މާނޭއާއި، މެންޑީ ވޯލްޑްކަޕަށް! ސަލާހަށް ޖާގައެއް ނެތް!

ލިވަޕޫލްގެ ފޯވާޑް މާނޭއާއި, ޗެލްސީގެ ކީޕަރު މެންޑީ ސެނެގާލް ވޯލްޑްކަޕްގެ ޖާގައެއް ޔަޤީންކޮށްފިއެވެ. މިއާއެކު ލިވަޕޫލް ފޯވާޑް މުޙައްމަދު ސަލާހަށް ކުރިއަށް އޮތް ވޯލްޑްކަޕްގެ ދޮރު ބަންދުވީއެވެ.

ސެނެގާލް ވޯލްޑްކަޕްގެ ޖާގައެއް ޔަޤީންކުރީ އެފްރިކާ ބައްރުގެ ޕްލޭއޮފްގެ ދެ ލެގުން މިޞްރުގެ މައްޗަށް ކުރި ހޯދައިގެންނެވެ. ފުރަތަމަ ލެގު މިޞްރުގައި ކުޅެ 1-0 ން މިޞްރު ކާމިޔާބުކުރީ ސަލާހުގެ އެހީތެރިކަމާއެކުއެވެ. އެއް ލަނޑުގެ އެޑްވާންޓޭޖާއެކު ދެވަނަ ލެގަށް ސެނެގާލްގައި ނިކުއިން ނަމަވެސް މެޗުގެ 90 މިނިޓާއި, ނަތީޖާ ނެރުމަށް ކުޅުނު އިތުރު ވަގުތުގެ ދެހާފްވެސް ނިމުނީ 1-0 ން ސެނެގާލް ކުރީގައި އޮވެގެންނެވެ. ވޯލްޑްކަޕްގެ ޖާގަ ލިބޭ ޓީމެއް ޔަޤީންކުރަން ޖެހި ޕެނަލްޓީގައި ސެނެގާލް ކުރި ހޯދީ 3-1 ނެވެ.

މެޗުގެ ތެރެއިން ސެނެގާލްގެ ލަނޑު ކާމިޔާބުކުރީ ބުލޫޔޭ ޑިޔާއެވެ. އޭނާ ވަނީ މެޗު ފަށައިގެން ތިންވަނަ މިނިޓްގައި ގޯލް ޖަހާފައެވެ. ޕެނަލްޓީގައި ދެޓީމުންވެސް ފުރަތަމަ ދެ ޕެނަލްޓީ ނާކާމިޔާބުވިއެވެ. އޭގެތެރޭގައި މިޞްރު ކެޕްޓަން ސަލާހުގެ ޕެނަލްޓީ ހިމެނެއެވެ. ސަލާގެ ޕެނަލްޓީ ގޯލާ އަމާޒެއް ނުވިއެވެ. މިޞްރަށް ކާމިޔާބުކުރެވުނީ އަމްރު އަލް ސޮލިއާ ޖެހި ތިންވަނަ ޕެނަލްޓީއެވެ. ސެނެގާލުން ވަނީ ފަހު ތިން ޕެނަލްޓީ ކާމިޔާބުކޮށްފައެވެ. އެއީ ސާއާއި, ބަމްބާ ޑިއަންގއާއި, މާނޭއެވެ. މާނޭ ޖެހި ފަހު ޕެނަލްޓީ ކާމިޔާބުކުރުމުގެ ކުރިން މެންޑީ ވަނީ މިޞްރުގެ މުޙައްމަދު މުސްތަފާ ޖެހި ޕެނަލްޓީ މަތަކޮށްފައެވެ.

މިއަހަރު ސެނެގާލުން އެފްރިކަޕް ކަޕް އޮފް ނޭޝަންސްވެސް އުފުލާލީ ފައިނަލްގައި ޕެނަލްޓީ ޖަހައިގެން މިޞްރު ބަލިކޮށްފައެވެ. އެފަހަރުވެސް ޕެނަލްޓީ ޝޫޓް އައުޓްގައި ސެނެގާލްގެ ފަހު ޕެނަލްޓީ ކާމިޔާބުކުރީ މާނޭއެވެ. އަދި މެންޑީ ޕެނަލްޓީ މަތަކުރިއެވެ. އެފްރިކާ ބައްރުން ގާނާއާއި, މޮރޮކޯއާއި ކެމަރޫންވެސް ވަނީ ވޯލްޑްކަޕްގެ ޖާގަ ޔަޤީންކޮށްފައެވެ.