އަލަށް އެކުލަވާލެވުނު އެންޓި ކޮރަޕްޝަން ކޮމިޝަން (އޭސީސީ)ގެ އަމާޒަކީ ނަތީޖާ ނެރެވޭ ތާކަށް އޭސީސީ ހެދުންކަމަށް އެކޮމިޝަންގެ ރައީސް އާދަމް ޝާމިލް ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމްގައި އޭސީސީގެ މަސައްކަތްތައް ރާވާލާފައިވާ ގޮތާއި ގުޅޭގޮތުން ވާހަކަފުޅުދައްކަވަމުން ޝާމިލް ވިދާޅުވީ، އެންމެ ފުރަތަމަ ކޮމިޝަނާއި ހަވާލުވެވަޑައިގަތުމަށްފަހު ކޮމިޝަންގެ މެމްބަރުން ކުރެއްވި މަސައްކަތަކީ ހަމަ އެދުވަހު އޭސީސީގެ މުވައްޒަފުންނާއި ބައްދަލުކުރެއްވުން ކަމަށެވެ. އެއަށްފަހު ހުރިހާ ޑިޕާޓްމަންޓްތަކާއި ޔުނިޓްތަކުން ޕްރެޒެންޓޭޝަންތައް ތައްޔާރުކޮށް އޭސީސީގެ މަސައްކަތްތައް ކުރިޔަށްދާ ގޮތް ކޮމިޝަންގެ މެމްބަރުންނާއި ހިއްސާކުރި ކަމަށް ޝާމިލް ވިދާޅުވިއެވެ.
އެހެންކަމުން އެންމެ ފުރަތަމަ ކަމެއްގެ ގޮތުގައި ކުރެއްވި މަސައްކަތަކީ، އޭސީސީގެ ހާލަތު ދެނެގަތުމަށް ކުރެއްވި މަސައްކަތްތަކެއް ކަމަށާއި އެގޮތުގެ މަތިން ކޮމިޝަންގެ ވޭތުވެދިޔަ މާޒީގައި ދިމާވި ގޮންޖެހުންތަކުން އަރައިގަތުމަށް ކުރު ރާސްތާ އަމާޒުތަކަށް މަސައްކަތް ކުރެވޭނެ ގޮތްތަކެއް މިހާރު ހޯއްދަވާފައިވާކަމަށް ޝާމިލް ވިދާޅުވިއެވެ.
އަދި ކުރު ރާސްތާ އަމާޒުތަކެއް 6 ދާއިރާއަކުން ކަނޑައަޅާފައިވާކަމަށް ޝާމިލް ވިދާޅުވިއެވެ.
ފުރަތަމަ ކަމަކަށް ކުރި ކަމަކީ އޮތް ހާލަތު ދެނެގަތީ. ކަމެއް ރަނގަޅުކުރުމަށް އެންމެ މުހިންމީ މިހާރު އެކަން ހިނގާ ގޮތާއި ހުރި ގޮންޖެހުންތަކާއި މައްސަލަތައް ދެނެގަތުން. އެކަންކަމުން އަރައިގަތުމަށް ހެދޭނީ ކިހިނެއްތޯ މިބެލީ. އެއަށްފަހު ކުރު ރާސްތާ އަމާޒުތަކެއް މި ކަނޑައެޅީ 6 ދާއިރާއަކުން. އެ ހަ ދާއިރާއަކީ ރައްޔިތުންގެ ކަންބޮޑުވުން އެންމެ ބޮޑަށް އޭސީސީއާ މެދު އަބަދުވެސް އޮންނަ ކަންކަން އިސްލާހުކުރުމަށް އަޅުގަނޑުމެންނަށް އެންމެ މުހިންމު ހަ ދާއިރާ. އެހެންވީމާ އެ ހަދާއިރާގެ ކަންކަން ކުރެވުމުގެ ނަތީޖާއަކަށް ވާނީ ގާނޫނުން މަސްއޫލުކުރެވިފައި މިވާ މަސްއޫލިއްޔަތު އަދާކުރުމަށް ފުރިހަމަ ގޮތުގައި މުއައްސަސާ ބައްޓަންކުރުން.އާދަމް ޝާމިލް / އޭސީސީގެ ރައީސް
ޝާމިލް ވިދާޅުވީ އޭސީސީއާއި މެދު ފާއިތުވި ދުވަސްތަކުގައި ރައްޔިތުންގެ ބޮޑެތި ކަންބޮޑުވުންތަކެއް އެބަހުރި ކަމަށެވެ. ޚާއްސަކޮށް ކޮރަޕްޝަނާއި ގުޅުންހުރި ކަންކަން ތަހުގީގުކުރުމުގައި ބޮޑެތި ކަންބޮޑުވުންތަކެއް ހުރި ކަމަށް ޝާމިލް ވިދާޅުވިއެވެ.
