ކުއާޓާ ފައިނަލުގެ ފުރަތަމަ މެޗުން ބާސެލޯނާ އެއްވަރުވެއްޖެ

ޔޫރަޕާ ލީގުގެ ކުއާޓާ ފައިނަލުގެ ފުރަތަމަ މެޗުގައި ފްރެންކްފާޓާއި ބައްދަލުކުރި މެޗުން މޮޅުނުވެވި ބާސެލޯނާ އެއްވަރުވެއްޖެއެވެ.

ފްރެންކްފާޓުގެ ދަނޑުގައި ކުޅުނު މި މެޗު އެއްވަރުވީ 1-1 ންނެވެ. މެޗުގައި ފުރަތަމަ ލަނޑު ޖަހައި ލީޑު ނެގީ ފްރެންކްފާޓުންނެވެ. މި ލަނޑު އެޓީމަށް ކާމިޔާބު ކޮށްދިނީ އަންސްގަރ ނައުފްއެވެ. ފުރަތަމަ ހާފު ނިމުނީ 1-0 ން ފްރެންކްފާޓް ކުރީގައި އޮވެގެންނެވެ. މެޗުގެ 66 ވަނަ މިނެޓުގައި ބާސެލޯނާއަށް ނަތީޖާ ހަމަހަމަ ކޮށްދިނީ ފެރަން ޓޮރޭސްއެވެ. މި މެޗުގެ 78 ވަނަ މިނެޓުގައި ފްރެންކްފާޓުގެ ޓުޓާއަށް ވަނީ ރަތް ކާޑު ދައްކާފައެވެ.

ޔޫރަޕާ ލީގުގެ ކުއާޓާ ފައިނަލުގައި ބުރާސްފަތި ދުވަހުގެރޭ ދެން ކުޅުނު މެޗުތަކަށް ބަލާއިރު، ވެސްޓްހޭމް އާއި ލިޔޯން ބައްދަލުކުރި މެޗުވެސް ނިމުނީ ކޮންމެ ޓީމަކުން ލަނޑެއް ޖަހާ އެއްވަރު ވެގެންނެވެ. މެޗުގެ ދެގޯލުވެސް ފެނުނީ ދެވަނަ ހާފުގައެވެ. ޖެރޮޑް ބޯވެންގެ ލަނޑުން ވެސްޓްހޭމް ލީޑު ނަގާފައި ވަނިކޯށް ލިޔޯންއަށް ނަތީޖާ ހަމަހަމަ ކޮށްދިނީ ޓަންގޭއެވެ. ފުރަތަމަ ހާފުގެ ފަހު ވަގުތުގައި ވެސްޓްހޭމްގެ އާރޯން ކްރެސްވެލްއަށް ރަތް ކާޑު ދެއްކުމުން މެޗުގެ ދެވަނަ ހާފު އެއްކޮށް ވެސްޓްހޭމް އިން ކުޅުނީ 10 ކުޅުންތެރިންނާއެކުއެވެ.

ކުއާޓާ ފައިނަލުގައި ބްރާގާ އާއި ރޭންޖާސް ބައްދަލުކުރި މެޗު ކާމިޔާބުކުރީ ބްރާގާއިންނެވެ. މެޗުގެ ހަމައެކަނި ލަނޑު ބްރާގާއަށް ކާމިޔާބު ކޮށްދިނީ އަބޭލް ރުއިޒްއެވެ.