މާލޭގައި ފުލުހުން ހިންގި ކައުންޓާ ނާކޮޓިކްސް އޮޕަރޭޝަނެއްގައި ގިނަ އަދަދެއްގެ ޑްރަގާ އެކީ ހެޔަންބޯ ފަދަ މަގުބޫލު ޕްރޮގުރާމުތައް ހުށަހަޅައިދޭ ޓީވީއެމްގެ މަޝްހޫރު ޕްރެޒެންޓަރު އިނާޔަތު އަލީ (އިނާ) އާއި އެހެން ދެ މީހަކު ހައްޔަރުކޮށްފި އެވެ.

ފުލުހުން ބުނީ މި ތިން މީހުން ހައްޔަރުކުރީ މަސްތުވާތަކެތި ބޭނުންކޮށް އެ ތަކެތީގެ ވިޔަފާރިކުރާކަމަށް ތުހުމަތު ކުރެވޭ މައްސަލައިގައި މާލެއިން ކަމަށެވެ.

ފުލުހުން އާންމުކުރި މައުލޫމާތުގައިވާ ގޮތުގައި މި އޮޕަރޭޝަން ހިންގީ ބުރާސްފަތި ދުވަހުގެ ރޭގަނޑުގެ ވަގުތެއްގަ އެވެ. މި އޮޕަރޭޝަނުގައި މާލޭގެ ދެ ގެއެއް ބަލައިފާސްކޮށް، މަސްތުވާތަކެތި ކަމަށް ބެލެވޭ އެއްޗެއްހުރި ބިޑިއަކާއި ރަބަރު ޕެކެޓުތަކެއް ފެނިފައިވާ ކަމަށް ފުލުހުން ބުންޏެވެ.

އަތުލައިގަތް މަސްތުވާތަކެތީގެ ވަގުތީ ބަރުދަނަކީ 1246 ގުރާމްކަމަށް ފުލުހުން ބުންޏެވެ. ނަމަވެސް އެއީ ކޮން ބާވަތެއްގެ ޑްރަގެއް ކަމެއް ފުލުހުން ނުބުނެ އެވެ.

މި މައްސަލައިގައި އިނާގެ އިތުރުން ހައްޔަރުކުރީ މއ. މަޒާގޭ މުހައްމަދު އައިޝް އަހުމަދު (34އ) އާއި އައިމިނަތު އިއްލިއްޔީން އަހުމަދު (25އ) އެވެ.

މި މައްސަލައާ ގުޅިގެން މި ތިން މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން މުޙައްމަދު އައިޝް އަޙްމަދު 10 ދުވަހަށް އަދި އާމިނަތު އިލްޔީން އަޙްމަދާއި އިނާޔަތު ޢަލީ ހަތް ދުވަހަށް ބަންދުގައި ބެހެއްޓުމަށް ވަނީ އަމުރުކޮށްފައިވާ ކަމަށް ފުލުހުން ބުންޏެވެ.

އިނާގެ ބަންދު އަމުރުގައި އޮތް ގޮތުގައި އޭނާ ހައްޔަރުކުރީ އޭނާ ދިރިއުޅޭ ގެއިންނެވެ. ކޯޓު އަމުރުތަކުގައި ހުރި މައުލޫމާތުން ބެލެވެނީ، މި ގޭގައި އިނާ ދިރިއުޅެމުން ދިޔައީ އިއްލިއްޔީންއާ އެކީ ކަމަށެވެ. ސަބަބަކީ، އިލްޔީން ހައްޔަރުކުރި ބަންދު އަމުރުގައި ވަނީ ޑްރަގުތައް ފެނުނީ އޭނާ މިހާރު ދިރިއުޅެމުންދާ ކަމަށް ފުލުހުންނަށް މައުލޫމާތު ލިބިފައިވާ ތަނުން ކަމަށް އައިއޯ ފާހަގަކުރުމުންނެވެ.

ޑްރަގުތަކާއި ބިޑި ވެސް ފެނުނީ އިނާ ދިރިއުޅެމުން ދިޔަ އެޕާޓުމަންޓުންނެވެ. އަދި އޭނާގެ ކުޑަކަމުދާ ތަކެތި މަސްތުވާތަކެއްޗަށް ޕޮޒިޓިވް ކަމަށާއި، ޑްރަގުތައް ފެނުނު ތަނުން އިނާގެ އައިޑީ ކާޑު ފެނުނު ކަމަށް ވެސް ފުލުހުން ކޯޓުގައި ބުންޏެވެ.

މި މައްސަލަ ފުލުހުން ގެންދަނީ ތަހުގީގު ކުރަމުންނެވެ.