލަށްލާފައި ހުއްޓައި ޕެރޯލްގެ ދަށުން ދޫކޮށްލާފައި ހުރި މީހެއްކަމަށް ފުލުހުން ބުނެފިއެވެ.
މާރޗް 24 އަދި 25 ވަނަ ދުވަހު ހިންގި މި އޮޕަރޭޝަންގައި ހައްޔަރުކޮށްފައިވަނީ ކ. މާލެ، ދަފްތަރު ނަންބަރު ރސ 3840، އުމުރުން 39 އަހަރުގެ އަޙްމަދު ޙުސައިން އާއި ކ. މާލެ، މ. ނޫރުއް، އުމުރުން 46 އަހަރުގެ ޢަބްދުﷲ ނަޝީދު އެވެ.
ފުލުހުން ބުނީ އެމީހުން ހައްޔަރުކުރި އޮޕަރޭޝަންގައި މާލޭގެ ދެ ގެއަކާއި އަމިއްލަ އޮފީހެއް ބަލައި ފާސްކޮށްފައިވާކަމަށެވެ.
އެމީހުންގެ ބަންދާމެދު ގޮތެއް ނިންމުމަށް ފުރަތަމަ ކޯޓަށް ހާޒިރުކުރުމުން ޢަބްދުﷲ ނަޝީދުގެ ބަންދަށް 15 ދުވަސް އަދި އަޙްމަދު ޙުސައިންގެ ބަންދަށް 10 ދުވަސް ދީފައިވެއެވެ.
އޭގެ ފަހުން ހޮނިހިރު ދުވަހު މި މައްސަލައިގައި ހައްޔަރުކުރި ޢަބްދުﷲ ނަޝީދުގެ ބަންދާމެދު ގޮތެއް ނިންމުމުގެ އަޑުއެހުން ކުރިއަށް ގެންގޮސްފައިވާއިރު، އޭނާ އިތުރު 15 ދުވަހަށް ބަންދުކުރުމަށް ކްރިމިނަލް ކޯޓުންވަނީ އަމުރުކޮށްފައެވެ. އޭނާގެ ބަންދުގެ މުއްދަތު ހަމަވާނީ 24 އޭޕްރީލް 2022 ގައެވެ.
ފުލުހުން ބުނެފައިވާ ގޮތުގައި އޭނާގެ އަތުން ގިނަ އަދަދެއްގެ ފައިސާ ފެނިފައިވެއެވެ. އަދި އޭނާ މަސައްކަތް ކުރާ އޮފީހުން މައްސަލައާއި ގުޅުން ހުރި ލިޔުންތައް ފެނިފައިވާއިރު، ސީންއަށް ދިޔަ ފުލުހުންގެ ބަޔާނާއި، ހެކިވެރިއެއްގެ ބަޔާނާއި، އިންޓަލިޖެންސް ރިޕޯޓާއި، ކޯލް ޗާޓުގެ އިތުރުންވެސް އޭނާގެ އެކައުންޓް ސްޓޭޓްމަންޓްތަކަށް ބަލާއިރު، މި މައްސަލައާއި ގުޅިގެން އޭނާގެ މައްޗަށް ތުހުމަތުކުރެވޭ މިންވަރަށް ހެކި ހުރިކަމަށް ބުރަވެވޭކަން ވަނީ ފާހަގަކޮށްފައެވެ.
އޭނާއަކީ މީގެ ކުރިން މަސްތުވާތަކެތީގެ މައްސަލައެއް ސާބިތުވެ، އުމުރަށް ޖަލަށްލާފައިވާ މީހެއްކަމަށް އައިއޯގެ ފަރާތުން ފާހަގަކޮށްފައިވެއެވެ. އޭނާއަކީ ޕެރޯލްގެ ދަށުން ޝަރުތުކޮށް، ދޫކޮށްލާފައިވާ މީހެއްކަމަށް މީގެ ކުރިން ބޭއްވި ބަންދު އަޑުއެހުމުގައި ފުލުހުންގެ ފަރާތުން ބުނެފައިވެއެވެ.
މިމައްސަލައިގައި ހައްޔަރުކުރި އަހުމަދު ހުސައިނަކީ ޕީއެންސީގެ ކައުންސިލް މެމްބަރެކެވެ. މިމައްސަލަ ފެންމަތިވުމުން ޕީއެންސީން ވަނީ އޭނާ ކައުންސިލް މެމްބަރުކަމުން ވަކިކޮށް ޕާޓީގެ އެއްވެސް ހަރަކާތެއްގައި ބައިވެރިނުވެވޭގޮތަށް ސަސްޕެންޑްކޮށްފައެވެ.
މި މައްސަލަ ފުލުހުންގެ ޑްރަގް އެންފޯސްމަންޓް ޑިޕާޓްމަންޓުން ދަނީ އިތުރަށް ތަހުގީގު ކުރަމުންނެވެ.
