ބާސެލޯނާގެ ޒުވާން ތަރި އޮސްމާނޭ ޑެމްބެލޭ އާއި ކްލަބުގެ ބައްދަލުވުމަށްފަހު ދެފަރާތުން އެކުގައި ކުރިއަށް ދާން ބޭނުންވާ ކަމުގެ ކުލަވަރުތައް ފެންނަން ފަށައިފިއެވެ.
މީގެ ކުރިން ފެނުނު މަންޒަރުތަކަށް ބަލާނަމަ ކުރިއަށް އޮތް ސަމަރ ޓްރާންސްފަރ މާކެޓުގައި ބާސެލޯނާ ދޫކޮށް ޑެމްބެލޭ އެހެން ކްލަބަކަށް ދިއުން ވަރަށް ގާތެވެ. ޑެމްބެލޭއާއެކު ބާސެލޯނާއިން ހަދާފައިވާ އެއްބަސްވުމުގެ މުއްދަތު އޭރަށް ހަމަވާއިރު، ފްރީ ޓްރާންސްފާއެއްގައި އެހެން ކްލަބަކަށް ބަދަލުވުމުގެ ފުރުސަތު ޑެމްބެލޭއަށް އެބައޮތެވެ.
މީގެ ކުރިން ބާސެލޯނާއިން ވަނީ ކޮންޓްރެކްޓް އައު ކުރުމަށް ހުށަހަޅާފައެވެ. ނަމަވެސް އެކަމަށް ޑެމްބެލޭ އެއްބަސް ނުވީ އޭނާގެ އުންމީދުތަކާއި އެއްވަރަށް މުސާރަ ބޮޑުނުވުމުންނެވެ. ކްލަބުގެ މާލީ ހާލަތު އޮތް ގޮތުން އޭނާގެ މުސާރަ ބޮޑު ކުރެވެން ނެތީއެވެ.
އެއަށްފަހު ޑެމްބެލޭ އާއި ކްލަބުގެ މެދުގައި އޮތް ގުޅުން ވަރަށް ބޮޑަށް ހީނަރުވެގެން ދިޔައެވެ. ނަމަވެސް އަލުން މަޝްވަރާތައް ކުރަން ފަށާފައި ވާއިރު، މިކަމުގެ އެންމެ ބޮޑު މެދުވެރިއަކަށްވީ ޓީމުގެ ކޯޗު ޒަވީ ހެނާންޑޭޒްއެވެ. ޒަވީ ޓީމާއި ހަވާލުވި ހިސާބުން ޑެމްބެލޭއަށް ތައުރީފުކޮށް ކުޅުމުގައި އޭނާގެ ދައުރު ބޮޑުކުރިއެވެ. އަދި އޭނާ ޓީމުގައި ހިފެހެއްޓުމަށް ކްލަބުގެ މެނޭޖުމަންޓް އާއިވެސް ޒަވީ މަޝްވަރާ ކުރިއެވެ.
މި ބައްދަލުވުމުގެ ސަބަބުން ދެފަރާތުގެ ގުޅުމުގައި އޮތް ހީނަރުކަން ފިލާފައި ވާއިރު، ދެފަރާތުން މަޝްވަރާތައް ކުރުމަށްފަހު އެކުގައި ކުރިއަށް ދާން ބޭނުންވާކަމަށް ރިޕޯޓްތައް ބުނެއެވެ. އެގޮތުން ކުރިއަށް އޮތް ދެތިން ހަފްތާގެ ތެރޭގައި އިތުރު މަޝްވަރާތައް ފަށާނެއެވެ.
ބާސެލޯނާއިން ޑެމްބެލޭ ހިފެހެއްޓުމަށް ބޮޑު ސަމާލުކަމެއް ދެނީ އޭނާގެ ކުޅުން ބޮޑުތަނުން ރަނގަޅުވެފައި ވާތީއެވެ. ޑެމްބެލޭ ކްލަބު ދޫކޮށްލައިފިނަމަ އެފަދަ ކުޅުންތެރިއަކު ހޯދުމަށް ކްލަބުން ކުރަން ޖެހޭ ޚަރަދު މާ ބޮޑުވާނެއެވެ. ޑެމްބެލޭ ހޯދުމަށް ފްރާންސްގެ ޕީއެސްޖީ އާއި ޕްރިމިއަރ ލީގުގެ ބައެއް ކްލަބުތަކުންވެސް ޝައުގުވެރިކަން ފާޅުކޮށްފައިވެއެވެ.
