މަގު ބޭނުންކުރާ މީހުންނަށް ދަތިވާ ގޮތަށް ޕާކުކޮށްފައި ހުންނަ އުޅަނދުތައް ޓޯ ކުރުމަށް އިސްކަންދޭ ކަމަށް ފުލުހުން ބުނެފިއެވެ.
ރާއްޖެޓީވީގެ ފަސްކާފް ޕްރޮގްރާމްގައި ސަބް އިންސްޕެކްޓަރ އޮފް ޕޮލިސް ހުސެއިން އަސްލަހް ވިދާޅުވީ މަގުމައްޗަކީ އެންމެންގެ ތަނެއް ކަމަށާއި، މަގު އެންމެނަަށް ރައްކާތެރިވާންޖެހޭ ކަމަށެވެ. ނަމަވެސް ބައެއް ފަހަރު މަގުމަތިން ހިނގާ މީހުންނަށް އުދަނގޫވާ ގޮތަށް ޕާކުކޮށްފައި ހުންނަ ކަމަށް އޭނާ ވިދާޅުވިއެވެ.
އުޅަނދުތައް ޓޯ ކުރުމުގައި ބޮޑަށް ބަލާ ކަންކަމަށް އިޝާރާތް ކުރައްވައި އަސްލަހް ވިދާޅުވީ މަގުގެ ކަންމަތީގައި ޕާކު ކޮށްފައި ހުރުމާއި، ޕޭމަންޓު މަތީގައި ޕާކު ކުރުމާއި، ޒިބްރާ ކްރޮސްމަތީގައި ޕާކު ކުރުމާއި، ސްކޫތަކުގެ ގޭޓް ދޮރުމަތީގައި ޕާކު ކުރުމާއި، އާއްމު ޚިދުމަތް ހޯދާ ސަރަހައްދުތަކުގައި އެތަނަށް ދާ މީހުންނަށް އުދަނގޫވާ ގޮތަށް ޕާކު ކުރުން އަދި ބާރު ސްޕީޑްގައި ދުއްވާ މަގުތަކުގައި އެއްފަޅީގައި ޕާކު ކުރާ އުޅަނދުތައް ޓޯ ކުރާ ކަމަށެވެ.
މީގެ އިތުރުން އަސްލަހް ވިދާޅުވީ ގަވާއިދަށް މިގެނެވުނު ބަދަލާއެކު، ޓޯ ކުރާ އުޅަނދު ދޫކުރާނީ 48 ގަޑިއިރު ފަހުން ފައިސާ ދެއްކުމުން ކަމަށެވެ. އަދި 48 ގަޑިއިރު ހަމަވުމަށްފަހު ވެސް އެއުޅަނދެއް ބަލައި ނާންނަ ކަމަށްވާނަމަ 7 ދުވަސް ތެރޭގައި އެ އުޅަނދެއް ފުލުހުންގެ ބެލުމުގެ ދަށުގައި ހުރިކަން އަންގައި އިއުލާން ކުރާނެ ކަމަށެވެ. އޭގެފަހުން ވެސް ވެހިކަލް ނުގެންދާނަމަ އަލުން އިއުލާންކޮށް، 60 ދުވަހުގެ މުއްދަތެއް ދެވޭ ކަމަށާއި، 60 ދުވަސް ހަމަވުމުން އުސޫލުގެ ތެރެއިން އެ އުޅަނދެއް ނައްތާލާނެ ކަމަށް އަސްލަހް ވިދާޅުވިއެވެ.
