ހުކުމްތަކާއި ނިންމުންތަކުގެ ރޫހަށް ބަދަލު އަންނަ ގޮތަށް ރިޕޯޓު ނުކުރުމަށް ޝައުރީ ދައިރާއިން އެދިއްޖެ!
ހެޑްލައިން ލިޔުމުގައިވެސް ކޯޓުތަކުގެ ހުކުމްތަކަށް އޮޅުން ނާރަނެ ގޮތަށް ރިޕޯޓް ކުރުމަށް ވަނީ އެދިފަ
ސުޕްރީމް ކޯޓު
ކޯޓުތަކުން ނިންމާ ހުކުމްތަކާއި ނިންމުންތަކުގެ ރޫހަށް ބަދަލު އަންނަ ގޮތަށް ރިޕޯޓު ނުކުރުމަށް ޖުޑީޝަލް އެޑްމިނިސްޓްރޭޝަނުން އެދެފި އެވެ.
ސުޕްރީމް ކޯޓުގެ ދަށުން ހިންގާ ޖުޑީޝަލް އެޑްމިނިސްޓްރޭޝަނުން ނެރެފައިވާ ނޫސްބަޔާނުގައި ބުނެފައިވަނީ، ޝަރުއީ ކޯޓުތަކުން ކުރާ ހުކުމްތަކާއި ނިންމުންތައް މީޑިއާގެ ވަސީލަތްތައް މެދުވެރިކޮށް ރިޕޯޓްކުރުމުގައި ސަމާލުވާންޖެހޭ ކަންތައްތަކެއް ހުރި ކަމަށެވެ. އެގޮތުން ހުކުމްތަކާއި ނިންމުންތަކުގެ މަފްހޫމް އޮޅޭގޮތަށް ރިޕޯޓު ނުކުރުމަށް ވަނީ އެދިލައްވާފަ އެވެ. އަދި ހުކުމްތަކާއި ނިންމުންތަކުގެ ރޫހަށް ބަދަލު އަންނަ ގޮތަށް ރިޕޯޓްނުކުރުމަށް ހާއްސަ ސަމާލުކަމެއް ދިނުމަށް މީޑިއާގެ އިދާރާތަކަށް ވަނީ އިލްތިމާސްކޮށްފަ އެވެ.
އެފަދަ ލިޔުންތަކުގެ ސުރުހީ ތަކަކީވެސް މާނަ ނޯޅޭނެ ފަދަ ގޮތަކަށް ނުވަތަ ކޯޓުތަކުން ނިންމި ނިންމުންތަކުގެ ރޫހަށް އަސަރު ނުކުރާނެ، މިންގަނޑަށް ފެތޭ ސުރުހީއަކަށް ވުން މުހިއްމު ކަމަށް ޖުޑިޝަލް އެޑްމިނިސްޓްރޭޝަނުން ބުނެ އެވެ.
މީގެ އިތުރުން ލިޔުންތަކުގެ ކޮންޓެންޓް ތައްޔާރުކުރުމުގައި، ހުކުމް ނުވަތަ ނިންމުމުގައި ހިމެނޭ ކަންތައްތަކަށް ބަދަލު ނާންނާނޭގޮތެއްގެ މަތިން ކޮންޓެންޓް ތައްޔާރުކުރުމަށް އެ އިދާރާއިން ވަނީ އަންގާފަ އެވެ. އަދި ހުކުމްތަކާއި ނިންމުންތައް ފުރިހަމައަށް ރިޕޯޓްކުރުމަށް ވެސް އިލްތިމާސްކުރުމަށް އެ އިދާރާއިން އިލްތިމާސްކުރެ އެވެ.
ޖުޑީޝަލް އެޑްމިނިސްޓްރޭޝަނުން މިފަދަ އެއްގުމެއް މީޑިޔާތަކަށް އަންގާފައިވާ އިރު މީގެ ކުރިން ކްރިމިނަލް ކޯޓުންވެސް ވަނީ އެފަރާތުގެ ނިންމުންތަކާއި ހުކުމްތައް ގެނައުމުގައި މީޑިޔާތައް ސަމާލުވުމަށް އެދިފަ އެވެ.
