މަލްޓީ ސްޓޯރީ ޕާރކިން ބިލްޑިންތައް އަޅާ ފީއެއް ނަގައިގެން ޕާކިން ބިލްޑިންތައް އޮޕަރޭޓްކުރަނީ

މަލްޓީ ސްޓޯރީ ޕާރކިން ބިލްޑިންތައް އަޅާ ފީއެއް ނަގައި، ޕާކިން ބިލްޑިންތައް އޮޕަރޭޓްކުރަން ޖެހޭކަމަށް ސަރުކާރުން ބުނެފިއެވެ.

ސަރުކާރުން އެފަދައިން ބުނެފައި ވަނީ މާލޭގެ މަގުތައް އަމާންތަނަކަށް ހެދުމުގެ މަގުސަދުގައި ސަރުކާރުން ފަށައިގެން އުޅޭ "މާލެ ފަހި" ޕްރޮގްރާމުގެ ތަފްސީލްތައް ހާމަކޮށް އާއްމުކުރި މައުލޫމާތު ފޮތުގައެވެ.

މަލްޓީ ސްޓޯރީ ޕާރކިން ބިލްޑިންތައް އެޅުމަށް ފަހު ޕާކް ކުރާނެ ޖާގަ ނެތި ހުޅުމާލޭގެ ހުރިހާ މަގެއްގައި އުޅަނދުތައް ޕާކްކުރަމުންދާ ކަމަށް ވަނީ ބުނެފައެވެ. އެކަމުގެ ސަބަބުން މަގުމަތީގައި ރައްކާތެރިކަމާއި އެކީ ހިނގާ އުޅުމާއި އުޅަނދު ދުއްވުން ވަނީ ދަތިވެފައި ކަމަށް ވެސް ވަނީ ބުނެފައެވެ. ހާލަތު ގޯސްވެފައިވާ މިންވަރު ހާމަކޮށްދިނުމުގެ ގޮތުން އެ ފޮތުގައި ބުނެފައި ވަނީ ޕާރކްކުރުމުގެ މައްސަލަ ބޮޑުވެ ޕާރކިން ގަވައިދު ތަންފީޒުކުރަން ވެސް ގޮންޖެހުންތަކާއި ދިމާވެފައިވާ ކަމަށެވެ. މަލްޓި ސްޓޯރީ ޕާކީން ބިލްޑިން އެއް އަޅަން ނިންމީ އެ ސަބަބާއި ހުރެ ކަމަށް އެ ފޮތުގައި ވަނީ ބުނެފައެވެ.

މީގެ އިތުރުން ސްކްރޭޕް ޔަރޑް ހިންގުމަށް ވަކި ސަހަރައްދެއް، ނުވަތަ ބިމެއް މިހާތަނަށް ކަނޑައެޅިފައި ނުވާތީ މާލެ ސަރަހައްދުގައި އާއްމު ރައްޔިތުން ދިރިއުޅޭ ތަންތަނުގައި މިކަންކަން ކުރަމުން ގެންދާކަން ފާހަގަކުރެވޭ ކަމަށް ޓްރާންސްޕޯޓް މިނިސްޓްރީން ވަނީ ބުނެފައެވެ. އަދި ޓޯވ ކުރާ އުޅަނދުތަކާއި އެކި ސަބަބުތަކާއި ގުޅިގެން ރަޖިސްޓްރީ ބާތިލްކޮށް އުޅަނދުގެ ވެރިފަރާތުން ނައްތާލަން ބޭނުންވާ އުޅަނދުތައް ނައްތާލެވޭނެ އުސޫލެއް ވެސް އިންތިޒާމެއް ވެސް އަދި ނެތްކަން އެ މިނިސްޓްރީން ފާހަގަކުރެއެވެ. އެހެންކަމުން އެކަމާއި ގުޅޭ ގޮތުން ޤަވައިދެއް އެކުލަވާލުމަށް ފަހު އެ މަސައްކަތްކުރުމަށްޓަކާ ބީލަމުގެ އުސޫލުން ބިން ދޫކުރުމަށް ހުޅުވާލުމަށް ނިންމާފައިވާކަމަށް އެ މިނިސްޓްރީން ވަނީ ބުނެފައެވެ.