ކަނޑު ފަޅުތަކާއި، ކަނޑުގެ ޤުދުރަތީ ވަސީލަތްތަކާ ގުޅޭ ދިރާސާތައް ކުރުމަށް މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ އިން ދޫކުރާ ހުއްދައަށް އެދުމުގެ ކަންކަން ލުއިފަސޭހަ ކޮށްދިނުމަށްޓަކައި އޮންލައިން ޕޯޓަލްއެއް ތައްޔާރުކޮށްފިއެވެ.

މިނިސްޓްރީން ބުނީ marineresearchpermit.egov.mv ގެ ނަމުގައި ތައްޔާރުކޮށްފައިވާ މި ޕޯޓަލް އަކީ ދިވެހިރާއްޖޭގެ ކަނޑުގެ ސަރަޙައްދުގެ ތެރޭގައި ކަނޑާއި ކަނޑުގެ ޤުދުރަތީ ވަސީލަތްތަކުގެ ދިރާސާ ކުރުމާ ބެހޭ ގަވާއިދުގެ ތަރަހައިގެ ތެރޭގައި ހިމެނޭ ދިރާސާތައް ކުރުމުގެ ހުއްދައަށް އެދުމާއި، ހުއްދަ ދޫކުރުން އަދި ހުއްދަ އައުކުރުމާއި ގުޅިގެން ހިނގާ އެންމެހާ އިދާރީ މުޢާމަލާތްތަކާ ގުޅޭ ކަންކަން އެއް ތަނަކުން ކުރިއަށް ގެންދިއުމަށްޓަކައި ފަރުމާކޮށްފައިވާ ޕޯޓަލްއެއް ކަމަށެވެ.

މި ޕޯޓަލް ގެ މަގުސަދަކީ ދިވެހިރާއްޖޭގެ އިތުރުން، ދުނިޔޭގެ އެކި ކަންކޮޅުތަކަށް ނިސްބަތްވާ ޔުނިވަރސިޓީތަކުންނާއި، ޖަމުޢިއްޔާ ޖަމާޢަތްތަކުން ދިވެހިރާއްޖޭގެ ކަނޑުގެ ވެށީގެ ދިރާސާ ކުރުމަށް އިތުރަށް މަގުފަހިކޮށްދިނުމެވެ.

މީގެ އިތުރުން، މި ޕޯޓަލް އިން އެކި އެކި ދިރާސާތައް ކުރަމުންދާ ސަރަހައްދުތަކާއި، ދިރާސާއާ ގުޅޭ ޚުލާސާ މަޢުލޫމާތު ހިމެނޭ ޗާޓެއް ފެންނަން ހުންނާނެ ކަމަށާއި މިނިސްޓްރީގެ އަމާޒަކީ މެރިން ރިސަރޗް ޕަރމިޓް ޕޯޓަލް ތަޢާރުފުކުރުމާ ގުޅިގެން ކަނޑުގެ ވެއްޓާބެހޭ ގޮތުން ކުރާ ތަހުލީލުތަކާއި ދިރާސާތައް އިތުރުވެ، މި މުހިންމު ވަސީލަތާ ބެހޭގޮތުން ހޯދޭ މަޢުލޫމާތާއި ޢިލްމް އިތުރަށް މުއްސަނދިވެ، މުޖުތަމަޢުގައި ކަނޑާއި، ކަނޑުގެ ދިރުންތަކާމެދު އޮންނަ ހޭލުންތެރިކަން އިތުރުވެގެން ދިއުމެވެ. މިޕޯޓަލް ތައްޔާރުކޮށްފައި ވަނީ ދިވެހި ސަރުކާރާއި އިންޓަނޭޝަނަލް ޔޫނިއަން ފޮރ ކޮންޒަވޭޝަން އޮފް ނޭޗަރ (އައި.ޔޫ.ސީ.އެން.) ގުޅިގެން ތަންފީޒުކުރަމުންދާ "ރީޖެނަރޭޓް" މަޝްރޫޢުގެ ތެރެއިންނެވެ. ރީޖެނަރޭޓް އަކީ ޔުނައިޓަޑް ސްޓޭޓްސް އެޖެންސީ ފޮރ އިންޓަރނޭޝަނަލް ޑިވެލޮޕްމަންޓް (ޔޫ.އެސް.އޭ.އައި.ޑީ) ގެ ދީލަތި އެހީއާއެކު ހިންގާ މަޝްރޫޢުއެކެވެ.