ސޯލާ ޕީވީ ހަރުކުރާނެ ތަންތަން ކަނޑައެޅީ އާންމުންގެ ޚިޔާލު ހޯދުމަށްފަހު: ނުޒުހަތު
31 މާރިޗު 2022 | ބުރާސްފަތި 04:25މިއީ މިހާތަނަށް އެއް ކޮންޓްރެކްޓެއްގެ ދަށުން އެންމެ ގިނަ އަދަދަކަށް ސޯލާ ޕީވީ ނިޒާމު ޤާއިމުކުރާ މަޝްރޫއު
އެންވަޔަރަމެންޓް މިނިސްޓްރީގެ އެސްޕަޔަރ އަދި އެރައިޒް މަޝްރޫއުގެ ސަސްޓެއިނަބަލް އެނާޖީ ސްޕެޝަލިސްޓް ނުޒުހަތު އަހްމަދު
11 މެގަވޮޓްގެ ސޯލާ ޕީވީ ނިޒާމު ޤާއިމުކުރުމަށް ނިންމާފައިވާއިރު ސޯލާ ޕީވީ ހަރުކުރާނެ ތަންތަން ކަނޑައަޅާފައިވާނީ އާންމުންގެ ޚިޔާލު ހޯދުމަށްފަހު ކަމަށް އެވަޔަރަމެންޓް މިނިސްޓްރީގެ އެސްޕަޔަރ އަދި އެރައިޒް މަޝްރޫއުގެ ސަސްޓެއިނަބަލް އެނާޖީ ސްޕެޝަލިސްޓް ނުޒުހަތު އަހްމަދު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަދައްކަވަމުން ނުޒުހަތު ވިދާޅުވީ ސޯލާ ޕީވީ ހަރުކުރާ ތަންތަން ކަނޑައަޅާފައިވާނީ އާންމުންގެ ޚިޔާލު ހޯދުމަށްފަހު ކަމަށްވާއިރު އެ ޚިޔާލުތައް ވެސް ބަލައިގެންފައިވާ ކަމަށެވެ. އަދި ކުދި ރަށްތަކުގައި އާންމުން ދިރިއުޅޭއިރު އިންޖީނުގެ އެމީހުން ދިރިއުޅޭ ގެތަކުގެ ކައިރީގައި ހުރުމުން އުނދަގޫވާ ކަމަށާއި ސޯލާ ޕީވީ ހަރުކުރުމުން މިކަން ވެސް ހައްލު ވެގެންދާނެ ކަމަށް ވިދާޅުވިއެވެ.
ނުޒުހަތު ވިދާޅުވީ މިހާރު ދުނިޔޭގެ ބާޒާރުގައި ތެލުގެ އަގަށް އައި ބަދަލާއި ގުޅިގެން ލީޓަރަކަށް 10 ރުފިޔާގެ ރޭޓުން ބަލާނަމަ ދައުލަތުން ތެލަށްކުރާ ހޭދައިން ގާތްގަނޑަކަށް އަހަރަކަށް 55 މިލިއަން ދިވެހި ރުފިޔާ ސަލާމަތް ކުރެވޭނެ ކަމަށެވެ. އަދި މި މަޝްރޫޢޫގެ ސަބަބުން އަހަރަކަށް 12،694 މެޓްރިކްޓަނުގެ ވިހަގޭސް މަދުކުރެވޭނެ ކަމަށް ނުޒުހަތު ވިދާޅުވިއެވެ.
އެކްސަލަރޭޓިންގ ސަސްޓެއިނަބަލް ޕްރައިވެޓް އިންވެސްޓްމަންޓްއިން ރިނުއުވަބަލް އެނަރޖީ (އެސްޕަޔަރ) ޕްރޮޖެކްޓްގެ ދަށުން އައްޑޫ ސިޓީ ގުޅިފައިވާ ރަށްތައް ހިމެނޭގޮތަށް 6 ރަށެއްގައި ޕަވަރ ޕަރޗޭސިންގ އެގްރީމަންޓްގެ ދަށުން 11 މެގަވޮޓްގެ ސޯލާ ޕީވީ ނިޒާމު ޤާއިމުކުރުމަށް މެލޭޝިއާގެ މެގަ ފަސްޓް ޕަވަރ އިންޑަސްޓްރީޒް އެސްޑީއެން ބަރްހާދް އަދި ޕަވަރ ޗައިނާ ހުއަޑޮންގ އިންޖިނިއަރިންގ ކޯޕަރޭޝަން ޖޮއިންޓް ވެންޗަރއާ މިނިސްޓްރީން ވަނީ ހަވާލުކޮށްފައެވެ.
