ޓީވީ މޯލްޑިވްސް ގާއިމު ކުރުމުގެ ބޮޑުމަޝްރޫޢު

ދިވެހިރާއްޖޭގެ ކުލަތަކުގެ ޓެލެވިޒަން ސްޓޭޝަން (ޓީވީ މޯލްޑިވްސް) ގާއިމު ކުރުމަށް ހިންގުނު ބޮޑުމަޝްރޫޢަކީ ސީދާ ރައީސުލްޖުމުހޫރިއްޔާ ސުމުއްވުލްއަމީރު އިބްރާހީމް ނާޞިރު ރަންނަބަނޑޭރި ކިލެގެފާނުގެ ނިޝާން ޣާޒީގެ ޢިއްޒަތްތެރި ވެރިޔާގެ ޚާއްޞަ ބެއްލެވުމުގެ ދަށުން ރައީސުލްޖުމުހޫރިއްޔާގެ އޮފީހުގެ ތެރޭގައި ފެށުނު ބޮޑުމަޝްރޫޢެކެވެ.

ރައީސުލްޖުމުހޫރިއްޔާގެ ޚާއްޞަ ބެއްލެވުމުގެ ދަށުން މިބޮޑުމަޝްރޫޢުގެ އިދާރީ މަސައްކަތް ކުރެއްވީ ރައީސުލްޖުމުހޫރިއްޔާގެ އޮފީހުގެ ސެކްރެޓަރީއެއް ކަމުގައިވާ މ. އިރުދޭމާގެ ނަސީމާ މޫސާއެވެ.

ޓީވީ މޯލްޑިވްސް ގާއިމު ކުރުމުގެ ބޮޑުމަޝްރޫޢަކީ ޖަޕާނު ސަރުކާރުގެ އެހީގައި ހިންގުނު ބޮޑުމަޝްރޫއެކެވެ. މިމަޝްރޫޢަށް ބޭރުގެ އެހީ ހޯއްދެވުމުގައި ރައީސުލްޖުމުހޫރިއްޔާގެ ނައިބު އޮނަރަބްލް ޢަލީ ޢުމަރު މަނިކު މުހިންމު ދައުރެއް އަދާކުރެއްވިއެވެ.

ރައީސުލްޖުމުހޫރިއްޔާ ސުމުއްވުލްއަމީރު އިބްރާހީމް ނާޞިރު ރަންނަބަނޑޭރި ކިލެގެފާނުގެ ނިޝާން ޣާޒީގެ ޢިއްޒަތްތެރި ވެރިޔާ، ޓެލެވިޒަން މޯލްޑިވްސް (TVM) އިދާރީގޮތުން އުފެއްދެވީ 6 ޖަނަވަރީ 1977ގައެވެ. އެއީ ޑިޕާޓްމަންޓް އޮފް އިންފޮމޭޝަން އެންޑް ބްރޯޑްކާސްޓިންގގެ ދަށުން ހިނގާ އޮފީހެއްގެ ގޮތުގައެވެ.

އެއިރު ޑިޕާޓްމަންޓް އޮފް އިންފޮމޭޝަން އެންޑް ބްރޯޑްކާސްޓިންގެ ޑިރެކްޓަރަކީ އަންނަބީލާ ޢާއިޝަތު އިބްރާހީމް ދީދީއެވެ. ވީމާ، ޓީވީ މޯލްޑިވްސްގެ ފުރަތަމަ އިސްވެރިޔަކީ އެކަމަނާއެވެ. ޓީވީ މޯލްޑިވްސްގެ ފުރަތަމަ ވެރިޔަކީ އެސިސްޓެންޓް ޑިރެކްޓަރ ނަސީމާ މޫސާއެވެ.

1976 އިން 1978 އަށް, ޓީވީ މޯލްޑިވްސް ގާއިމު ކުރުމުގެ ބޮުޑުމަޝްރޫޢުގެ ދަށުން، ޓީވީ މޯލްޑިވްސް ގާއިމުކުރެވުނީ މާލޭ ގަލޮޅު ފަޅުތެރެއިން ހިއްކުނު ޚާއްޟަ ކޮށްޓެއްގައެވެ. (މިހާރު ބުރުޒުމަގާއި އަމީނީމަގާދެމެދުގައިވާ ހަތަރުފަރާތުން މަގުހިމެނޭ ކޮށްޓެކެވެ.)

