ސީސީޓީވީ ބޭނުންކޮށްގެން ފަނޑިޔާރުންނަށް ފާރަލީކަމުގެ ތުހުމަތުގައި ސްޕްރީމްކޯޓުގެ އެސްޖީ ސަސްޕެންޑްކޮށްފި

ސްޕްރީމް ކޯޓުގެ ސެކެޓްރީ ޖެނެރަލް (އެސްޖީ)ކަމުގެ މަގާމުގައި ހުންނެވި ޑރ ހުސައިން ފާއިޒު އެކޯޓުގެ ސީސީޓީވީ ކެމެރާ ސިސްޓަމް ބޭނުންކޮށްގެން ފަނޑިޔާރުންނަށް ފާރަލުމުގެ މައްސަލައެއްގައި ސަސްޕެންޑްކޮށްފިއެވެ.

އެކަމާއި ގުޅިގެން ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ބުނީ ޑީޖޭއޭއިން ބަލަމުންދާ މައްސަލައަކާ ގުޅިގެން ސްޕްރީމް ކޯޓުގެ އެސްޖީ ބުރާސްފަތި ދުވަހު ސަސްޕެންޑްކޮށްފައިވާކަމަށެވެ. ތަހުގީގުކުރަމުންދަނީ ފަނޑިޔާރުންނަށް ފާރަލުމުގެ އިތުރުން ކޯޓުން ބޭރަށް މައުލޫމާތު ފޯރުކޮށްދޭކަމުގެ ތުހުމަތުގެ މައްސަލައެކެވެ.

މިކަމާއި ގުޅިގެން ވަގުތީގޮތުން އެސްޖީގެ މަސްއޫލިއްޔަތުތައް ހަވާލުކޮށްފައިވަނީ އެކޯޓުގެ އެސިސްޓެންޓް ރަޖިސްޓްރާ އާއެވެ.

ޑރ. ފާއިޒް ސުޕްރީމް ކޯޓުގެ ސެކްރެޓަރީ ޖެނެރަލްގެ މަގާމަށް އައްޔަންކޮށްފައިވަނީ 2019 ވަނަ އަހަރުއެވެ. ސެކްރެޓަރީ ޖެނެރަލްއަކީ ސުޕްރީމް ކޯޓުގެ ފަނޑިޔާރުންގެ މަޖިލީހުން އައްޔަންކުރައްވާ ފަރާތެކެވެ.

މީގެކުރިން 2019 ވަނަ އަހަރުގެ ނޮވެމްބަރ މަހު ޑރ. ހުސައިން ފާއިޒަށް އޭރު އުއްތަމަ ފަނޑިޔާރުކަމުގައި ހުންނެވި ޑރ. އަހުމަދު އަބްދުﷲ ދީދީ ވަޒީފާއިން ވަކިކުރާނެ ކަމަށް ވިދާޅުވެ ދިން އިންޒާރާއެކު, އުއްތަމަ ފަނޑިޔާރުގެ ސުލޫކީ މައްސަލައެއް ބެލުމަށް ޖުޑީޝަލް ސަރވިސް ކޮމިޝަން (ޖޭއެސްސީ) އިން ނިންމިއެވެ. އެކަމާއި ގުޅިގެން އޭރުގެ އުއްތަމަ ފަނޑިޔާރު ނެރުއްވި ބަޔާނެއްގައި ވިދާޅުވެފައިވަނީ ޖުޑީޝަލް އެޑްމިނިސްޓްރޭޝަނާއި ހަވާލުކޮށްފައިވަނީ ރާއްޖޭގެ އަދުލު އިންސާފު ގާއިމު ކުުރުމުގެ ބާރުގެ އާންމު އިދާރީ ކަންކަމަށްވާއިރު، ކޯޓުތަކުގެ އެތެރޭގެ އިދާރީ ހިންގުމާ ބެހޭ އުސޫލުތައް ކަނޑައަޅާ އަންގާ އެންގުމަށް ރިޢާޔަތްކޮށް ސުޕްރީމް ކޯޓުގެ ސެކްރެޓަރީ ޑރ. ފާއިޒް އުއްތަމަ ފަނޑިޔާރުގެ ހުއްދަ ނުހޯދާ، އެންގުމެއް ނެތި ސުޕްރީމް ކޯޓުގެ މުވައްޒަފުންނާއި ބައްދަލުކޮށް ކޯޓު ހިންގުމުގެ އިސްވެރިއަކީ އުއްތަމަ ފަނޑިޔާރެއް ނޫންކަމަށާއި، އެއީ އޭނާ ކަމަށް ވިދާޅުވެ ދުސްތޫރީ އަދި ޤާނޫނީ މާއްދާތަކުގެ ބާރު ކެނޑޭ ގޮތަަށް އަމަލުކުރައްވާފައިވާ ކަމަށެވެ.

އެފަދަ ގޮތަކަށް ފާއިޒުގެ އަމަލުތައް ހުރުމުން އުއްތަމަ ފަނޑިޔާރުގެ ހައިސިއްޔަތުން ޑރ. ފާއިޒު އަށް ނަސޭޙަތްދީ އެފަދަ އަމަލެއް ތަކުރާރު ނުކުރެއްވުމަށް އަންގަވާފައިވާނެ ކަމަށް ބަޔާނުގައިވެއެވެ.

އަދި މަސްލަހަތު ނަގައިލެވޭ ގޮތަށް އެފަދަ ކަންތައް ކުރައްވަނާމަ ފިޔަވަޅު އެޅުމަށް ހުރަހެއް ނޯންނާނެ ކަމަށް ދަންނަވާފައިވާ ކަމަށް އުއްތަމަ ފަނޑިޔާރުގެ ބަޔާނުގައިވެއެވެ.

އަދި އޭގައި އެއްވެސް ގޮތަށް އޭނާ އަށް އިންޒާރު ދިންކަމުގައި ބެލެވޭނެ އެއްވެސް ހަމައެއް ނޯންނާނެކަމާއި، އަދި އެއީ ސުލޫކީ މައްސަލައެއް ކަމުގައި ބަލާނެ އެއްވެސް އަސާސެއް ނޯންނާނެ ކަމަށް ޑރ. ދީދީ ނެރުއްވި ބަޔާނުގައި ވިދާޅުވެފައިވެއެވެ.