މަޚްލޫފު ވަގުތުން ދޫކޮށްލަން އދ. އިން ގޮވާލައިފި

ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު އަޙުމަދު މަޚްލޫފް ވަގުތުން މިނިވަން ކުރަން ޖެހޭ ކަމަށް އދ. ގެ ވަރކިން ގްރޫޕް އޮން އާބިޓްރަރީ ޑިޓެންޝަން އިން ދިވެހި ސަރުކާރަށް ގޮވާލައިފިއެވެ.

މަޚްލޫފު ޖަލަށްލި މައްސަލަ އދ. ގެ ވަރކިން ގްރޫޕަށް ހުށަހަޅާފައި ވަނީ މިދިޔަ އަހަރުގެ އޯގަސްޓް މަހުއެވެ.

މަޚްލޫފު ދޫކޮށްލުމުގެ އިތުރުން ބައިނަލްއަގުވާމީ ގާނޫނުތަކުގެ ދަށުން މަޚްލޫފަށް ލިބިފައިވާ ގެއްލުމުގެ ބަދަލު ނަގައިިދިނުމަށްވެސް އދ. ވަރކިން ގްރޫޕުން ވަނީ ގޮވާލާފައެވެ.

ފުލުހުންގެ ދައުރު އަދާކުރަން ދަތިކުރުމުގެ ދައުވާ މަޚްލޫފްގެ މައްޗަށް ސާބިތުކޮށް އޭނާގެ މައްޗަށް ފުރަތަމަ އިއްވީ 6 މަސްދުވަހުގެ ޖަލުކުކުމެކެވެ .މަޚްލޫފްގެ މައްޗަށް އިއްވި ހަ މަސް ދުވަހުގެ ޖަލު ހުކުމް މިދިޔަ ޖެނުއަރީ މަހުގެ 17 ވަނަ ދުވަހު ވަނީ ތަންފީޒުކޮށް ނިމިފައެވެ. އަދި މި މައްސަލަ މަޚްލޫފްގެ ފަރާތުން އިސްތިއުނާފަށް ހުށައެޅުމުން މައްސަލައިގެ އިސްތިއުނާފް އަޑުއެހުންތައް ފަށާފައިވަނީ 6 މަސް ދުވަހުގެ ޖަލު ހުކުމް ތަންފީޒްކޮށް ނިމުނުތާ 4 މަސް ވީފަހުންނެވެ. އަދި އިސްތިއުނާފްގެ އަޑުއެހުންތައް ނިންމާ އަންނަ ބުރާސްފަތި ދުވަހު ހުކުމް ކުރާނެއެވެ.

މަޚްލޫފް މިހާރު ތަންފީޒް ކުރައްވަމުން އެ ގެންދަވަނީ، ފުލުހުންގެ ދައުރު އަދާކުރަން ދަތިކުރުމުގެ އެހެން މައްސަލައެއްގައި އޭނާގެ މައްޗަށް އިއްވާފައިވާ 4 މަހާއި 24 ދުވަހުގެ ޖަލު ހުކުމެވެ. އެ ޖަލުހުކުމްވެސް އަންނަ ހުކުރު ދުވަހާއި ހަމައަށް ތަންފީޒުކޮށް ނިމޭނެއެވެ. އަދި ޖޫން މަހުގެ 9 ވަނަ ދުވަހު މަޚްލޫފް މިނިވަން ވާނެއެވެ.