މިއީ ދިވެހިރާއްޖޭގައި މިހާތަނަށް އެއް ކޮންޓްރެކްޓެއްގެ ދަށުން އެންމެ ގިނަ އަދަދަކަށް ސޯލާ ޕީވީ ނިޒާމު ޤާއިމުކުރާ މަޝްރޫޢެވެ.
މި މަޝްރޫޢުގެ ދަށުން 11 މެގަވޮޓްގެ ސޯލާ ޕީވީގެ ނިޒާމު ޤާއިމުކުރުމަށް ނިންމާފައިވަނީ
މި މަޝްރޫއުގެ ދަށުން އުފައްދާ ކަރަންޓް ވިއްކުމަށް ހުށަހަޅާފައިވަނީ 15 އަހަރުގެ މުއްދަތަށް ޔުނިޓަކަށް 9.888 ޔޫއެސް ސެންޓެވެ. މިއީ މިހާތަނަށް ރާއްޖޭގައި ޕަވަރ ޕާޗޭސިން އެގްރީމެންޓުގެ ދަށުން ކަރަންޓުގެ ޙިދުމަތްދޭ ކުންފުންޏަށް ސޯލާ ހަކަތައިން އުފައްދާ ކަރަންޓު ގަންނަން ލިބޭ އެއްމެ ހެޔޮ އަގެވެ. އަދި މިއީ އެވްރެޖްކޮށް ޑީސަލުން ކަރަންޓު އުފައްދާ އަގުގެ %50 އަށް ވުރެކުޑަ އަގެކެވެ.
މި މަޝްރޫޢުގެ އަމަލީ މަސައްކަތް ފެށުމަށް ހަމަޖެހިފައިވާ 2023 ވަނަ އަހަރުގެ ފުރަތަމަ ކުއާޓާގައެވެ. އަދި މަސައްކަތްތައް ނިންމައި ކަރަންޓު ފޯރުކޮށްދޭން ފަށާނީ 2023 ވަނަ އަހަރުގެ ފަހުކޮޅުގައެވެ. މި މަޝްރޫޢުގެ ސަބަބުން އަހަރަކު ގާތްގަނޑަކަށް 18 މިލިއަން ޔުނިޓްގެ ކަރަންޓް އުފައްދާނެއެވެ. އޭގެ ސަބަބަނުން އަހަރަކު ކަރަންޓް އުފައްދަން ބޭނުންކުރާ ޑީސަލުން ގާތްގަނޑަކަށް 4.8 މިލިއަން ލީޓަރުގެ މަދުކުރެވި ޑީސަލް ގަންނަން ކުރާ ހޭދައިން 39 މިލިއަން ދިވެހި ރުފިޔާ ކުޑަ ކުރެވޭނެއެވެ.
މިނިސްޓްރީން ހިންގާ އެސްޕަޔަރ އަދި އެރައިސް މަޝްރޫޢަކީ، ކަރަންޓު އުފެއްދުމަށްޓަކައި ތެލަށް ބަރޯސާވާ މިންވަރާއި މިކަމަށްކުރާ ޚަރަދު ކުޑަކޮށް ދިވެހިރާއްޖޭގައި އިޢާދަކުރަނިވި ހަކަތައިގެ ދާއިރާއިން ޕްރައިވެޓް އިންވެސްޓްމަންޓްތައް އިތުރުކުރުމަށް ވޯލްޑް ބޭންކްގެ އެހީގައި ހިންގާ މަޝްރޫޢެކެވެ. މިގޮތުން ޕްރައިވެޓް އިންވެސްޓްމަންޓްތައް ގެނައުމަށް ހުރި ގޮންޖެހުންތަކަށް ޙައްލު ހޯދައި، އިންވެސްޓްކުރުމަށް ފަސޭހަ މާޙައުލެއް ޤާއިމުކުރުމަށް މަސައްކަތް ކުރުމާއިއެކު މިކަމަށް ފުރުޞަތުތައް ހުޅުވައިދިނުމާއި އަދި މިކަމާއި ގުޅޭ ތަމްރީން ދިނުން މި މަޝްރޫޢުގައި ހިމެނެއެވެ.
