އދ. ދިއްދޫގެ ރަށްގިރުމުގެ މައްސަލައަށް ހައްލު ގެނެވޭނެ ގޮތްތަކެއް ނިންމާނަން: ރައީސް
ކޮވިޑްގެ ބަލިމަޑުކަމުގެ ތެރޭގައިވެސް ތަރައްގީގެ ކަންކަން ކުރިޔަށްގެންދަވާފައިވާތީ އެކަން ޝުކުރުވެރިކަމާއެކު ފާހަގަކުރެއްވި
ރައީސް އދ ކައުންސިލަރުންނާ ބައްދަލުކުރެއްވުން
އދ. ދިއްދޫ ރަށްގިރުމުގެ މައްސަލައިގައި ޓެކްނިކަލް ސަރވޭއެއް ހެދުމަށްފަހު, ހައްލުގެނެވޭނެ ގޮތްތައް ނިންމަވާނެކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ ދިއްދޫ ކައުންސިލާ ބައްދަލުކުރައްވައި ވާހަކަދައްކަވަމުންނެވެ. ބުރާސްފަތި ދުވަހުގެ ހެނދުނު ރައީސުލްޖުމްހޫރިއްޔާގެ އޮފީހުގައި ބޭއްވެވި މި ބައްދަލުކުރެއްވުމުގައި ކައުންސިލަރުން ވަނީ, ކޮވިޑްގެ ބަލިމަޑުކަމުގެ ތެރޭގައިވެސް ތަރައްގީގެ ކަންކަން ކުރިޔަށްގެންދަވާފައިވާތީ އެކަން ޝުކުރުވެރިކަމާއެކު ފާހަގަކުރައްވާފައެވެ.
މި ބައްދަލުކުރެއްވުމުގައި ކައުންސިލަރުން ވަނީ ރަށުގެ ތަރައްގީއަށް އެންމެ މުހިންމު ކަންކަމާއި ރައްޔިތުންގެ ހުރި ކަންބޮޑުވުންތައް ރައީސުލްޖުމްހޫރިއްޔާއާ ހިއްސާކުރައްވާފައެވެ. އެގޮތުން, އެރަށުގެ ބަނދަރު ބޭނުންކުރުމުގައި ކުރިމަތިވާ ދަތިތަކާއި, ރަށްގިރުމުގެ މައްސަލައާއި, ސިއްހީ މަރުކަޒު ތަރައްގީކޮށް ޚިދުމަތް ފުޅާކުރުމަށް ބޭނުންވާކަމާއިމ އަދި ސްކޫލާއި ކައުންސިލް އިދާރާގެ ޖާގައިގެ ދަތިކަމަށް ހައްލެއް ބޭނުންވާކަން ފާހަގަކުރައްވާފައެވެ. މީގެ އިތުރުން ރަށުގެ ޒުވާނުންނާއި އިގުތިސާދީ އަދި އިޖްތިމާއީ ތަރައްގީއަށް ބޭނުންވާ މުހިންމުކަންކަން ކައުންސިލަރުން ފާހަގަކުރެއްވިއެވެ.
ރައީސް ވިދާޅުވީ ކައުންސިލުން ބަނދަރާ ގުޅޭގޮތުން ފާހަގަކުރެއްވި ކަންކަމާ ގުޅޭގޮތުން ގޮތްތަކެއް ނިންމަވާނެކަމަށެވެ. އަދި ކައުންސިލަރުން ފާހަގަކުރެއްވި އިތުރު ކަންކަމުގައި ސަރުކާރުގެ ކަމާބެހޭ އިދާރާތަކާ މަޝްވަރާކުރައްވާނެކަމުގައި އެމަނިކުފާނު ވިދާޅުވިއެވެ. މީގެ އިތުރުން ރައީސުލްޖުމްހޫރިއްޔާ ވަނީ ވަކިރަށެއް ތަފާތުކުރުމެއްނެތި ރަށްރަށުގެ ތަރައްގީއަށް ބޭނުންވާ މުހިންމު ކަންކަން ސަރުކާރުން ކޮށްދެއްވަމުން ގެންދަވާނެކަމުގައި ވިދާޅުވެފައެވެ.
