އިންޑިޔާގެ އެކްސްޓަރނަލް އެފެއަރޒް މިނިސްޓަރ، ސްރީލަންކާގެ ރައީސާ ބައްދަލުކުރައްވައިފި
28 މާރިޗު 2022 | ހޯމަ 12:15އިންޑިޔާއިން ވަނީ ސްރީލަންކާއަށް އެއްބިލިއަން ޑޮލަރުގެ ލައިން އޮފް ކްރެޑިޓް ދީފައި
ޑރ. ޖައިޝަންކަރު ރައީސް ގޮތަބަޔާ ރާޖަޕަކްސަގެ އަރިހުގައި
އިންޑިޔާގެ މިނިސްޓަރ އޮފް އެކްސްޓަރނަލް އެފެއަރޒް ޑޮކްޓަރ އެސް.ޖައިޝަންކަރް, ސްރީލަންކާގެ ރައީސް ގޮތަބަޔާ ރާޖަޕަކްސާއާ ބައްދަލުކުރައްވައިފިއެވެ. 3 ދުވަހުގެ ރަސްމީ ދަތުރުފުޅެއްގައި ޖަޔަޝަންކަރް ސްރީލަންކާއަށް ވަޑައިގެންނެވީ ދިވެހިރާއްޖެއަށް ކުރެއްވި ދަތުރުފުޅަކަށްފަހު ރޭގެ ވަގުތެއްގައެވެ.
ހޯމަ ދުވަހު ބޭއްވުނު ބައްދަލުކުރެއްވުމުގައި ދެބޭފުޅުން މައިގަޑުގޮތެއްގައި މަޝްވަރާކުރެއްވީ ސްރީލަންކާގެ މިއަދުގެ އިގުތިސާދީ ހާލަތާ ބެހޭގޮތުންނެވެ. އެގައުމަށް ދިމާވެފައިވާ ދަތި ހާލަތާ ގުޅިގެން އިންޑިޔާއިން ވަނީ އެއްބިލިއަން ޑޮލަރުގެ ކްރެޑިޓް ލައިނެއް ސްރީލަންކާއަށް ދީފައެވެ. މިކަމަށްޓަކައި ރައީސް ގޮތަބަޔާ ރާޖަޕަކްސާ ވަނީ މިނިސްޓަރ ޖައިޝަންކަރްއަށާއި އިންޑިޔާސަރުކާރަށް ޝުކުރު އަދާ ކުރައްވާފައެވެ.
ޖެނުއަރީ 2020 އިންފެށިގެން ސްރީލަންކާއަށް ވަނީ ބޭރުފައިސާގެ ދަތިކަން ވަރަށް ބޮޑަށް ކުރިމަތިވެފައެވެ. މިގޮތުން ބޭރުފައިސާގެ ރިޒަރވްގެ 70 އިންސައްތަ ހުސްވެފައިވާއިރު, ކާބޯތަކެއްޗާއި ތެޔޮފަދަ ޒަރޫރީ ތަކެތި ހޯދުމަށްވެސް އެގައުމުވަނީ ނުކުޅެދިފައެވެ. ނަތީޖާއެއްގެ ގޮތުން މިތަކެތީގެ އަގުތައް ބާޒާރުގައި ވަނީ އިންތިހާއަށް އުފުލި، ލިބުން ދަތިވެފައެވެ.
މިމައްސަލައަށް ހައްލެއް ހޯއްދެވުމަށް އައި.އެމް.އެފްއާއެކު މަޝްވަރާކުރެއްވުމަށް ރައީސް ރާޖަޕަކްސަ އަންނަ މަހު ވޮޝިންގޓަނަށް ޒިޔާރަތްކުރައްވާ ގޮތަށް ވަނީ ހަމަޖެހިފައެވެ.