ދެން ހަމައެއާއެކު ބާރު ސްޕީޑްގައި ދުށްވަން މިއޮންނަ މަގުތައް އަޅުގަނޑުމެން ބަލަން ހިނގާ ރިންގްރޯޑް. ރިންގްރޯޑް ބޭރުމަތީގައި ވަށައިގެން ހަމަ ޕާކުކުރުން މަނާ ލައިން ދަމާފައި. ދެން އެތަނަކީ އަޅުގަނޑު ކުރިން ފާހަގަކުރިހެން ޕަބްލިކް ޓްރާސްޕޯޓާއި އަދި ހުޅުމާލެއަށް ދަތުރުކުރާ ހުރިހާ ފަރާތްތަކުން މި ބޭނުންކުރަނީ އެ ރިންގްރޯޑް. އެފަދަ މަގުތަކުގައި ޕާކުކޮށްފައި ހުންނަ ވެހިކަލްތައް އަޅުގަނޑުމެން ނަގައިގެން މިގެންދަނީ. ދެން އެހެންނަމަވެސް މިހާރު އަޅުގަނޑުމެން މިތަންތަން ފާހަގަކުރި ނަމަވެސް ގަވާއިދުގައި ބަޔާންކޮށްފައިވޭ ގަވާއިދާ ހިލާފަށް ޕާކު ކޮށްފައި އޮންނަ ކޮންމެ އުޅަނދެއް ނަގައިގެން ގެންދާނެ ކަމަށް. އެހެންނަމަވެސް ޕާކު ކުރާނެ އެކަށީގެންވާ ޖާގަ ނެތީމަ އަޅުގަނޑުމެން މިބަލަނީ ވީހާވެސް ބޮޑަށް މީހުންނަށް ދަތިވާ ގޮތަށް ޕާކުކޮށްފައި ހުންނަ އުޅަނދުތައް ނެގުމަށް. ކުރިން ވެސް ފާހަގަކުހެން ޕާމަންޓްގެ މީހުން އަރައި ފައިބަން އޮންނަ ސަރަހައްދުގައި ޕާކުކޮށްފައި ހުންނަ އުޅަނދުތަކާއި މިފަދަ އުޅަނދުތައް ނަގައިގެން އަޅުގަނޑުމެން ގެންދަނީސަބް އިންސްޕެކްޓަރ އޮފް ޕޮލިސް ހުސެއިން އަސްލަހް
މަލޭސިޓީގެ މަގުތަކުގެ ރައްކާތެރިކަން އިތުރު ކުރުމަށް ފުލުހުން ޚާއްސަ މަސައްކަތްތަކެއް ސެޕްޓެންބަރު މަހުގެ ކުރީކޮޅު ފަށާފައިވަނީ ކުށްތައް އިތުރުވެ، ނުރައްކާތެރި އެކްސިޑެންޓްތައް ހިނގާ މީހުން މަރުވުމުގެ ހިތާމަވެރި ހާދިސާތައް ކައިރި ކައިރީގައި ހިނގާފައިވާތީއެވެ.
މިހާރު އެކްސިޑެންޓްތައް މަދުވެފައިވާކަން ފުލުހުން ފާހަގަކޮށްފައިވާއިރު، މިދިޔަ ސެޕްޓެމްބަރު މަހުގެ 12 ވަނަ ދުވަހުން ފެށިގެން 30 ވަނަ ދުވަހާ ހަމައަށް މަގުމަތީގެ ސަލާމަތާއި ރައްކާތެރިކަން ކަށަވަރު ކުރުމަށް ފުލުހުންކުރި މަސައްކަތުގެ ތަފާސްހިސާބުތައް ދައްކާ ގޮތުން ހުޅުމާލޭގެ 1266 ކާރު، 5427 ސައިކަލު ހުއްޓުވައި ބަލައިފާސްކޮށްފައިވެއެވެ. 88 ކާރަށް ފިޔަވަޅު އަޅާފައިވާއިރު، 394 ސައިކަލަށް ފިޔަވަޅު އަޅާފައިވެއެވެ.
މީގެ އިތުރުން ލައިސަންސް ނެތި ދުއްވައިގެން 10 ކާރު، 102 ސައިކަލު ހުއްޓުވާފައިވެއެވެ. 85 ކާރު، 430 ސައިކަލު ހުއްޓުވައި ނަސޭހަތް ދީފައިވެއެވެ. ނުރައްކާތެރިކޮށް ދުއްވައިގެން 3 ކާރު، 40 ސައިކަލު ހުއްޓުވާފައިވެއެވެ. ޓްރެފިކް ވައިލޭޓްވެގެން 34 ކާރު ހިފަހައްޓާފައިވާއިރު، 148 ސައިކަލު ހިފަހައްޓާފައިވެއެވެ. އަދި 20 ސައިކަލު ޓޯ ކޮށްފައިވާ ކަމަށް ތަފާސްހިސާބުތަކުން ދައްކައެވެ.