އޭސީސީން މަސައްކަތްކުރަނީ ރައްޔިތުންނަށްޓަކައި ކަމަށާއި އެހެންކަމުން މަސައްކަތްތައް ބައްޓަންކުރާނީވެސް އެމަގުންކަމަށް ޝާމިލް ވިދާޅުވިއެވެ.
އޭސީސީއާ ހަވާލުވެ ތިބެނީ ކޮން ފަސް މެމްބަރުންނެއްތޯ މުހިންމެއް ނޫން ހަގީގަތުގައި. އޭސީސީ ޖެހޭ އޭގެ ޒާތުގައި ހިނގަ ހިނގާ އޮންނަ މުއައްސަސާއަކަށް ބަދަލުކުރަން. މިގެންނަނީ އެވިސްނުން. މިގެންނަ ވިސްނުމަކީ އޭސީސީއަކީ ބާރުވެރި މުވައްޒަފުންތަކެއް ތިބި ފަންނީ ގޮތުން ގާބިލް މުވައްޒަފުންތަކެއް ތިބި ރައްޔިތުންގެ ބޭނުމަށް އޭސީސީގެ މަސައްކަތް ބައްޓަންކޮށް އޭގެ ނަތީޖާ ނެރެވޭ މުއައްސަސާއަކަށް ހެދުން.އާދަމް ޝާމިލް / އޭސީސީގެ ރައީސް
ޝާމިލް ވިދާޅުވީ އޭސީސީގެ މަސައްކަތްތައް ކުރިޔަށް ގެންދިޔުމުގައި ބޮޑެތި ގޮންޖެހުންތަކެއް އެބަހުރި ކަމަށެވެ. އެގޮތުން ފަންނީ ގާބިލްކަމާއި ވަސީލަތްތަކުގައި ބޮޑެތި ގޮންޖެހުންތަކެއް އެބަހުރި ކަމަށް ޝާމިލް ވިދާޅުވިއެވެ.
ޒަމާނާއި އެއްގޮތަށް އޭސީސީގެ މަސައްކަތްތައް ބައްޓަންކުރުމަށް ޑިޖިޓަލައިޒްވާން ޖެހޭކަމަށާއި ކޮރަޕްޝަންގެ ކުށްތައް ހިންގާ ގޮތް ދެނެގަނެ، ކުށް ކުރުމުގެ ކުރިން އެކަމުން ރައްކާތެރިކުރެވޭނެ ގޮތްތަކަށް މަސައްކަތްތައް ބައްޓަންކުރަންޖެހޭކަމަށް ޝާމިލް ވިދާޅުވިއެވެ. އެކަންކުރެވެން އޮތީ އޭސީސީ އެހެން ގޮތަކަށް ބައްޓަންކޮށްގެން ކަމަށާއި ނަތީޖާ ނެރެވޭތާކަށް އޭސީސީ ބަދަލުކުރުމަށް ވަރަށް ބޮޑު އެހީތެރިކަމެއް ބޭނުންވާކަމަށް ޝާމިލް ވިދާޅުވިއެވެ.
މިކަންކަމަށް އެކި ފަރާތްތަކުގެ އެހީތެރިކަން އޭސީސީއަށް ބޭނުންވާއިރު އެމަސައްކަތްތައް މިހާރު ކުރައްވަމުންގެންދަވާކަމަށްވެސް ޝާމިލް ވިދާޅުވިއެވެ.
