މިދިޔަ އަހަރު ރާއްޖެއިން ޖުމްލަ 76099.8 މެޓްރިކް ޓަނުގެ މަސް ބޭރުކުރި
2021 ވަނަ އަހަރު މަސް ބޭރުކުރި މިންވަރު 2021 ވަނަ އަހަރަށްވުރެ %1 ދަށް
މަސްވެރިން
މިދިޔަ އަހަރު ރާއްޖެއިން ޖުމްލަ 76099.8 މެޓްރިކް ޓަނުގެ މަސް ބޭރުކޮށްފައިވާކަމަށް މޯލްޑިވް މަނިޓަރީ އޮތޯރިޓީ (އެމް.އެމް.އޭ)އިން ހާމަކޮށްފިއެވެ.
އެމް.އެމް.އޭއިން ހާމަކޮށްފައިވާ އެ އިދާރާގެ ތަފާސްހިސާބުތަކުން ދައްކާގޮތުން, ފާއިތުވި އަހަރު ރާއްޖެއިން 76099.8 މެޓްރިކް ޓަނުގެ މަސް ބޭރުކޮށްފައިވެއެވެ. އެ އަދަދަކީ 2021 ވަނަ އަހަރު ރާއްޖެއިން ބޭރުކުރި މަހުގެ ނިސްބަތަށް ބަލާނަމަ %1 ދަށް އަދަދެކެވެ. 2021 ވަނަ އަހަރު ރާއްޖެއިން ބޭރުކޮށްފައި ވަނީ 76890.8 މެޓްރިކް ޓަނުގެ މަހެވެ.
މީގެ އިތުރުން އެމް.އެމް.އޭގެ ތަފާސްހިސާބުގައިވާ ވާގޮތުން، މިދިޔަ އަހަރު އެންމެ ގިނަ އަދަދަށް މަސް ބޭރުކޮށްފައި ވަނީ ނިމިދިޔަ ޑިސެންބަރު މަހުގެ ތެރޭގައެވެ. މިދިޔަ ޑިސެންބަރު މަހު ރާއްޖެއިން 10734.3 މެޓްރިކް ޓަނުގެ މަސް ވަނީ ބޭރުކޮށްފައިވެއެވެެ. މިއަދަދަކީ 2021 ވަނަ އަހަރުގެ ޑިސެންބަރު މަހު ރާއްޖެއިން ބޭރުކުރި 6376.9 މެޓްރިކް ޓަނުގެ މަހާއި އަޅާއިބަލާއިރު %68.3 އިތުރު އަދަދެއްކަން ފާހަގަކޮށްލެވެއެވެ. އަދި ޑިސެންބަރު މަހު ރާއްޖެއިން ބޭރުކުރި މަހުގެ އަދަދު އިތުރުވާން މެދުވެރިވީ އެ މަހު ރާއްޖެއިން ބޭރުކުރި ގަނޑުކުރި މަހުގެ އަދަދު އިތުރުވުމާގުޅިގެންނެވެ. އެގޮތުން، ޑިސެންބަރު މަހު 9967.8 މެޓެރިކް ޓަނުގެ ގަނޑުކުރި މަސް ވަނީ ބޭރުކޮށްފައެވެ.
މީގެ އިތުރުން އެމްއެމްއޭގެ ތަފާސް ހިސާބުތަކުން އެނގޭގޮތުން، މިދިޔަ އަހަރު އެންމެ ގިނަ އަދަދަކަށް ބޭރުކޮށްފައިވަނީ ގަނޑުކޮށްފައިވާ މަހުގެ ބާވަތްތަތެކެވެ. އެގޮތުން ބަލާއިރު ނިމިދިޔަ އަހަރު ރާއްޖެއިން ގަނޑުކޮށްގެން 65,576.3 މެޓްރިކް ޓަނުގެ މަސް ބޭރުކޮށްފައިވެއެވެ. އޭގެތެރެއިން 55551.2 މެޓްރިކް ޓަނުގެ މަހަކީ ކަޅުބިލަމަހުގެ ބާވަތްތަތެކެވެ. އަދި 9529.5 މެޓްރިކް ޓަނަކީ ގަނޑުކުރި ރީނދޫ އުރަހަ ކަންނެލީގެ ބާވަތްތަކެވެ.
އެމްއެއެމްއޭގެ ތަފާސްހިސާބުތަކުން އެނގޭގޮތުގައި 2022 ވަނަ އަހަރު ރާއްޖެއިން ބޭރުކުރި ދަޅުމަހުގެ އަދަދު 2021 ވަނަ އަހަރާ އަޅައިބަލާއިރު ވަނީ އިތުރުވެފައެވެ. އެގޮތުން ބަލާއިރު ރާއްޖެއިން ބޭރުކޮށްފައިވަނީ 8439.6 މެޓްރިކް ޓަނުގެ ދަޅުމަހެވެ. 2021 ވަނަ އަހަރު ރާއްޖެއިން ބޭރުކޮށްފައިވަނީ 7861.2 މެޓްރިކް ޓަނުގެ ދަޅުމަހެވެ. އެހެންކަމުން 2022 ވަނަ އަހަރު ރާއްޖެއިން ދަޅުމަސް ބޭރުކުރި އަދަދަކީ އޭގެ ކުރީ އަހަރާއި އަޅާކިޔާނަމަ %7.35 އިތުރު އަދަދެކެވެ.
އެމް.އެމް.އޭގެ ރިޕޯޓުން އެނގޭ ގޮތުގައި ނިމިދިޔަ އަހަރު މަސް ކުންފުނިތަކުން މަސް ގަނެފައިވާ މިންވަރު 2021 ވަނަ އަހަރަށްވުރެ ވަނީ ދަށްވެފައެވެ. އެ ތަފާސްހިސާބުތަކުގައި ވާގޮތުން މިދިޔަ އަހަރު މަސް ކުންފުނިތަކުން 81033.4 މެޓްރިކް ޓަނުގެ މަސް ގަނެފައިވެއެވެ. މިއީ 2021 ވަނަ އަހަރު މަސް ކުންފުނިތަކުން މަސް ގަނެފައިވާ މިންވަރާ އަޅައިބަލާއިރު %8.2 ދަށް އަދަދެއްކަން ފާހަގަކޮށްލެވެއެވެ. އެ އަދަދު ދަށްވާން މެދުވެރިވި މައިގަނޑު ސަބަބުތަކަކީ އެ މުއްދަތުގައި ރީނދޫ އުރަހަ ކަންނެލި ގަނެފައިވާ މިންވަރު %23 ދަށްވުންކަން ފާހަގަކޮށްލެވެއެެވެ. ހަމައެހެންމެ ކަޅުބިލަމަސް ގަނެފައިވާ މިންވަރުވެސް %3.6 ދަށްވުންކަމަށް ތަފާސްހިސާބުތަކުން އެނގެއެވެ.
މިފްކޯއިން މީގެ ކުރިން ހާމަކޮށްފައިވާ ގޮތުގައި 2022 ވަނަ އަހަރަކީ މިފްކޯއިން އެންމެ ގިނައިން މަސްކިރައި އެންމެ ގިނަ އަދަދަކަށް މަސްވެރިންނަށް ފައިސާ ދޫކުރި އަހަރެވެ. އެހެންކަމަށް ވާއިރު މިފްކޯގެ ތަފާސްހިސާބުތަކުން އެނގޭގޮތުގައި 2022 ވަނަ އަހަރުގެ ތެރޭގައި މިފްކޯއިން ވަނީ މަސްވެރިންގެ އަތުން 63،579 މެޓްރިކް ޓަނުގެ މަސް ގަނެފައެވެ.
