ޓެކްސީ ޑްރައިވަރު ޤާސިމްގެ މަރު: އިތުރު ހެއްކެއްގެ ހެކިބަސް ނަގައިފި

ޓެކްސީ ޑްރައިވަރު، 59 އަހަރުގެ ގާސިމް ހަސަން މަރާލި މައްސަލައިގައި، ގަސްދުގައި މީހަކު މެރުމުގެ ކުށުގެ ދައުވާ އުފުލާފައިވާ، ޅ. ހިންނަވަރު، ބޮޑުހިޔާގެ، އަދުހަމު މުހައްމަދުގެ މައްޗަށް އުފުލާފައިވާ ދައުވާގެ އަޑުއެހުމެއް އާދިއްތަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި އަޑުއެހުމުގައި ކުރިއަށް ގެންގޮސްފައިވަނީ ދައުލަތުން ހުށައަޅާފައިވާ ހެކިންގެ ހެކިބަސް ނެގުމެވެ.

މި މައްސަލައިގައި 20 މާރޗު 2022 ގައިވެސް އަޑުއެހުމެއް ބޭއްވިއެވެ. އެ އަޑުއެހުމުގައިވެސް ވަނީ ދައުލަތުން ހުށައަޅާފައިވާ 3 ހެއްކެއްގެ ހެކިބަސް ނަގާފައެވެ.

އަންގަރަ ދުވަހުގެ އަޑުއެހުމުގައި ފުރަތަމަ ވަނީ ބަންގްލަދޭޝްގެ ރައްޔިތެއްކަމަށްވާ ޝަރީފުލް އިސްލާމް ހެކިވެރިއެއްގެ ގޮތުގައި ހާޒިރުކޮށްފައެވެ. އޭނާ ވަނީ އޮންލައިންކޮށް ޝަރީއަތުގައި ބައިވެރިވެ، ހެކިބަސް ދީފައެވެ.

ދެން މި އަޑުއެހުމުގައި ހާޒިރުކުރަން ނިންމާފައިވާ ހެކިވެރިޔާ ހާޒިރު ކުރެވިފައެއް ނުވެއެވެ. ވުމާއެކު ދައުލަތުން ވަނީ ދައުލަތުގެ ހެކިންގެ ހެކިބަސް ނެގުން މި މަރުޙަލާގައި ކުރިއަށްދާއިރު، އޭނާ ހާޒިރުކުރުމަށް އިތުރު ފުރުސަތަކަށް އެދިފައެވެ.

ގާޒީ ވަނީ ހެކިވެރިން ހާޒިރުކުރަން ދީފައިވާ ތާރީޚުތަކާއި އެއްގޮތަށް ހެކިން ހާޒިރުކޮށްދިނުމަށް ކުރިއަށް އޮތް ތަނުގައި ސަމާލުކަން ދިނުމަށް އެދިވަޑައިގަންނަވާފައެވެ.

ގާސިމް މަރާލާފައި އޮއްވާ ފެނިގެން ފުލުހުންނަށް ރިޕޯަޓްކޮށްފައިވަނީ 2019 ވަނަ އަހަރު ޑިސެމްބަރު މަހުގެ ހަތަރު ވަނަ ދުވަހުގެ ރޭ 21:07 ހާއިރުއެވެ.