ސްޓެލްކޯގެ ސަރވަރ އަށް ރެންޑަމްވެއަރ ހަމަލާއެއް ދިނުމާއި ގުޅިގެން އެކަން ތަހުގީގުކޮށްދިނުމަށް އެކުންފުނިން ފުލުހުންނަށް ހުށަހަޅައިފިއެވެ.

އެކަމާއި ގުޅިގެން ސްޓެލްކޯއިން ބުނީ މާރިޗު 24 ގައި އެކުންފުނީގެ ސަރވަރ އަށް ރެންޑަމްވެއަރ ހަމަލާއެއް ދިނުމާއި ގުޅިގެން، ކުންފުނީގެ އައި.ޓީ ނެޓްވޯކް މެދުވެރިކޮށް ދެމުންދޭ ޚިދުމަތްތަކާއެކު ކުންފުނީގެ ވެބްސައިޓާއި، މޯބައިލް އެޕްލިކޭޝަނާއި، މޯބައިލް އައުޓްލެޓްތަކާއި، އަދި ޚިދުމަތްދޭ ކައުންޓަރުތަކުން ދެމުންދާ ޚިދުމަތްތަށް އެތާރީޚުން ފެށިގެން މެދުކެނޑުނުކަމަށެވެ. އަދި މިހަމަލާގެ ސަބަބުން އެކުންފުނީގެ އައިޓީ ނެޓްވޯކަށް ލިބުނު ގެއްލުންތަކުގެ ސަބަބުން، ކުންފުނީގެ ޚިދުމަތްތައް ހޯދުމުގައި ކަސްޓަމަރުންނަށް ވަރަށް ގިނަ ދަތިތަކާ ކުރިމަތިލާން ޖެހުނުކަމަށެވެ.

މިހަމަލާގެ ސަބަބުން ދިމާވި މައްސަލަތައް އަދިވެސް އެއްކޮށް ރަނގަޅުކުރެވިފައި ނުވިނަމަވެސް، މިހާތަނަށް ކުރެވުނު މަސައްކަތުން ކުންފުނީގެ ހެޑް އޮފީހުން ފޯރުކޮށްދޭ ޚިދުމަތަށް އެދި ފޯމް ހުށަހެޅުމާއި، ބިލުދެއްކުމުގެ ޚިދުމަތް ވަނީ ފެށިފައެވެ. މިހަމަލާގެ ސަބަބުން ދިމާވެފައިވާ އެންމެހާ މައްސަލަތައް ހައްލުކޮށް، މެދުކެނޑިފައިވާ އެންމެހާ ޚިދުމަތްތައް އަލުން ދިނުމުގެ މަސައްކަތް ކުންފުނިން އަންނަނީ ކުރަމުންކަމަށް ސްޓެލްކޯއިން ބުނެއެވެ. އަދި މި މައްސަލަތައް ވީހާވެސް އަވަހަށް ޙައްލުކުރުމުގެ ގޮތުން ދައުލަތުގެ ކަމާބެހޭ މުވައްސަސާތަކާއި މަޝްވަރާކުރެވި، އެފަރާތްތަކުގެ ލަފާއާއި އެހީތެރިކަމާއިއެކު ގިނަ މަސައްކަތްތަކެއް ކުރެވެމުންދާކަމަށްވެސް ސްޓެލްކޯއިން ބުނެއެވެ.

މި މައްސަލަ ހައްލުކޮށް، އެކުންފުނިން ދެމުންގެންދާ ޚިދުމަތް ދެމެހެއްޓެނިވި އަދި އިތުބާރު ހުރިގޮތެއްގައި ރައްޔިތުންނަށް ފޯރުކޮށްދިނުމަށް އެކުންފުނިން ކެނޑިނޭޅި މަސައްކަތް ކުރަމުންދާކަމަށް ސްޓެލްކޯއިން ބުނެއެވެ. އަދި މިފަދަ ކަންކަން ތަކުރާރުވިޔަ ނުދިނުމަށްޓަކައި އަޅަންޖެހޭ އެންމެހާ ފިޔަވަޅުތައްވެސް އަޅަމުންދާކަމަށް އެކުންފުނިން ބުނެއެވެ.