އޭއެފްސީ އޭޝިއަން ކަޕް ކޮލިފައިންގައި ބޫޓާނާއި ދެކޮޅަށް ކުޅޭ މެޗަށް ތައްޔާރުވުމުގެ ގޮތުން އަފްގާނިސްތާނާއި ދެކޮޅަށް ކުޅުނު ރަހުމަތްތެރިކަމުގެ މެޗުން ރާއްޖެ ބަލިވެއްޖެއެވެ.

އެކުވެރި އަރަބި އިމާރާތުގެ ދުބާއީގައި އަންގާރަ ދުވަހުގެ ރޭ ކުޅުނު މި މެޗުން ރާއްޖެ ބަލިވީ 2-1ގެ ނަތީޖާއަކުންނެވެ. މެޗުގައި ރާއްޖޭގެ ގައުމީ ޓީމުގެ މުހިންމު ކުޅުންތެރިންތަކެއް ކުޅެފައި ނުވާއިރު، މެޗަށް ނިކުތުމުގެ ކުރީގައިވެސް ކޯޗް ޑަރެން ސްޓެވާޑް ވަނީ މެޗުގެ ނަތީޖާއަށް ނުވިސްނާނެ ކަމަށް ބުނެފައެވެ. މެޗުގެ ކުރިން ވާހަކަ ދައްކަމުން ކޯޗް ބުނެފައި ވަނީ، މެޗުގައި ބޭނުންވަނީ ނަތީޖާއަށް ބަލަން ނޫން ކަމަށާއި، މުހިންމީ ކުޅުންތެރިން ވަޒަންކުރުން ކަމަށެވެ.

އަންގާރަ ދުވަހުގެ ރޭގެ މެޗުގައި ގާއުމީ ޓީމުގެ މުހިންމު ބައެއް ކުޅުންތެރިން ކަމަށްވާ، ފޯވާޑް އަސަދުﷲ އަބްދުﷲ އާއި ޑިފެންޑަރު އަމްދާން އަލީ އަށް ފުރުސަދު ދީފައެއް ނުވެއެވެ. ވެލެވޭ ގޮތުގައި މާޒިޔާއަށް ނިސްބަތްވާ މި ދެ ކުޅުންތެރިންނަށް ފުރުސަތު ދީފައިނުވަނީ އޭއެފްސީ ކަޕުގައި ދާދި ފަހުން ކުޅެފައިވާތީ ރިކަވަރ ވާން ވަގުތު ދިނުމުގެ ގޮތުންކަމަށް ބެލެވެއެވެ. މި ދެ ކުޅުންތެރިންގެ ބަދަލުގައި ފެނިގެންދިޔައީ ފޯވާޑް ގްރީން ސްޓްރީޓްގެ އަހުމަދު ރަޝީދު އާއި އީގަލްސްގެ ޑިފެންޑަރު އަހުމަދު ޒާދުއެވެ.

އަންގާރަ ދުވަހުގެ ރޭގެ މެޗު ފަށައިގެން ދެ ޓީމުގެ ފަރާތުންވެސް ފެނިގެންގޮސްފައިވަނީ ރަނގަޅު ކުޅުމުކެވެ. މެޗުގައި ފުރަތަމަ ލަނޑުޖަހައި ލީޑު ނަގާފައިވަނީ ވެސް އަފްޣާނިސްތާނުންނެވެ. މި ލަނޑު މެޗުގެ 38 ވަނަ މިނެޓުގައި ކާމިޔާބުކޮށްދިނީ ހަސަން އަމީނެވެ. އޭނާ އެ ލަނޑު ކާމިޔާބުކޮށްފައިވަނީ، އަފްޣާނުގެ ކުޅުންތެރިއެއް ފޮނުވާލި ބޯޅައެއް ރާއްޖޭގެ ޑިފެންޑަރެއް ބްލޮކް ކުރަން އުޅުމުގެ ތެރޭގައި މުޅިން ހުސްކޮށް ހަސަން އަމީނަށް ލިބުނު ފުރުސަތަކުންނެވެ.

މި ލަނޑަށް ފަހުގައި ރާއްޖެ ޓީމުން ވަނީ ކުޅުން އިތުރަށް ވަރިގަދަ ކޮށްފައެވެ. އެގޮތުން މާ ގިނައިރުތަކެއް ނުވަނީސް ރާއްޖެއިން ވަނީ ލިބުނު ރަނުގެ ފުރުސަތެއްގެ ބޭނުން ހިފައި ނަތީޖާ ހަމަހަމަ ކޮށްފައެވެ. 41 ވަނަ މިނެޓުގައި ލިބުނު ޕެނަލްޓީއަކުން މި ލަނޑު ކާމިޔާބުކޮށްދީފައިވަނީ އަލީ ފާސިރު (ސެންޓޭ) އެވެ.

އަފްގާނިސްތާން މެޗުން މޮޅުވި ލަނޑު އެޓީމުން ކާމިޔާބުކޮށްފައި ވަނީ 62 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ އޮމިދް ޕޮޕެލްޒޭ އެވެ.

އެކުވެރިކަމުގެ މި މެޗަށް ފަހު ރާއްޖޭގެ ޓީމުން ދެން ދާނީ ބެންކޮކަށެވެ. ބެންކޮކުގައި ޓްރެއިނިން ކޭމްޕެއް ކުރިއަށް ގެންދިއުމަށްފަހު މިމަހުގެ 11 ވަނަ ދުވަހު ބޫޓާނަށް ދާނެއެވެ. ބޫޓާނާއި ދެކޮޅަށް ކުޅޭ އޭޝިއަން ކަޕް ކޮލިފައިން މެޗް އޮންނާނީ މިމަހުގެ 13 ވަނަ ދުވަހުއެވެ.

ކޮލިފައިންގައި ރާއްޖެ ކުޅުނު ފުރަތަމަ މެޗުން ފަލަސްތީން އަތުން 3-0 ގެ ނަތީޖާއަކުން ރާއްޖެ ވަނީ މާލޭގައި ބަލިވެފައެވެ. ރާއްޖެ ހިމެނޭ ގުރޫޕުގައި ދެން ކުޅުނު މެޗުން ބޫޓާން އާއި ވާދަކޮށް އޮމާން އިން ވަނީ 14-0 އިން މޮޅުވެފައެވެ. އޭޝިއަން ކަޕަށް ކޮލިފައިވާނީ ހޯމް އެންޑް އަވޭ އުސޫލުން ކުޅުމަށްފަހު ގްރޫޕުގެ އެންމެ ކުރި ހޯދާ ދެ ގައުމެވެ.