މި ރޯދަ މަހު ވެސް ތަކެތީގެ އަގު އެއްމިންވަރެއްގައި ހިފެހެއްޓުމަށް ސަރުކާރުން މަސައްކަތްކުރޭ

ރޯދަ މަސް ފެށުމާއެކު ތަރުކާރީއާއި މޭވާގެ އިތުރުން އެހެނިހެން ބާވަތްތަކަށް އޮންނަ ޑިމާންޑް ބޮޑުވެގެންދެއެވެ. މިއާއެކު ބާޒާރުގައި ލިބެން ނެތް ތަކެތީގެ އަގު އިންތިހާއަށް އުފުލިގެންދެއެވެ. މި ރޯދަ މަހަށް ބެލިކަމުގައިވިއަސް, ބާޒާރުގައި އެންމެ ލިބުން ދަތި ނުވަތަ އަގު އުފުލިފައިވާ އެއްޗެއްގެ ގޮތުގައި ފާހަގަވެގެން މިދަނީ ލުނބޮޔާއި ކެބެޖް އަދި މިރުހެވެ.

ރާއްޖެއަށް ލުނބޯ ލިބުމުގައި ހުރި ދަތިތަކެއްގެ ސަބަބުން ބާޒާރުގައި ލުނބޯގެ އަގުވަނީ ވަރަށް ބޮޑުވެފައެވެ. ބާޒާރުމަތިން ލުނބޯ ކިލޯއެއް ވިއްކަމުންދަނީ 120 ރުފިޔާއާއި 150 ރުފިޔާއާއި ދެމެދުގެ އަގެއްގައެވެ. ސަރުކާރުން ވަނީ މި ރޯދަ މަހު ވެސް ރައްޔިތުންނަށް ތަކެތީގެ އަގު އެއްހަމައެއްގައި ފޯރުކޮށްދޭނެކަމަށް ވައުދުވެފައެވެ. މިއާއެކު ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ)އިން ވަނީ ލުނބޯ ކިލޯއެއް 45 ރުފިޔާއަށް ވިއްކަން ފަށާފައެވެ. އެސްޓީއޯ ޕީޕަލްސް ޗޮއިސްއިން 45 ރުފިޔާއަށް ލުނބޯ ކިލޯ ލިބެން ހުންނާނެކަމަށް އެ ކުންފުނިން ބުނެއެވެ. އެސްޓީއޯއިން ބުނީ ކޮންމެ މީހަކަށް ވިއްކާނީ ލުނބޯ ކިލޯއެއްގެ މަގުން ކަމަށެވެ. އަދި އެ ކުންފުނީގެ އެގްރިސެންޓަރުން މީހަކަށް 3 ކިލޯގެ ރޭޓުން ލުނބޯ ވިއްކަމުންދާނެ ކަމަށް އެސްޓީއޯއިން ބުނެއެވެ.

މީގެއިތުރުން ކަރާގެ އަގު ވެސް އެއް ހަމައެއްގައި ހިފެއްޓުމަށް ސަރުކާރުން ވަނީ, ރޯދަ މަސް ފެށުމުގެ ކުރިން ވެސް މަސައްކަތް ފަށާފައެވެ. ސަރުކާރުގެ ދަނޑުވެރިކަމާބެހޭ ކުންފުނިކަމުގައިވާ އެގްރޯނެޓުގެ ފަރާތުން މިއަހަރުގެ ރޯދަމަހަށް އަމާޒުކޮށްގެން ގިނަ ޢަދަދެއްގެ ކަރާ ހެއްދުމަށްފަހު ބާޒާރަށް ވަނީ ނެރެން ފަށާފައެވެ. އެގޮތުން ރަމަޟާން މަހުގެ ފުރަތަމަ ދުވަހު 5 ޓަނު ކަރާ، ދެވަނަ ދުވަހު 1.5 ޓަނު ކަރާ، ތިން ވަނަ ދުވަހު 3 ޓަނު ކަރާ ވަނީ ބާޒާރަށް ނެރެފައެވެ. އަދި މިހަފުތާގެ ތެރޭގައި އިތުރު 10 ޓަނު ކަރާ ބާޒާރަށް ނެރުމަށް މިހާރު ވަނީ ތައްޔާރު ކުރެވިފައިވާ ކަމަށް ވެސް އެކުންފުނިން ބުންޏެވެ. އަދި އެކި ދުވަސްތަކަށް ބަހާލައިގެން ޖުމްލަ 117 ޓަނު ކަރާ އެގްރޯނެޓުގެ ފަރާތުން ރަމަޟާން މަހު ބާޒާރަށް ނެރޭނެކަން ވަނީ ހާމަކޮށްފައެވެ.

