ގއ. މާމެންދޫގައި ހިންގި ގްރޫޕް މާރާމާރީއެއްގައި ވަޅިން ހަމަލާދީ އެރަށު ލިލީ އޮފްދަ ވެލީ، އަހްމަދު އުދައްޔު، 17، މަރާލި މައްސަލައިގައި ދައުވާ އުފުލާފައިވާ ފަރާތްތަކުގެ ޝަރީއަތުގެ އަޑުއެހުމެއް ހޯމަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި މައްސަލައިގައި ތޫނު އެއްޗެއް ބޭނުންކޮށްގެން ޤަސްތުގައި މީހަކު މެރުމުގައި ބައިވެރިވުމުގެ ކުށުގެ ދައުވާ އުފުލާފައިވަނީ ގއ. މާމެންދޫ، ރިހިފަރުދާގެ، އަޙުމަދު ޝަމީމްއާއި، ގއ. މާމެންދޫ، ބިލަތްމާގެ، ޝަރަފު ރަޝީދުއާއި، ގއ. މާމެންދޫ، ގުލްފާމުގެ، މުޙައްމަދު މާޒިންގެ މައްޗަށެވެ. އެމީހުންގެ މައްޗަށް ވަނީ މީހަކަށް ނުރައްކާތެރި ހާނިއްކައެއްވާ ގޮތަށް ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މާރާމާރީ ހިންގުމުގައި ބައިވެރިވުމުގެ ކުށުގެ ދައުވާވެސް އުފުލާފައެވެ.

އަދި 18 އަހަރު ނުފުރޭ ކުއްޖެއްގެ މައްޗަށްވެސް ދައުވާ އުފުލައި، ޖުވެނައިލް ކޯޓުގައި ޝަރީއަތް ކުރިއަށްދެއެވެ.

މި މައްސަލައިގައި ހޯމަ ދުވަހު ކުރިއަށް ދިޔަ އަޑުއެހުމުގައި އޮތީ ދައުވާ ސާފުކޮށްދިނުމާއި، ދައުވާ އިއްވައި ޖަވާބުދާރީވުމެވެ.

އަޙުމަދު ޝަމީމް:

މި އަޑުއެހުމުގައި އެންމެ ފުރަތަމަ ވަނީ އަޙުމަދު ޝަމީމްގެ މައްޗަށް ދައުވާ އިއްވާފައެވެ. ދައުލަތުން ބުނާ ގޮތުގައި އޭނާއަކީ މާރާމާރީގެ ތެރެއިން އުދައްޔުގެ ބޮލަށް ގަލަކުން ޙަމަލާދިން މީހާއެވެ. ވުމާއެކު އޭނާގެ މައްޗަށް ޤަސްތުގައި މީހަކު މެރުމުގައި ބައިވެރިވުމުގެ ކުށުގެ ދައުވާ އިއްވާފައިވާއިރު، މި ދައުވާއަށް ދިފާއުން ވަނީ އިންކާރުވެސް ކޮށްފައެވެ.

ދިފާއުން އިންކާރު ކުރުމާއެކު، ދައުލަތުން ވަނީ ހެކި ހާމަކޮށްފައެވެ. އެއަށްފަހު ދިފާއުންވެސް ހެކި ހާމަކޮށްފައިވާއިރު، އުދައްޔުއާ ދެމެދު ހިނގީ ޒުވާބެއް ކަމަށާއި، އެ ޒުވާބަށްފަހު ޝަމީމް ގޭތެރެއަށް ވަތް ކަމަށް ސާބިތުކޮށްދޭން ވަނީ 7 ހެއްކެއް ހުށައަޅާފައެވެ. ދިފާއީ ވަކީލު ވިދާޅުވާ ގޮތުގައި އުދައްޔުއަށް ޙަމަލާ ދިނުމުގެ ސަބަބުން އޭނާ ވެއްޓުނުއިރުވެސް ޝަމީމް އެތަނުގައެއް ނުހުންނާނެއެވެ. އޭރު ޝަމީމް ހުރީ ގޭތެރޭގައިކަން ސާބިތުކޮށްދިނުމަށް އެވަގުތު ގޭތެރޭގައި ތިބި އޭނާގެ އާއިލާ މެމްބަރުންވެސް ހެކީގެ ގޮތުގައި ހުށައަޅުއްވާނެކަމަށް ދިފާއީ ވަކީލު ވިދާޅުވިއެވެ.

އޭނާގެ މައްޗަށް ކުރާ ނުރައްކާތެރި ހާނިއްކައެއްވާގޮތަށް ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މާރާމާރީ ހިންގުމުގައި ބައިވެރިވުމުގެ ކުށުގެ ދައުވާއަށްވެސް އޭނާ އިންކާރު ކުރެއެވެ. އެ ދައުވާއާއި ގުޅިގެންވެސް ދެފަރާތުން ވަނީ ހެކި ހާމަކޮށްފައެވެ.

ގާޒީ އަލީ ނަދީމް ވަނީ މިއީ މަދަނީ މިންގަނޑުން ކުރިއަށް ގެންދެވޭނެ ދައުވާއެއްކަމަށް ކަނޑައަޅުއްވާފައެވެ. އަދި މި ދައުވާތަކާއި ގުޅިގެން ޝަރީއަތުގެ ކުރީގެ ހުށައެޅުންތަކަށް ގާޒީ ވަނީ 15 ދުވަހުގެ މުއްދަތެއް ދެއްވާފައެވެ.

