ބަޔާން މޮޅުވިއިރު، 12 ކުޅުންތެރިން އެއްފަހަރާ ކުޅުނު

ޖަރުމަނު ބުންޑަސްލީގާގައި އެސްސީ ފްރެއިބާގް އާއި ބައްދަލުކުރި މެޗުން ބަޔާން މިއުނިކް މޮޅުވިއިރު، އެޓީމުން ވަނީ ކުޑަ އިރުކޮޅަކަށް 12 ކުޅުންތެރިން ދަނޑަށް އަރުވައިގެން ކުޅެފައެވެ.

ފްރެއިބާގްގެ ދަނޑުގައި ހޮނިހިރު ދުވަހު ކުޅުނު މި މެޗު ބަޔާންއިން ކާމިޔާބުކުރީ 4-1 ގެ ނަތީޖާއަކުންނެވެ. ފުރަތަމަ ހާފުގައި އެއްވެސް ޓީމަކަށް ލަނޑެއް ޖެހިފައި ނުވާއިރު ދެވަނަ ހާފުގައި ބަޔާންއަށް ލީޑު ނަގައިދިނީ ލިއޯން ގޮރެޓްޒްކާއެވެ. އޭގެ އިރުކޮޅެއް ފަހުން ފްރެއިބާގްއަށް ނަތީޖާ ހަމަހަމަ ކޮށްދިނީ ސާޖް ގިނާބްރީއެވެ. ބަޔާންއަށް އިތުރަށް ލީޑު ފުޅާ ކޮށްދިނީ ކިންގްސްލޭ ކޯމަންއެވެ.

ބަޔާންއިން 12 ކުޅުންތެރިން އެރުވީ މެޗުގެ 85 ވަނަ މިނެޓުގައެވެ. ބަޔާންއިން ދެ ބަދަލެއް އެވަގުތު ގެނައެވެ. ބަދަލު ކުޅުންތެރިންގެ ގޮތުގައި ކުޅެން އެރީ ނިކްލަސް ސުލޭ އާއި މާސެލް ސަބިޓްޒަރއެވެ. ނަމަވެސް ދަނޑުން ފައިބާފައިވަނީ ކޮރެންޓިން ޓޮލީސޯ އެކަންޏެވެ. ދެން ފައިބަން ހަމަޖެހިފައި އޮތީ ކޯމަންއެވެ. ނަމަވެސް ބަދަލު ރެފްރީއަށް އޮޅިގެން ނުބައި ނަންބަރެއް ދެއްކުމުން ކޯމަންއަށް ފައިބަން ނޭންގުނީ ކަމަށް ބަޔާންއިން ބުންޏެވެ.

މިކަން ރެފްރީއަށް އެނގުނީ ވީއޭއާރު މެދުވެރިކޮށް މެޗުގެ 87 ވަނަ މިނެޓުގައެވެ. އަދި މި މައްސަލަ އިތުރަށް ބެލުމަށް ގިނަ ވަގުތުތަކެއް ހޭދަކުރުމަށްފަހު މެޗުގެ ބާކީ ބައި ވަނީ ކުޅެފައެވެ. އިތުރު ވަގުތުގެ ގޮތުގައި 8 މިނެޓު ދެއްކިއިރު ބަދަލު ކުޅުންތެރިއެއްގެ ގޮތުގައި ކުޅެން ނުކުން މާސެލް ސަބިޓްޒާ ވަނީ އިތުރު ވަގުތުގެ 6 ވަނަ މިނެޓުގައި ލަނޑު ޖަހާފައެވެ.

މި މެޗުގައި 12 ކުޅުންތެރިން އަރުވައިގެން ބަޔާންއިން ކުޅުނު މައްސަލަ ބަލާނީ ޖަރުމަނުގެ ފުޓްބޯޅަ އެސޯސިއޭޝަނުންނެވެ. ބަޔާންގެ ނަތީޖާ ބަލައިނުގަނެ، ޓީމުން ޕޮއިންޓު އުނިކުރުމަކީވެސް އެކަށީގެންވާ ކަމެލެވެ.

ބަޔާންއިން މަސައްކަތް ކުރަމުން އަންނަނީ ޖެހިޖެހިގެން 10 ވަނަ ފަހަރަށް ލީގު ކާމިޔާބު ކުރުމަށެވެ. ފާއިތުވި 9 ސީޒަންގައިވެސް ބަޔާންއިން ވަނީ ބުންޑަސްލީގާ ކާމިޔާބު ކޮށްފައެވެ.