މާޒިޔާ ބަލިވެއްޖެ، އީގަލްސްއިން މާޒިޔާ ބަލިކޮށްފި!

ފުރަތަމަ ބުރު ސައްތައިން ސައްތަ ރެކޯޑަކާއެކު ނިންމާލި މާޒިޔާ ލީގުގެ ދެވަނަ ބުރުގެ ފުރަތަމަ މެޗުން ބަލިވެއްޖެއެވެ. ފުރަތަމަ ބުރުގައި ކުޅުނު ހަތް މެޗުވެސް ކާމިޔާބުކޮށް އެއްވަނަ ހޯދި މާޒިޔާ ދެވަނަ ބުރުގެ ފުރަތަމަ މެޗުގައި ބަލިވީ ދެވަނާގައި އޮތް އީގަލްސް އަތުންނެވެ.

އީގަލްސްއިން މާޒިޔާ ބަލިކުރީ 1-0 ނެވެ. މެޗުގެ ހަމައެކަނި ލަނޑު ފުރަތަމަ ހާފްގައި ޖެހީ މެޗުގެ މޮޅު ކުޅުންތެރިޔާ ހަސަން ރާއިފް އަހުމަދު (ހަންނަ) އެވެ. މާޒިޔާގެ ދެ ޑިފެންޑަރުންކަމަށްވާ ޝިފާޒުއާއި, ސަމޫހު ކައިރިން ހަންނަ ބޯޅަ ގޯލްގެ އިރުމަތީ ކަނަށް ފޮނުވާލީ ކީޕަރުވެސް ކުރިއަށް ނުކުތް ވަގުތުއެވެ. މުޅި މެޗުގައިވެސް މާޒިޔާއަށް އީގަލްސްގެ ޑިފެންސް ހާސްކޮށްލެވޭވަރެއް ނުވެއެވެ. މެޗު މާޒިޔާއިން ފެށީ އެޓޭކިންގ މިޑްފީލްޑަރު ޓަނާ ނުލާއެވެ. އެކަމަކު ދެވަނަ ހާފް ފެށީ އޭނާ ހިމަނައިގެންނެެވެ. ނަމަވެސް އީގަލްސްގެ ޒުވާން ކީޕަރު ހަސަން އަލީފް އިބްރާހީމް ޓެސްޓްކޮށްލެވޭ ވަރުގެ ބޯޅައެއް ފޮނުވާލެވޭވަރެއް ނުވެއެވެ.

ފުރަތަމަ ހާފްގައި މާޒިޔާއިން ފޮނުވާލި އެންމެ ރަނގަޅު ބޯޅައަކީ ޑީއޭރިޔާ މަތިން ކަހަލަ ގޮތަކަށް ހަމްޒާ މުޙައްމަދު (ހަމްޕު) ފޮނުވާލި ބާރު ބޯޅައެވެ. އެކަމަކު އެބޯޅަ ދިޔައީ ގޯލްގެ ހުޅަނގުފަރާތު ދަނޑި ކައިރިން ބޭރަށެވެ. އޭގެ ފަސް މިނިޓްފަހުން ހަސަން ނާއިޒު (ދާދު) ގޯލްއޭރިޔާގެ ހުޅަނގުފަރާތުގައި ހުރެ ފޮނުވާލި ބޯޅަވެސް ދިޔައީ ގޯލް ކުރިމަތިން ހުރަސްވެގެން ބޭރަށެވެ. ދެވަނަ ހާފްގައި ކޯނޭ ހުޅަނގުފާރުން އޭރިޔާ ތެރެއަށް ވަދެ, ޕެނަލްޓީ ސްޕޮޓާ ހިސާބުގައި ހުރި އައިސަމްއަށް ރަނގަޅު ބޯޅައެއް ދިންނަމަވެސް އެބޯޅަ އޭނާއަށް ފޮނުވާލެވޭވަރެއް ނުވިއެވެ. ދެވަނަފަހަރަށް އެބޯޅަ ކެޕްޓަން އިރުފާނަށް ލިބުމުން ފޮނުވާލި ނަމަވެސް ހުރަސް ދަނޑީގައި ޖެހިފައ ދިޔައީ ބޭރަށެވެ. މެޗު އީގަލްސްއިން ކުޅުނީ އަހުމަދު ރިޒްވާން (ރިޒޭ) ވެސް ނުލައެވެ.

މިމޮޅާއެކު އީގަލްސް ވަނީ 8 މެޗުން 19 ޕޮއިންޓް ހޯދާފައެވެ. މާޒިޔާ އެއްވަނާގައި އޮތީ 21 ޕޮއިންޓާއެކުއެވެ. މާޒިޔާ ސީޒަންގައި ފުރަތަމަ ބަލިވީ ޕްރެޒިޑެންޓްކަޕްގައި ވެލެންސިޔާ އާއި ވާދަކުރި ދެމެޗުންނެެވެ. އޭގެތެރޭގައި ފައިނަލް މެޗު ހިމެނެއެވެ. މިއީ އާކޯޗާއެކު މާޒިޔާ ބަލިވި ފުރަތަމަ މެޗެވެ. އަދި ލީގުގައި ބަލިވި ފުރަތަމަ މެޗެވެ.