މަގުތަކުގެ ޓްރެފިކް ކޮންޓްރޯލްކުރަން ކޮންމެ މަގެއްގައި ފުލުހުން ބޭތިއްބުމަކީ އެންމެ ރަނގަޅު ހައްލެއް ނޫން ކަމަށް މޯލްޑިވްސް ޕޮލިސް ސަރވިސްއިން ބުނެފިއެވެ.
ރާއްޖެޓީވީގެ ފަށާއިރު ޕްރޮގްރާމުގައި ބައިވެރިވެވަޑައިގެން ވާހަކަދައްކަވަމުން ޗީފް އިންސްޕެކްޓަރ އޮފް ޕޮލިސް އަހުމަދު ފަސީހު ވިދާޅުވީ މާލޭގެ މަގުތައް ބަލަހައްޓަން ދާއިމީ ގޮތެއްގައި ފުލުހުން އެތަންތަނުގައި ބޭތިއްބުމަކީ އޭގެ ޚަރަދަށް ބެލިޔަސް ވަރަށް ބޮޑު ކަމެއް ކަމަށެވެ. ޓްރެފިކް ލައިޓެއް ޖަހައިގެން ޓްރެފިކް ކޮންޓްރޯލް ކުރުމަށް ދާ ޚަރަދަށްވުރެ އެތައް ގުނައެއް ބޮޑު ޚަރަދެއް މިކަމަށް ހިނގާ ކަމަށް އޭނާ ވިދާޅުވިއެވެ.
ޓްރެފިކް ބަލަހައްޓަން ފުލުހަކު ބަހައްޓާނަމަ އެންމެ މަދުވެގެން 4 ނޫނީ 5 ފުލުހުން އެތަނުގައި ބައިތިއްބަން ޖެހޭ ކަމަށް އޭނާ ވިދާޅުވިއެވެ. އެހެންކަމުން މިއީ ބޮޑު ޚަރަދެއް ހިނގާނެ ކަމެއް ކަމަށާއި، ފުލުހުންގެ މައްޗަށް މުހިންމު އެތައް މަސްއޫލިއްޔަތުތަކެއް މަތިކުރެވިފައިވާއިރު، އެފަދަ ކަންކަމުގައި ހަރަކާތްތެރިވާންޖެހުމަކީ އެންމެ ރަނގަޅު ކަމަކަށް ނުވާކަމަށް ފަސީހު ވިދާޅުވިއެވެ.
އެހެންކަމުން މަގުތައްމަތި އެންމެ ބޮޑަށް ބާރުބޮޑުވާ ވަގުތު ފުލުހުން އެސަރަހައްދުތަކުގައި ހަރަކާތްތެރިވެ، ބާރުބޮޑުނޫން ވަގުތުގައި މަގު ބޭނުންކުރަން އެ އޮންނަ އުސޫލުތަކާއި އެއްގޮތަށް ރައްޔިތުން އަމިއްލައަށް މަގު ބޭނުންކުރުމަކީ އެންމެ ރަނގަޅު ގޮތް ކަމުގައި އޭނާ ވިދާޅުވިއެވެ.
ތަނެއްގައި ފުލުހަކު ބެހެއްޓުމަކީ އެންމެ ފުލުހަކު އެތަނަށް ކަނޑައެޅުމެއް ނޫން. ކޮންމެ ކަންމައްޗެއްގައި ފުލުހަކު ބެހެއްޓުމަކީ އޭގެ އެންމެ އެކަށީގެންވާ ހައްލެއް ނޫން.އަހްމަދު ފަސީހު / ޗީފް އިންސްޕެކްޓަރ އޮފް ޕޮލިސް
ފަސީހު އިތުރަށް ވިދާޅުވީ ބްރިޖު ކައިރީގައި ޓްރެފިކް ކޮންޓްރޯލްކުރުމަށް ފުލުހުން ހަރަކާތްތެރިވަމުންދާ ގޮތަށް، އެތަނުގެ ޓްރެފިކް ލައިޓް ނިޒާމަށް ބަދަލު ގެނައުމަށް ދައުލަތުގެ ކަމާގުޅުންހުރި މުއައްސަސާތަކާއެކު މަޝްވަރާކުރަމުންދާކަމަށެވެ. އެކަން އެގޮތަށް ކުރެވުނީމަ އެފަދަ ސަރަހައްދުތަކުގައި ފުލުހުން ތިބެން ނުޖެހި އެހެން ސަރަހައްދުތަކުގައި ފުލުހުން ބޭތިއްބުމަށް މަގުފަހިވާނެ ކަމަށެވެ.
