އިހްޔާ ފޯރަމްގައި ބައިވެރިވެގެން ބޮޑެތި އިނާމުތަކެއް
ރަމަޟާންމަހުގެ އެންމެ ފަހު އިހްޔާ ފޯރަމްގައި މާލެއާއި އަތޮޅުތެރޭގައި ބާއްވާ ޖަލްސާތަކުގައި ދޫކުރާ ހުރިހާ ނަންބަރުތައް ގުރުއަތުގައި ހިމަނާނެ
އިހްޔާ ފޯރަމްގެ ތެރެއިން
އިހްޔާ ފޯރަމްތަކުގައި ދޫކުރާ ނަންބަރުތައް ފޮރުވާފައި ބެހެއްޓުމަށް މިނިސްޓަރ އޮފް އޮސްލާމިކް އެފެއަރޒް ޑރ. އަހުމަދު ޒާހިރު އަލީ ވިދާޅުވެއްޖެއެވެ.
މިނިސްޓަރ މިހެން ވިދާޅުވީ އިހްޔާ ފޯރަމް ފެށުމުގެގޮތުން ވާހަކަފުޅު ދައްކަވަމުންނެވެ.
މިނިސްޓަރ ވިދާޅުވީ މާލެއާއި އަތޮޅުތަކުގައި އިހްޔާ ފޯރަމްތައް ކުރިއަށްދާއިރު, ކޮންމެ ރެއަކު ގުރުއަތުން ހޮވޭ ފަރާތްތަކަށް އިނާމު ދެވޭނެކަމަށާއި, ކޮންމެ ރެއަކުވެސް ދޫކުރާ ނަންބަރުކޮޅުތައް ފޮރުވާފައި ބޭއްވުން ވަރަށް މުހިއްމުކަމަށެވެ.
މިނިސްޓަރ ވިދާޅުވީ ރަމަޟާންމަހުގެ އެންމެ ފަހު އިހްޔާ ފޯރަމްގައި މާލެއާއި އަތޮޅުތެރޭގައި ބާއްވާ ޖަލްސާތަކުގައި ދޫކުރާ ހުރިހާ ނަންބަރުތައް ގުރުއަތުގައި ހިމަނާނެކަމަށެވެ. އަދި ގުރުއަތުން ހޮވާނީ މާލެއާއި އަތޮޅުތަކުގެ ނަންބަރުތައް ވަކިންކަމަށާއި, މި ގުރުއަތުގައި އަތޮޅުތެރެއާއި މާލެ ވަކިން 1ވަނަ، 2ވަނަ، އަދި 3 ހޮވަން ހަމަޖެހިފައިވާއިރު އަގުބޮޑެތި އިނާމުތަކެއް ލިބޭނެކަމަށެވެ. މިނިސްޓަރ ވިދާޅުވީ މާލެއާއި އަތޮޅުތައް ވަކިން ގުރުއަތުލާ ގޮތަށް ނިންމީ ގިނަ ބަޔަކަށް އިނާމު ލިބުމުގެ ފުރުސަތު ދިނުމަށްޓަކައި ކަމަށެވެ.
ކޮންމެ ރެއަކުވެސް ހޮވޭ ފަރާތްތަކަށް އިނާމު ހަވާލުކުރާއިރު, އޭގެ ތެރޭގައި ފައިސާގެ އިނާމާއި މިނިސްޓްރީން ދޭ އިނާމުވެސް ހިމެނެއެވެ.
މިއަހަރު ރަމަޟާން މަހު މާލޭގައި އިތުރުން އަތޮޅުތަކުގައިވެސް އިހުޔާ ފޯރަމް އަންނަނީ ބާއްވަމުންނެވެ. މި އަހަރުގެ އިހްޔާ ފޯރަމްތައް ކުރިއަށްދާނީ ކޮންމެ ހުކުރު ދުވަހެއްގެ ރޭ އަތޮޅުތަކަށް ޚާއްސަކޮށްގެންނެވެ. އެގޮތުން ހުކުރު ދުވަހުގެ ރޭ ކުޅުދުއްފުށި ސިޓީގައި އިހްޔާ ފޯރަމް ބާއްވާއިރު 15 އޭޕްރީލްގައި އައްޑޫ ސިޓީގައި، 22 އޭޕްރީލްގައި ފުވައްމުލަކު ސިޓީގައި، އަދި 29 އޭޕްރީލްގައި ރ. އުނގޫފާރުގައި މި ފޯރަމް ކުރިއަށް ގެންދާނެއެވެ.
އާދިއްތަ އަދި ބުރާސްފަތި ދުވަހު އިހްޔާ ފޯރަމްތައް ކުރިއަށްދާނީ މާލެ ސިޓީގެ އިސްލާމީ މަރުކަޒުގައެވެ.
މިއީ ރަމަޟާން މަހުގެ ރޭތައް އިހްޔާކުރުމުގެ ޖަލްސާތައް ބާއްވަންފެށިފަހުން، ސިޓީތަކުގައި މިފަދަ ޖަލްސާތައް ބާއްވާ ފުރަތަމަ ފަހަރެވެ.
