ކާށިދޫ ފަޅުތެރޭގައި ރިސޯޓެއް ހެދުމަށް ތަނެއް ޝޯޓްލިސްޓްކޮށްފި

ކ. ކާށިދޫ ފަޅުތެރޭގައި ރިސޯޓެއް ހެދުމަށްޓަކައި, ރިސޯޓް ހަދާނެ ބިން ނަގާނެ 3 ތަނެއް ފާހަގަކޮށް އެތަނުން އެއް ތަން މިހާރު ޝޯޓްލިސްޓްކޮށްފައިވާކަމަށް ޓުއަރިޒަމް މިނިސްޓަރ އަބްދުﷲ މައުސޫމް ވިދާޅުވެއްޖެއެވެ.

މިނިސްޓަރ މިހެން ވިދާޅުވީ ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި ކާށިދޫ ދާއިރާގެ މެމްބަރ އަބްދުﷲ ޖާބިރު, ކާށިދޫއާއި ގާފަރުގެ ފަޅުތެރޭގައި އިންޓެގްރޭޓެޑް ރިސޯޓް އަޅަން އިއުލާންކުރާނެ ތާރީޚާއި ގުޅޭގޮތުން ކުރެއްވި ސުވާލަށް ޖަވާބު ދެއްވަމުންނެވެ. މިނިސްޓަރ ވިދާޅުވީ އިދާރީ މަރުހަލާ ނިންމުމަށްފަހު އެރަށް ދެވޭނެކަމަށެވެ.

މީގެއިތުރުން މިވަގުތު ކާށިދޫގެ ރައްޔިތުންނަށް "ވަން އައިލެންޑް ވަން ރިސޯޓް"ގެ ކޮންސެޕްޓްގެ ގޮތުގައި ތަރައްގީކުރުމާއި އިންޓެގްރޭޓެޑް މޮޑިޔުލަށް ދިޔުމުގެ ފުރުސަތު އެބައޮތްކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ ރާއްޖޭގައި ގިނަ ރިސޯޓްތައް ނުހެދި ހުރީ ފަންޑު ނުލިބިގެންކަމަށެވެ.