ޝަރަފު ރަޝީދު:

މި މައްސަލައިގައި ޝަރަފުގެ މައްޗަށްވެސް ދައުވާ އިއްވާފައިވާއިރު، ޝަރަފުގެ މައްޗަށްވެސް އުފުލާފައިވަނީ ޤަސްތުގައި މީހަކު މެރުމުގައި ބައިވެރިވުމުގެ ކުށުގެ ދައުވާއާއި، ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މާރާމާރީ ހިންގުމުގައި ބައިވެރިވުމުގެ ކުށުގެ ދައުވާއެވެ. މި ދެ ދައުވާއަށް ދިފާއުން ވަނީ އިންކާރު ކޮށްފައެވެ.

ޝަރަފުގެ ފަރާތުން ދައުވާއަށް އިންކާރު ކުރުމާއެކު، ދައުލަތުން ވަނީ ހެކި ހާމަކޮށްފައެވެ. އަދި ޝަރަފު ރަޝީދުގެ ވަކީލު ނިޝާން އިބްރާހިމް ވަނީ ދިފާއީ ހެކި ލިޔުމުން ހުށައެޅުމަށް ވަގުތު ބޭނުންވާކަމަށް ވިދާޅުވެފައެވެ. އެހެންނަމަވެސް މި މައްސަލައިގައި ހެކި ހާމަ ކުރެވޭ މިންވަރަށް އެކަށީގެންވާ ވަގުތު ދެވިފައިވާކަމަށް މައްސަލަ ބައްލަވާ ގާޒީ ވިދާޅުވިއެވެ. އެގޮތުން މި މައްސަލައިގެ އެންމެ ފަހުން އަޑުއެހުމެއް ބާއްވާފައިވަނީ 12 ޖެނުއަރީ 2022 ގައެވެ.

ގާޒީ ވަނީ ލިޔުމުން ހެކި ހުށައެޅުމަށް ދިފާއަށް 2 ދުވަހުގެ މުއްދަތެއް ދެއްވާފައެވެ. އަދި މިއީ މަދަނީ މިންގަނޑުން ކުރިއަށް ގެންދެވޭނެ ދައުވާއެއް ކަމަށް ކަނޑައަޅުއްވައި ގާޒީ ވަނީ ޝަރީއަތުގެ ކުރީގެ ހުށައެޅުންތަކަށް 15 ދުވަހުގެ މުއްދަތެއް ދެއްވާފައެވެ.

މުޙައްމަދު މާޒިން:

ދައުލަތުން ވަނީ މާޒިންގެ މައްޗަށްވެސް އެ ދެ ދައުވާ ކޮށްފައެވެ. އަދި ދެ ދައުވާއަށްވެސް މާޒިންގެ ފަރާތުން ވަނީ އިންކާރު ކޮށްފައެވެ. ވުމާއެކު، ދައުލަތުން ވަނީ ހެކި ހާމަކޮށްފައެވެ.

އޭގެ އިތުރުން، މާޒިންގެ ފަރާތުން ވަނީ ދައުވާއިން ދިފާއުވުމަށް 7 ހެއްކެއް ހުށައަޅުއްވާނެކަމަށް ވިދާޅުވެފައެވެ. ވުމާއެކު، އެ ހެކިން ހުށައެޅުމަށް 2 ދުވަހުގެ މުއްދަތެއް ދެއްވައި ގާޒީ ވަނީ މި ދައުވާތަކަކީ މަދަނީ މިންގަނޑުން ކުރިއަށް ގެންދެވޭނެ ދައުވާތަކެއް ކަމަށް ކަނޑައަޅުއްވައި، ޝަރީއަތުގެ ކުރީގެ ހުށައެޅުންތަކަށް 15 ދުވަހުގެ މުއްދަތެއް ދެއްވާފައެވެ.

ދެން މި މައްސަލައިގައި އޮންނާނީ ޝަރީއަތުގެ ކުރީގެ ހުށައެޅުންތައް ހުށައަޅައި، އެއާމެދު ވާހަކަ ދެއްކުމަށް ބާއްވާ އަޑުއެހުމެކެވެ. އެ އަޑުއެހުން އޮންނާނީ މެއި މަހުގެ 18 ވަނަ ދުވަހުގެ 13:00 ގައެވެ.

8 ފެބުރުވަރީ 2021 ދުވަހުގެ ރޭ ގއ. މާމެންދޫގައި، ހިންގި މާރާމާރީގައި، އުދައްޔުއާއި އޭނާގެ ބޭބެ ފިރުޝާން ޒާހިރުއަށް ޖިސްމާނީގޮތުން ބޮޑެތި އަނިޔާތަކެއް ލިބިފައިވެއެވެ. އެ ޒަޚަމްތަކަށް ފަރުވާ ދެމުން ދަނިކޮށް އުދައްޔު މަރުވެފައިވާއިރު، އޭނާ ވަޅުލާފައިވަނީ އިންޑިއާއަށް ފޮނުވައިގެން ޕޯސްޓްމޯޓަމް ހެދުމަށްފަހުއެވެ.