ޕީއެސްޖީގައި ކީލިއަން އެމްބާޕޭ ބެހެއްޓުމަށް އެކްލަބުން ކުރަމުން އަންނަ މަސައްކަތްތަކުގެ ތެރެއިން، އޭނާއަށް ޓީމުގެ ކެޕްޓަން ބޭންޑް ދީފާނެކަމަށް ރިޕޯޓުތައް ބުނެފިއެވެ.

ޕީއެސްޖީއާއެކު އެމްބާޕޭ ހަދާފައިވާ އެއްބަސްވުމުގެ މުއްދަތު ހަމަވާނީ މިއަންނަ ޖޫން މަހުގެ 30 ވަނަ ދުވަހުގެ ނިޔަލަށެވެ. ރިޕޯޓުތައް ބުނާ ގޮތުން ކޮންޓްރެކްޓް ހަމަވުމާއެކު ފްރީ ޓްރާންސްފާއެއްގައި އެމްބާޕޭ ރެއާލް މެޑްރިޑަށް ބަދަލުވުމަށް މިހާރު ވަނީ ނިންމާފައެވެ. އެހެންކަމުން އެމްބާޕޭ ރުއްސުމަށްޓަކައި ޕީއެސްޖީން އަންނަނީ ގިނަ މަސައްކަތްތަކެއް ކުރަމުންނެވެ.

ޕީއެސްޖީއިން ކުރަމުން އަންނަ މަސައްކަތްތަކުގެ ތެރެއިން އެންމެ ފަހު ކަމެއްގެ ގޮތުގައި އެމްބާޕޭއަށް ކެޕްޓަން ބޭންޑު ދިނުމަށް ކްލަބުގެ މެނޭޖުމެންޓުން މަޝްވަރާކޮށްފައި ވާކަމަށް ރިޕޯޓުތައް ބުނެއެވެ. ޕީއެސްޖީގެ އުންމީދަކީ ކެޕްޓަން ބޭންޑު ދީގެންވެސް އެމްބާޕޭ ޓީމުގައި މަޑު ކުރުވުމެވެ.

މިހާރު ޕީއެސްޖީގެ ކެޕްޓަންކަން ކުރަމުން އަންނަނީ މާކީނިއޯސްއެވެ. އޭނާ ޓީމުގެ ކެޕްޓަން ކަމާއި ހަވާލުވީ 2020 ވަނަ އަހަރުއެވެ. ނަމަވެސް ޗެމްޕިއަންސް ލީގުގައި ރެއާލް އަތުން ބަލިވެ، ޕީއެސްޖީއަށް މުބާރާތް ގެއްލުނު މެޗުގައި މާކީނިއޯސްގެ ފަރާތުން ފެނުނީ ދަށް ކުޅުމެކެވެ. އެހެންކަމުން ގިނަ ބައެއްގެ ފާޑުކިއުން ވަނީ އޭނާއަށް އަމާޒުވެފައެވެ.

އަނެއްކޮޅުން އެމްބާޕޭ އަންނަނީ ޓީމުގައި މޮޅު ކުޅުމެއް ދައްކަމުންނެވެ. ޚާއްސަކޮށް ބޮޑެތި މެޗުތަކުގައި ނަތީޖާ ނެރުމަށް އެމްބާޕޭގެ ދައުރު ވަރަށް މުހިންމެވެ.