ކެއުން ބުއިމުގައި ޚަރަދު ކުޑަކޮށް އިގްތިސާދު ކުރުމަށް މަސައްކަތް ކުރޭ: ޚުތުބާ
އިސްރާފު ނުކުރުމަށް މާތް ﷲ އަމުރު ކުރައްވާފައިވޭ
ނަމާދަށްފަހު ދީނީ ނަސޭހަތް ދިނުން
ކެއުމާއި، ބުއިމާއި، ޚަރަދުކުރުމުގައި އިގްތިސާދު ކުރުމަށް ގަދައަޅާ މަސައްކަތްކުރުމަށް ހުކުރު ޚުތުބާގައި ނަސޭހަތްތެރިވެއްޖެއެެވެ.
"އިސްރާފުކުރުމުގެ ނުބައިކަން" މި މައުޟޫއަށް ރާއްޖޭގެ އެކި ކަންކޮޅުތަކުގައި އިއްވި ޚުތުބާގައި ވަނީ އިންސާނުންނަށް މިއަދު ކުރިމަތިވެފައިވާ އިޖްތިމާއީ އަދި އިގްތިސާދީ ބަލިމަޑުކަމުގެ ތެރޭގައި އިސްރާފުކުރުންވާކަމަށް ބުނެފައެވެ. ތަނަވަސްކަމާއި މުއްސަނދިކަން އިންސާނުންގެ ތެރެއިން ބަޔަކަށް ލިބިއްޖެނަމަ ޚަރަދުތައް އިތުރުވެ، ހޭދަކުރުން ގިނަވެދާނެ ކަމަށާއި، އަދި މުދާތައް ބޭކާރު ގޮތުގައި ނަގާލަން ފަށާފާނެކަމުގައެވެ.
ހުރިހާ ކަމެއްގައި އިގްތިސާދު ކުރުމަށާއި، އިސްރާފު ނުކުރުމަށް މާތް ﷲ އަމުރު ކުރައްވާފައިވާ ކަމަށާއި، ކީރީތި ރަސޫލާ މުހައްމަދު ﷺ ވެެސް މެދުމިންވަރުގައި ހިފެހެއްޓުމަށް ނަސޭހަތްތެރިވެވަޑައިގެންފައިވާކަމަށް ޚުތުބާގައި ވަނީ ބުނެފައެވެ.
ޚުތުބާގައި ބުނީ ކާބޯތަކެތި ގަނެ، ހެޔޮ ގޮތުގައި އެ ތަކެތީގެ ބޭނުން ނުކޮށް، އެ ތަކެތި ކުނީގެ ގޮތުގައި އުކާލުމަކީ އިސްރާފު ކުރުން ކަމަށެވެ. ކާބޯތަކެއްޗާއި ދަނޑުވެރިކަމާއި ގުޅޭގޮތުން އދ. އިން ހަދާފައިވާ ދިރާސާއަކުން ދައްކާގޮތުގައި ކޮންމެ އަހަރަކު 1.3 ބިލިއަން ޓަނުގެ ކާބޯތަކެތި ކުނީގެ ގޮތުގައި ދުނިޔޭގެ އެކި ކަންކޮޅުތަކުގައި އުކާލެވޭ ކަމަށް ޚުތުބާގައި ބުނެފައިވެއެވެ.
މުސްލިމުން ހޭދަކުރަމުން މިދާ ރަމަޟާން މަހަކީ އާންމުގޮތެއްގައި އިސްރާފުކުރުން ބޮޑު މަހެއް ކަމުގައި ޚުތުބާގައި ބުނެފައިވެއެވެ. ރޯދަ ވީއްލުމަށްޓަކައި ތަފާތު ބާވަތްތަކުގެ ކާބޯތަކެތި ތައްޔާރުކުރުމާއި، މީސްމީޑިއާ މެދުވެރިކޮށް މިކަމުގައި އެކަކު އަނެކަކު ވާދަކޮށް ހެދުމަކީ މިއަދުގެ ދުނިޔޭގައި މުސްލިމުންގެ އާދައެއް ކަމުގައި ޚުތުބާގައި ބުނެފައިވެއެވެ. އަދި ކެއުމަށް ތައްޔާރުކުރާ ގިނަ އެއްޗިއްސަކީ އުކާލާ އެއްޗެހި ކަމަށާއި، މިއީ ޝައިތާނީ އަމަލެއް ކަމުގައި ޚުތުބާގައި ބުނެފައިވެއެވެ.
އެހެންކަމުން ހުކުރު ޚުތުބާގައި ވަނީ ކެއުމާއި، ބުއިމާއި، ޚަރަދުކުރުމުގައި އިގްތިސާދު ކުރުމަށް ގަދައަޅާ މަސައްކަތްކުރުމަށް ނަސޭހަތްތެރިވެފައެވެ. އަދި ބޭނުންވާ ވަރަށްވުރެ އިތުރަށް ކާބޯތަކެތި ތައްޔާރުނުކުރުމަށާއި، އިތުރުވާ ތަކެތި އުކާނުލުމަށް ނަސޭހަތްތެރިވެފައިވެއެވެ.