ޓެކުނިކަލް އާލާތްތަކާއި އެއިރު މާލޭގެ އެންމެ ދިގު އެންޓަނާއާއެކު ގިނަ ޓެކްނިކަލް ނުވަތަ އިންޖިނޭރިންގެ ކަންކަން ކުރެވި އަދި ދެބުރި އިމާރާތެއް އެކޮށީގެ ތެރޭގައި މިބޮޑު މަޝްރޫއުގެ ދަށުން ބިނާކުރެވުނެވެ. އެއީ އެއިރަށް ބަލާއިރު ވަރަށް ބޮޑެތި މަސައްކަތްތަކެކެވެ.

މިބޮޑު މަޝްރޫޢުގެ އިންޖިނޭރިންގެ މަސައްކަތްތައް ކުރެއްވީ ޖަޕާނުގެ ޢިލްމީ ޢަމަލީ ތަޖުރިބާކާރު މާހިރުންނެވެ. ދިވެހީންގެ ތެރެއިން މިބޮޑު މަޝްރޫޢުގެ އިންޖީނިއަރިންގެ ކަންކަމުގައި ޢަމަލީގޮތުން އިސްވެހުންނެވީ ސަރުކާރުގެ އިސް އިންޖިނޭރު ހ. ހިކަރި އަޙްމަދު އާދަމެވެ.

ޓީވީ މޯލްޑިވްސްގެ ޚިދުމަތް ފެށުނީ 29 މާރޗު 1978 ގައި، ގައުމީ މިނިވަންދުވަހުގެ ރަސްމީ އިޙުތިފާލުތަކުގެ ތެރެއިން އެދުވަހުގެ ރޭގަނޑު ބޭއްވުނު ޚާއްޞަ އިހުތިފާލެއްގައެވެ. މިޚިދުމަތް އިފުތިތާހުކޮށްދެއްވީ އޮނަރަބްލް އިބްރާހީމް ޝިހާބެވެ.

ރޭގަނޑު 9 ޖެހިއިރު ރާއްޖޭގެ ޓީވީގެ ފުރަތަމަ މަންޒަރަކަށް ފެނުނީ ދިވެހިރާއްޖޭގެ ޤައުމީ ދިދައެވެ.

މި އިހުތިފާލްގަައި، ޓީވީ މޯލްޑިވްސް ގާއިމު ކުރުމުގެ ބޮޑުމަޝްރޫޢު (1976 - 1978)ގެ އިންޖިނޭރިންގެ މަސައްކަތްތައް ކުރެއްވީ ޖަޕާނުގެ ޢިލްމީ ޢަމަލީ ތަޖުރިބާކާރު މާހިރުންނާއި، ދިވެހީންގެ ތެރެއިން މިބޮޑު މަޝްރޫޢުގެ އިންޖީނިއަރިންެގެ ކަންކަމުގައި ޢަމަލީގޮތުން އިސްވެހުންނެވީ ސަރުކާރުގެ އިސް އިންޖިނޭރު ހ. ހިކަރި އަޙްމަދު އާދަމު ބައިވެރިވެވަޑައިގަތެވެ.

ޓީވީ މޯލްޑިވްސްގެ އިސްވެރިޔާ އަންނަބީލާ ޢާއިޝަތު އިބްރާހީމް ދީދީއާއި، ޓީވީ މޯލްޑިވްސްގެ ފުރަތަމަ ވެރިޔާ ނަސީމާ މޫސާ މި އިހުތިފާލުގައި ބައިވެރިވެވަޑައިގެން ރަސްމީ މަސައްކަތްޕުޅުތައް ކުރިޔަށް ގެންދެވިއެވެ.

އަދި އެއިރުގެ ނޫސްވެރިންވެސް އިހުތިފާލުގައި ބައިވެރިވިއެވެ.