ރާއްޖޭގެ ދެކުނުގައި މަސްވެރިކަން ރަނގަޅުވެފައިވާއިރު މަސް ކިރުމުގައި ދިމާވެފައިވާ ދަތިތަކަށް ހައްލު ގެނައުމަށް މަސްގަތުމަށް ވަގުތީ ގޮތުން ބޭރުގެ ބޯޓެއް ހޯދުމުގެ މަސައްކަތް މިފްކޯއިން ކުރަމުންދާކަމަށް ފިޝަރީޒް މިނިސްޓަރ ޑރ ހުސައިން ރަޝީދު ހަސަން ވިދާޅުވެއްޖެއެވެ.

ދެކުނުގެ މަސްވެރިކަން ރަނގަޅުވެފައިވުމާއެކު ދެކުނަށް މަސްކިރާ ގޮތާއި މަސްވެރިންގެ އަޑުއެހުމަށް ގއ ކޫއްޑޫއަށް ދަތުރުކުރެއްވުމަށްފަހު އާންމު ކުރެއްވި މެސެޖެއްގައި މިނިސްޓަރ ވިދާޅުވީ މަސްވެރިން ކިރަން ގެންނަ މަހުގެ މިންވަރު 24 ގަޑިއިރުގެ ތެރޭގައި މަސް ގަނެ ފިނިކުރެވޭނެ ކެޕޭސިޓީއަށްވުރެ ބޮޑުތަނުން އިތުރުވަމުންދާތީ ކޮންމެ ދޯންޏަކުން މަސްކިރާ ފަހަރަކު މަސް ގަންނަ މިންވަރު ލިމިޓްކުރަން ޖެހިފައިވާތީ މަސްވެރިންނަށް މަސް ނުކުރި ކިޔޫގައި މަޑުކުރަން ޖެހިފައިވާކަމުގެ ހައްގު ޝަކުވާ ކުރަމުންދާކަމަށެވެ. މިކަން މިހެން އޮތްނަމަވެސް މާންދޫ އާއި ކޫއްޑޫ އަދި ހުޅުމީދޫއިން އަންނަނީ ކިޔު ތަރުތީބުން މަސްގަނެ ދޯނިތައް ހުސްކުރަމުންކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ މަސްވެރިން ބާނައިގެން ގެންނަ ހުރިހާ މަހެއް އެއްބުރުން ނުގަނެވޭ މައްސަލަ އަށް ދާއިމީ ހައްލެއް ލިބޭނީ މަސް ފުރީޒުކުރާ ކެޕޭސިޓީ ދެކުނުގައި މިހާރު ހުރިވަރަށްވުރެ އިތުރުކޮށްގެންކަމަށެވެ. ވަގުތީ ގޮތުން މިކަން ހައްލުކުރުމަށް މަސްގަނެ ފުރީޒުކުރާ ބޮޑުއުޅަނދެއް ފެލިވަރުން މިހާރު ކޫއްޑޫއަށް ގެނެސްފައިވާކަމަށް މިނިސްޓަރ ވިދާޅުވިއެވެ. މީގެއިތުރުން މިނިސްޓަރ ވިދާޅުވީ މަސްގަނެ ފިނިކޮށް ސްޓޯރ ކުރެވޭވަރު އިތުރުކުރުމަށް މަސްގަންނަ ބާޖެއް މާންދޫގައި އަންނަނީ ބޭނުންކުރަމުންކަމަށެވެ.

މިހާރު މާންދޫ ގައި 120 ޓަނު، ކޫއްޑޫ ގައި 240 ޓަނު، ޖަޒީރާ ގައި 120 ޓަނު، މަހާކަލަމިންޖާ ގައި 75 ޓަނު، އަދި ހުޅުމީދޫގައި 60 ޓަނުގެ ފުރީޒިންގ ކެޕޭސިޓީ އާއެކު ޖުމްލަ 615 މެޓްރިކް ޓަނު ބޭނުންކޮށްގެން މަސްގަނެވޭނެ އެންމެ ގިނަ އަދަދަކަށް އެތަންތަނުން މަސް ގަންނަމުންދާކަމަށް މިނިސްޓަރ ވިދާޅުވިއެވެ.

ދާދިފަހުން ރާއްޖެޓީވީގެ ފަލަސުރުޚީގެ ޕްރޮގްރާމްގައި ވާހަކަދައްކަވަމުން މިފްކޯގެ ސީއީއޯ އިސްމާއިލް ފައުޒީ ވިދާޅުވީ ކެޕޭސިޓީ އިތުރުނުކޮށް މަސްވެރިންނާއެކު ކުރިޔަށް ނުދެވޭނެކަމަށެވެ. އަދި މިހާރު ކުރިޔަށްދާ މަސްކާރު ޚާނާތަކުގެ މަސައްކަތް ނިމުމުން މިފްކޯގެ ފްރީޒިންގ ކެޕޭސިޓީ 1000 ޓަނާއި ހަމައަށް އަދި ސްޓޯރޭޖް ކެޕޭސިޓީ 13،000 ޓަނާ ހަމައަށް އިތުރުވެގެންދާނެކަމަށް ފައުޒީ ވިދާޅުވިއެވެ. މިދިޔަ އަހަރު މިފްކޯއިން ވަނީ 58،000 ޓަނުގެ މަސް ގަނެފައިކަމަށް ފައުޒީ ވިދާޅުވިއެވެ.

މަސް ކިރާ އަދަދު އިތުރުވެ، ދޯންޏަކުން ފަސް ޓަނު މަސް ގަންނަ ގޮތަށް މިފްކޯއިން މިހާރު ވަނީ ހަމަޖައްސާފައެވެ. އެއާއެކު މަސްވެރިން ގެންދަނީ އެކަމުގެ ކަންބޮޑުވުން ފާޅުކުރަމުންނެވެ.