ސައޫދީ ރަސްގެފާނު ރާއްޖެއަށް "އިފްތާރު ޕެކޭޖް" ހަދިޔާކުރައްވައިފި
200 އިފްތާރު ޕެކޭޖް ހަދިޔާކޮށްފައިވޭ
އިފްތާރު ޕެކޭޖް ހަދިޔާކުރުން
ސައޫދީ ރަސްގެފާނު ސަލްމާން ބިން އަބްދުލްއަޒީޒް އާލް ސައުދުގެ ފަރާތުން ރާއްޖެއަށް ހަދިޔާކުރެއްވި އިފްތާރު ޕެކޭޖްތައް އިސްލާމިކް މިނިސްޓްރީއާ ހަވާލުކުރައްވައިފިއެވެ.
ސައުދީ ސަރުކާރުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު މަތުރިކް ބިން އަބްދުﷲ އަލްއަޖާލީން ވަނީ ދިވެހި ސަރުކާރަށް މި އިފްތާރު ޕެކޭޖްތައް ހަވާލުކޮށްދެއްވާފައެވެ. ދިވެހި ސަރުކާރުގެ ފަރާތުން މި ތަކެއްޗާ ހަވާލުވެވަޑައިގެންނެވީ އިސްލާމިކް މިނިސްޓަރ ޑރ. އަހުމަދު ޒާހިރު އަލީއެވެ.
ސައުދީ ރަސްގެފާނު ދެއްވާ ޚާއްސަ އިފްތާރު ޕެކޭޖުގެ ތެރެއިން މިއަހަރު ރާއްޖެއަށް ދެއްވާފައިވަނީ 200 ޕެކޭޖުކަމަށް އިސްލާމިކް މިނިސްޓްރީން ބުނެފައިވެއެވެ. މިނިސްޓްރީން ބުނީ މި ޕެކޭޖްތައް ބެހުމަށް ހަމަޖެހިފައިވަނީ ފަގީރުންގެ ތެރެއިން އެންމެ މީހުން ގިނަ އާއިލާތަކަށްކަމަށެވެ.
ސައުދީ އަރަބިއްޔާއަކީ ރާއްޖެއަށް އެކި ގޮތްގޮތުން އެހީ ފޯރުކޮށްދޭ ގައުމެކެވެ. ޚާއްސަކޮށް ރާއްޖޭގައި އިސްލާމްދީން ކުރިއަރުވައި، ދީނީ ރޮގުން މީހުން ބިނާކުރުމާއި މިފަދަ އެތައް އެހީއެއް ސައުދީ ސަރުކާރުން އަންނަނީ ފޯރުކޮށްދެމުންނެވެ.
ސައުދީން ވަނީ އަކުރު ކުދި މުސްހަފާއި އަކުރު ބޮޑެތި މުސްހަފުވެސް ރާއްޖެއަށް ފޯރުކޮށްދީފައެވެ. މީގެ އިތުރުން ސައުދީ ސަރުކާރުން މިދިޔަމަހު ވަނީ 3000ީ މުސްހަފު ހަދިޔާކޮށްފައެވެ.
