ދަ ގްރާންޑޭއިން ފުރަތަމަ މޮޅު ހޯދައިފި

މައިލޯ އެފްއޭއެމް ވެޓަރަންސް ލީގު 2022 ގައި ދަގްރާންޑޭ ސްޕޯޓްސް ކްލަބް ކުޅުނު ފުރަތަމަ މެޗު އެޓީމުން ކާމިޔާބު ކޮށްފިއެވެ.

މިއީ މުބާރާތުގެ ދެވަނަ މެޗެވެ. މި މެޗުގައި ބައްދަލުކުރީ ދަ ގްރާންޑޭ އާއި ދިވެހި ސިފައިންގެ ކްލަބް (ޑީއެސްސީ) އެވެ. ދަ ގްރާންޑޭއިން މެޗު ކާމިޔާބު ކުރީ 1-0 ގެ ނަތީޖާއަކުންނެވެ.

ފުރަތަމަ ހާފުގައި ދަ ގްރާންޑޭގެ ފަހަތަށް ކުޅޭ އިބްރާހިމް ސާމިރު ޖެހި ބޯޅަ އަމާޒުވީ ގޯލުގެ ދަނޑިއަށެވެ. ސިފައިންގެ ޓީމުގެ މުހައްމަދު ރަމީޒް ޖެހި ބޯޅައެއް ދަ ގްރާންޑޭގެ ކީޕަރު ލުއައްޔު އާދަމް ވަނީ މަތަކޮށްފައެވެ. ޖުމްލަ ގޮތެއްގައި ދެ ޓީމަށް ވެސް ފުރަަތަމަ ހާފުގައި ގޯލެއް ޖަހަން މާ ހުސް ފުރުސަތެއް ތަނަވަސްކުރެވޭ ގޮތެއްނުވިއެވެ.

ދަ ގްރާންޑޭއިން ލީޑު ނެގީ މެޗުގެ 56 ވަނަ މިނެޓުގައެވެ. މިއީ ހަސަން ޖެހި ބޯޅައެއް ދިފާއުކުރަން އުޅުމުގެ ތެރޭގައި ދިވެހި ސިފައިންގެ ކްލަބްގެ ކުޅުންތެރިއަކު އަތުގައި ބޯޅައިން ޖެހުމުން ރެފްރީ ދިން ޕެނަލްޓީއަކުން ކާމިޔާބުކުރި ލަނޑެކެވެ. ހަަސަން ޖެހި ޕެނަލްޓީ ގޯލަށް ވަނީ ސިފައިންގެ ޓީމު ކީޕަރު އިބްރާހިމް ރަޝީދު އަތުގައި ޖެހިފައެވެ.

މި މުބާރާތް އަލުން ބާއްވަން ފަށާފައި މިވަނީ ތިން އަހަރުގެ މެދުކެނޑުމަކަށްފަހުއެވެ. އެފްއޭއެމްއާއި ގުޅިގެން މި ފަހަރުގެ މުބާރާތް .އިންތިޒާމް ކުރަނީ ކްލަބް އިވެންޓްސް އިންނެވެ. 40 އަހަރުން މަތީގެ ކުޅުންތެރިންނަށް ޚާއްޞަކޮށްފައިވާ މުބާރާތުގައި ވާދަކުރަނީ 7 ޓީމެވެ. މުބާރާތުގައި ކޮންމެ ޓީމެއްގައިވެސް 35 އަހަރުން މަތީގެ ދެ ކުޅުންތެރިން ހިމަނަން ފުރުޞަތު ލިބެއެވެ.

މުބާރާތުގައި މާދަމާ ހަވީރު ކުޅޭ މެޗުގައި ޕޮލިސް ކްލަބް ނުކުންނާނީ މޯލްޑިވްސް ސޮކަ މޭޓްސްއާ ދެކޮޅަށެވެ. މެޗު ފަށާނީ 16:30 ގައެވެ. މުބާރާތުގެ މެޗުތައް އޮންނާނީ އެފްއޭއެމްގެ އެއް ނަންބަރު ޓާފު ދަނޑުގައެވެ.