ތިމަރަފުށީ ހަރުކަށި ފިކުރު: އިންޓެލް ރިޕޯޓު ސިއްރު ނުކޮށްދިން މައްސަލައިގެ އިސްތިއުނާފު އަޑުއެހުމެއް

ތ. ތިމަރަފުށީގައި ހަރުކަށި ފިކުރު ފަތުރާ، ހަމަލާދޭން އުޅުނުކަމުގެ ތުހުމަތުކުރެވޭ މީހުންގެ މައްޗަށް ފުލުހުން ތައްޔާރު ކޮށްފައިވާ އިންޓެލިޖެންސް ރިޕޯޓު ސިއްރުކޮށް ނުދިން މައްސަލަ ހައިކޯޓުގައި އިސްތިއުނާފް ކޮށްފައިވާއިރު، އެ މައްސަލައިގެ ފުރަތަމަ އަޑުއެހުން ހައިކޯޓުގައި ކުރިއަށް ގެންގޮސްފިއެވެ.

މި މައްސަލައިގައި 22 މާރޗު 2022 ގައި ކްރިމިނަލް ކޯޓުގައި ކުރިއަށް ގެންދިޔައަޑުއެހުމުގައި އޮތީ ދައުލަތުން ހުށައަޅާފައިވާ ހެކި ރައްކާތެރި ކުރުމާގުޅޭ އަމުރާމެދު ގޮތެއް ނިންމެވުމެވެ. ދައުލަތުން ހެކި ރައްކާތެރި ކުރުމުގެ އަމުރު ނެރެދެއްވުމަށް ހުށައެޅުއްވި ހެކިތަކުގެ ތެރޭގައި 14 އިންޓެލިޖެންސް ރިޕޯޓަކާއި، 8 އެނެލިޓިކަލް ރިޕޯޓުތަކެއް ހިމެނެއެވެ.

މި ރިޕޯޓުތައް ޝަރުތުތަކަކާއެކު ޝަރީއަތް މެދުވެރިކޮށް ބެލޭނެ ގޮތް ހެދުމަށް ދައުލަތުން އެދެއެވެ. އެކަމާއި ގުޅޭގޮތުން ދައުލަތުގެ ވަކީލު ވިދާޅުވެފައިވަނީ، އިންޓެލިޖެންސް ރިޕޯޓުތަކަކީ އޭގެ ޒާތުގައި މުޖުތަމައަށް ސިއްރުކޮށްފައި އޮންނަ އެއްޗެއް ކަމަށާއި، އެ ނަކަލު ކުރުމަށްފަހު ދޫކޮށްފިނަމަ މުޖުތަމައަށް ބޭރުވުމުގެ ފުރުސަތު އެބައޮތް ކަމަށެވެ.

ނަމަވެސް ގާޒީ ވަނީ މި ރިޕޯޓުތަކުގައި ގައުމީ ސަލާމަތަށް ނުރައްކާ ވާނެ ފަދަ މައުލޫމާތެއް ނެތްކަމަށް ވިދާޅުވެ، އެ ހެކިވެސް ހާމަކުރެއްވުމަށް ނިންމަވާފައެވެ. ގާޒީ ވަނީ އިންޓެލިޖެންސް ރިޕޯޓު ޝަރީއަތަށް އައިސް ބެލުމާއި، ވަކީލުންގެ އަތަށް ދޫކުރުމާ މެދު ވަކި ތަފާތު ނަތީޖާއެއް އޮތްކަމަށް ދެކިވަޑައިނުގަންނަވާ ކަމަށް ވިދާޅުވެފައެވެ.

ޖުމުލަ ގޮތެއްގައި މި މައްސަލައިގައި ދައުލަތުން ހެކި ރައްކާތެރި ކުރުމަށް އެދި ހުށައަޅާފައިވާ ގިނަ ހުށައެޅުންތައް އެ ދުވަހު ނިމިގެން ގޮސްފައިވަނީ ދައުލަތުން އެދިފައިވާ ގޮތާއި ދެކޮޅަށެވެ. ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ ނަދީމެވެ.

މި މައްސަލައިގައި އިންޓެލް ރިޕޯޓު ސިއްރު ނުކުރެއްވުމަށް ގާޒީ ނިންމެވުމުން، އެ ދުވަހު ދައުލަތުން ވަނީ އެ ނިންމެވުން ހައިކޯޓުގައި އިސްތިއުނާފު ކުރައްވާނެކަން ހާމަކުރައްވާފައެވެ. އަދި ކްރިމިނަލް ކޯޓުގެ ނިންމުން މުރާޖާ ކުރަން ހުށައަޅުއްވާނެކަމަށްވެސް ޕީޖީ އޮފީހުގެ މީޑިއާ އޮފިޝަލު, އަދި މި މައްސަލައިގެ ދައުލަތުގެ ފަރާތުން ވަކާލާތު ކުރައްވާ ޕަބްލިކް ޕްރޮސެކިއުޓަރ އަހުމަދު ޝަފީއު ވިދާޅުވެފައިވެއެވެ.

އެގޮތުން ފުރަތަމަ އަޑުއެހުން ހޯމަ ދުވަހު ހައިކޯޓުގައި ކުރިއަށް ގެންގޮސްފައިވާއިރު، ފުރަތަމަ އަޑުއެހުން ކުރިއަށް ގެންދިޔައީ އާންމުކޮށް ހުޅުވާނުލައެވެ. އެހެންނަމަވެސް، މީޑިއާތަކުން އަޑުއެހުމުގައި ބައިވެރިވުމާމެދު ދައުލަތުން އިއުތިރާޒު ނުކުރާތީ، މީޑިއާތަކަށް އަޑުއެހުމުގައި ބައިވެރިވުމުގެ ފުރުސަތު ފަނޑިޔާރުންގެ ބެންޗުން ދެއްވިއެވެ.

މި އަޑުއެހުމުގައި ދައުވާ ލިބޭ ފަރާތްތަކުން ވަނީ ވަކީލަކު ބޭނުންވާކަން ފާހަގަކޮށްފައެވެ. ވުމާއެކު، ފަނޑިޔާރުންގެ ބެންޗުން ވަނީ ވަކީލުން އައްޔަނު ކުރެއްވުމަށް ފުރުސަތެއް ދެއްވާފައެވެ. އަދި އަންގާރަ ދުވަހު މި މައްސަލައިގެ އަޑުއެހުން އޮންނާނެކަން ފަނޑިޔާރުން ފާހަގަ ކުރެއްވިއެވެ. އެ އަޑުއެހުމަށްވާއިރު ދައުވާލިބޭ ފަރާތްތަކުން ވަކީލުން ހަމަޖައްސާފައި ނެތްނަމަ، ވަކީލުންނާއި ނުލައި ކުރިއަށް ގެންދާނެކަމަށްވެސް ފަނޑިޔާރުން ވިދާޅުވިއެވެ.