ރަޝިޔާގެ ރައީސް ވްލަޑްމިއަރ ޕުޓިން ހަނގުރާމަމަތީ ޖަރީމާ ހިންގެވިކަމުގެ ތުހުމަތު ކުރައްވައި އެ މައްސަލަ ބެއްލެވުމަށް އެމެރިކާގެ ރައީސް ޖޯ ބައިޑެން ގޮވާލައްވައިފިއެވެ.
ބައިޑެން މިފަދައިން ގޮވާލައްވާފައިވަނީ ޔޫކްރެއިންގެ އަވަށެއް ކަމުގައިވާ ބޫޗާ ދިން ހަމަލާއާއި ގުޅިގެންނެވެ. މި ހަމަލާގައި އެ ސަރަހައްދުގެ އެތައް ބަޔަކު ވަނީ މަރުވެފައެވެ. މި ހަމަލާގައި މަރުވި މީހުންގެ ފޮޓޯތައް ދަނީ ސޯޝަލް މީޑިއާގައި އާންމުވަމުންނެވެ.
ބައިޑެން ވިދާޅުވީ ޕުޓިން އަކީ އަނިޔާވެރި ބޭފުޅެއްކަން ބޫޗާގައި ހިނގައިދިޔަ ކަންކަމުން މުޅި ދުނިޔެއަށްވެސް ފެންނަމުންދާކަމަށެވެ.
ޔޫކްރެއިންގެ ދިފާއުގައި އެ ގައުމަށް ހުއްޓާނުލައި ހަތިޔާރު ފޯރުކޮށްދޭން ބައިޑެން ގޮވާލެއްވިއެވެ. އަދި ޕުޓިންއާއި ދެކޮޅަށް ހަނގުރާމަމަތީ ޖަރީމާ ހިންގެވިކަމުގެ މައްސަލަ ބެލޭ ވަރަށް މައުލޫމާތު އެއްކުރަން ޖެހިވަޑައިގަންނަވާ ކަމަށް ބައިޑެން ވިދާޅުވިއެވެ.
ރަޝިޔާއިން ޔޫކްރެއިންގެ ބޫޗާއަށް ދިން ހަމަލާގައި 300 ވަރަކަށް މީހުން މަރުވެފައިވާކަމަށް ވަނީ ރިޕޯޓުކޮށްފައެވެ. އެމީހުން މަރާލާފައިވަނީ ވަރަށް ކައިރިން ދިން ހަމަލާތަކަކުންކަމަށް ރޮއިޓަރސްގައި ރިޕޯޓުކޮށްފައިވެއެވެ. އަދި ދެ މީހެއްގެ ހަށިގަނޑުގެ ވަށައިގެން ޕްލާސްޓިކް ވްރެޕް އެޅުމަށްފަހު ޓޭޕު އަޅައި، ފެން ހިންދުމަށް ކޮނެފައިވާ ތަނަކަށް އެއްލާފައިވާކަމަށްވެސް ރިޕޯޓުކޮށްފައިވެއެވެ.
އެހެންނަމަވެސް ރަޝިޔާއިން ގެންދަނީ މިފަދަ ހަމަލާތަކެއް ދިންކަމަށް އިންކާރުކުރަމުންނެވެ.
