"90 އިންސައްތަ ބައިވެރިން ވޯޓު ދިނީ އެކަކު އެލިމިނޭޓް ކުރަން"

ރާއްޖެޓީވީއިން ގެނެސްދޭ ރިއަލިޓީ ޝޯވް "ޕެޓްރޯލް އޮފިސީ ސެލެބްރިޓީ ރޭސް" ގެ ދެވަނަ ސީޒަންގެ ފުރަތަމަ އެޕިސޯޑުގެ ޓްރެއިލަރ އާންމު ކޮށްފައިވާއިރު، އެ ޓްރެއިލަރ އަށް ގިނަ ބައެއްގެ ސަމާލުކަން ދަނީ ލިބެމުންނެވެ.

ބުދަ ދުވަހުގެރޭ މި ޓްރެއިލަރ އާންމުކޮށްފައިވާއިރު، ފުރަތަމަ އެޕިސޯޑު ދެއްކުމަށް ހަމަޖެހިފައިވަނީ ބުރާސްފަތި ދުވަހުގެރޭ (މިރޭ) 11:00 ގައެވެ.

55 ސިކުންތުގެ މި ޓްރެއިލަރ މިހާރު ސޯޝަލް މީޑިއާގެ އެކި ޕްލެޓްފޯމްތަކުގައި އާންމު ކޮށްފައިވާއިރު، ޓްރެއިލަރ އިން ފެނިގެންދަނީ ފުރަތަމަ އެޕިސޯޑުގެ އެލިމިނޭޝަން ރައުންޑްގެ މަންޒަރުތަކެކެވެ. އެގޮތުން 90 އިންސައްތަ ބައިވެރިން ވޯޓު ދިނީ އެއް ބައިވެރިއަކު އެލިމިނޭޓް ކުރަންކަމަށް ޕްރޮގްރާމްގެ ހޯސްޓް އިއުލާނުކުރާ މަންޒަރު ފެނެއެވެ. ނަމަވެސް އެއީ ކާކުކަން ޓްރެއިލަރ އަކުން ނޭނގެއެވެ.

މި ޓްރެއިލަރ ގައި ދެން ފެނިގެން ދަނީ ކަނޑުމަތީގެ ޙާދިސާއެއްގެ ތެރޭގައި ބައިވެރިން އުޅޭ މަންޒަރެވެ. ކޮންމެވެސް ކަމެއް ދިމާވެގެން ބައިވެރިން ލައިފް ޖެކެޓުގައި ކަނޑަށް ފުންމާލާ މަންޒަރުވެސް ފެނިގެންދެއެވެ. އޭރު ބައިވެރިން ތިބި ދޯނީގެ ތެރެއިން ހަޅޭކުގެ އަޑުވެސް އިވިގެންދެއެވެ.

އެމްއެންޑީއެފްގެ ޑޯނިއަރ ހެލިކޮޕްޓަރު އެ ޙާދިސާ ހިނގައިގެން އުޅޭ ތަނަށް ދާ މަންޒަރުވެސް ޓްރެއިލަރ އިން ފެނެއެވެ. ހަމައެއާއެކު، މި މުބާރަތް ކުރިއަށްދާ ލ ބަރެސްދޫއާއި، އެ ސަރަޙައްދުގެ ހިތްގައިމު މަންޒަރުތައްވެސް ޓްރެއިލަރ އިން ފެނެއެވެ.

ޖުމުލަ 11 ފަންނާނުންނާއެކު މި އަހަރު ކުރިއަށްގެންދާ މި ރިއަލިޓީ ޝޯވް އަކީ މިދިޔަ އަހަރު ގެނެސްދިން ޝޯވ އަށްވުރެ ފެންވަރު ރަނގަޅުކޮށް ގެނެސްދިނުމަށް ހަމަޖެހިފައިވާ ޝޯވް އެކެވެ.

މިއަހަރުގެ ޝޯވް ގައި ރާއްޖޭގެ މަޝްހޫރު ފިލްމީ ތަރިންގެ އިތުރުން، މޮޑެލިންގ ދާއިރާއިން މަޝްހޫރު ފަރާތްތަކާއި، ޓީވީ ޝޯވް ހުށައަޅައިދޭ ފަރާތްތައްވެސް ބައިވެރިވެއެވެ. އެގޮތުން ރިޝްމީ، އައްޒަ، ފުބޫ، ރޯމަން، ދޮނާ، އިފްނާޒް އަދި ފަރީލާގެ އިތުރުން، މޮޑެލިންގ ދާއިރާގައި ޙަރަކާތްތެރިވާ ނޫރު އަދި ޓީވީ ޝޯވް ހުށައެޅުންތެރިންގެ ތެރެއިން ޝަބާ އަދި ސުހާ އާއި، ކޮރިއޯގްރަފީގެ ދާއިރާއިން މަޤްބޫލު ރިޗާރޑު މިފަހަރުގެ ސީޒަންގައި ފެނިގެންދާނެއެވެ.

އެމްއެންޑީއެފްގެ އެހީތެރިކަމާއެކު ރާއްޖެޓީވީން އުފައްދާ ރިއަލިޓީ ޝޯވް ޕެޓްރޯލް އޮފިސީ ސެލެބްރިޓީ ރޭސް ސީޒަން 2 ގެ މެއިން ހޯސްޓެއްގެ ގޮތުގައި ފެނިގެންދާނީ ރާއްޖެޓީވީގެ ޕްރޮގްރާމް ހެޑް އަދި ރާއްޖޭގެ މަޤްބޫލު ޕްރެޒެންޓަރެއް ކަމަށްވާ އާމިރު ސަލީމްއެވެ. އަދި ކޯ ހޯސްޓެއްގެ ގޮތުގައި އެމްއެންޑީއެފްގެ ބޭކަނބަލެއްކަމަށްވާ ހައްވާ ނަޖްލާ ފެނިގެންދާނެއެވެ.

ލ އަތޮޅު ބަރެސްދޫ އަދި އެ ސަރަޙައްދުގެ ބައެއް ފަޅު ރަށްރަށާއި މީހުން ދިރިއުޅޭ ބައެއް ރަށްރަށުގައި މި ޝޯވްގެ ޓާސްކުތައް ވަނީ ކުރިއަށް ގެންގޮސްފައެވެ. ޝޯވްގެ ޝޫޓިންގ މިހާރު އެއްކޮށް ނިންމާލާފައިވާއިރު، މި ޝޯވް އިން އެއްވަނައަށް އަންނަ ފަރާތެއް ކަނޑައެޅިގެންދާނީ ބެލުންތެރިންގެ އެސްއެމްއެސް ވެސް ހިމެނިގެންނެވެ.

ސެލެބްރިޓީ ރޭހަކީ ސަރވައިވަލް ޝޯވއެއްގެ ގޮތުގައި ރާއްޖޭގައި ކުރިއަށްގެންދިޔަ ފުރަތަމަ ޝޯވ އެވެ. މި ޝޯވް ގެ ފުރަތަމަ ސީޒަން ކުރިއަށް ގެންދިޔައީ ދ. އަތޮޅުގެ 11 ފަޅު ރަށެއްގައެވެ.

ބެލުންތެރިންގެ މެދުގައި ބޮޑު މަގްބޫލުކަމެއް ލިބިގެން ދިޔަ މި ޝޯވ ގެ ފުރަތަމަ ސީޒަންވެސް ފޭސްބުކް މެދުވެރިކޮށް 3 ލައްކައަށްވުރެ ގިނަ މީހުން ބަލާފައިވެއެވެ.