ދަނޑުވެރިކަމުގެ ބާވަތްތަކުގެ އުފެއްދުންތެރިކަން އިތުރުވެފައި ވާތީ، އެހެން އަހަރުތަކާ ޚިލާފަށް މިއަހަރުގެ ރަމަޟާންމަހު ބާޒާރުގައި ކަރާގެ އަގު އާދަޔާ ޚިލާފަށް ބޮޑު ނުވެ ހިފެހެއްޓިފައިވަނީ މި ސަބަބަށްޓަކައި ކަމަށްވެސް އެގްރޯނެޓުން ބުނެފައިވެއެވެ.

އެގްރޯނެޓުން ބުނީ ކަރާގެ އިތުރުން ބަރަބޯ، ބަޓާނާ، ތޮރާ، ކިއުކަންބާ، ފަޅޯ އަދި ފަތްކޭލުގެ ބާވަތްތައް ގިނަ އަދަދަކަށް ބާޒާރަށް ނެރެން ނިންމާފައިވާ ކަމަށެވެ. އަދި ރާއްޖޭގެ އަތޮޅުތައް 5 ސަރަހައްދަކަށް ބަހާލެވިގެން، މުޑުވައްކުރާ ދުވަހުން ފެށިގެން ތަކެތި ބާޒާރަށް ނެރުމާ ހަމައަށް ދުރާލައި އިންތިޒާމްކުރެވިގެން ހިންގޭ ދަނޑުވެރިކަމުގެ އާމޮޑެލްގެ ދަށުން, ދަނޑުވެރިކަން ކުރުމަށްޓަކައި 707 ފަރާތަކުން ދަނޑުވެރިކަން ކުރުމުގެ އެއްބަސްވުމުގައި ސޮއިކޮށްފައިވާ ކަމަށް ވެސް ވަނީ ބުނެފައެވެ. ދަނޑުވެރިކަން ފެށުމަށްޓަކައި ދެވޭ ސްޓާޓަރ ޕެކް 276 ފަރާތަކަށް ވަނީ ދޫކުރެވިފައިވާއިރު 273 ފަރާތަކުން މިހާރު ވެސް އަމަލީގޮތުން ދަނޑުވެރިކަންކުރާކަމަށް އެގްރޯނެޓުން ބުނެއެވެ.

އެގްރޯނެޓުން ވެސް ގިނަ މަސައްކަތްތަކެއް ފަށާފައިވާއިރު ރޯދަ މަހު އާންމުކޮށް ބޭނުންކުރާ ތަކެތީގެ އަގު އުފުލިގެން ދިޔަނުދިނުމަށްޓަކައި ގިނަ ފިޔަވަޅުތަކެއް އަޅައެވެ. އެގޮތުން ޝިޕްމަންޓްތައް ގެންނަ މިންވަރުވެސް އިތުރުކުރެއެވެ. މި ރޯދަ މަހު ވެސް ސަރުކާރުން އަމާޒު ހިފާފައިވަނީ ތަކެތީގެ އަގު އެއް މިންވަރެއްގައި ހިފެހެއްޓުމަށެވެ.