ކުރިއަށް އޮތް ހައެއްކަ އަހަރުގެ ތެރޭގައި ބައިނަލްއަޤުއާމީ މަޝްރޫއުތައް އެމްޓީސީސީއަށް ހިންގޭނެ - އާޒިމް
މިވަގުތު ސަރުކާރުގެ 6 ބިލިއަން ރުފިޔާގެ މަޝްރޫއެއް ކުރިއަށްގެންދޭ
އާދަމް އާޒިމް - އެމްޓީސީސީގެ ސީއީއޯ
ކުރިއަށް އޮތް ހައެއްކަ އަހަރުގެ ތެރޭގައި ބައިނަލްއަޤުއާމީ މަޝްރޫއުތައް އެމްޓީސީސީން ހިންގަން ފެށޭނެ ކަމަށް އެ ކުންފުނީގެ ސީއީއޯ އާދަމް އާޒިމް ވިދާޅުވެއްޖެއެވެ.
އާޒިމް މިހެން ވިދާޅުވީ އައްޑޫ ސިޓީ މީދޫގެ ބަނދަރު ހުޅުވުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ. ކުންފުނި މިހާރު މިސްރާބު ޖަހާފައިވަނީ، ރާއްޖެއިން ބޭރުގެ ޕްރޮޖެކްޓްތަކަށް ދެވޭ ފެންވަރުގެ ކުންފުންޏެއްގެ ގޮތުގައި ކުންފުނި ތަރައްގީކޮށް، އެ މަސައްކަތް ފެށުމަށްކަމަށާއި، ކުރިއަށް އޮތް 5-6 އަހަރު ތެރޭ އެފަދަ މަޝްރޫއުތައް ކުންފުނިން ހިންގާނެކަމަށް އާޒިމް ވިދާޅުވިއެވެ. އަދި މިއަދު ގައުމުގެ ވެރިއަކީ އެ މިސްރާބަށް ކުންފުނި ގެންގޮސްދެއްވާނެ ވެރިއެއް ކަމަށް އާޒިމް ވިދާޅުވިއެވެ.
އެންމެ ފުރަތަމަ ރައީސް އިރުޝާދު ދެއްވީ ކުންފުނި މިހާރު އޮތް ހިސާބުން އެހެން ހިސާބަކަށް ގެންދިޔުމަށް ކަމަށާއި، އެކަން ކުރައްވާނެ ކަމުގެ ޔަގީކަން އާޒިމް ދެއްވިއެވެ.
އެމްޓީސީސީން ކުރަމުން އަންނަ ކޮންމެ މަސައްކަތަކީ ރައީސްގެ ވައުދު ފުއްދުމަށްޓަކައި ކުރަމުން އަންނަ މަސައްކަތެއް ކަމަށާއި، އެ މަސައްކަތްތައް ކުރިއަށްގެންދަނީ ރައީސް ބޭނުންފުޅުވެވަޑައިގަންނަވާ ގޮތަށް ކަމަށް އާޒިމް ވިދާޅުވިއެވެ. މިއަދު ޤައުމުން މި ފެންނަނީ ރައީސަކު ގައުމު ތަރައްޤީ ކުރުމަށް އަޒުމް ކަނޑައަޅުއްވައިފިނަމަ އެކަމެއް ވާނެކަން ކަމުގައިވެސް އާޒިމް ވިދާޅުވިއެވެ.
އާޒިމް ވިދާޅުވީ ކުންފުނީގެ ތާރީޚުގައިވެސް ނުހިންގާހާ ގިނަ މަޝްރޫއުތައް މި ދައުރުގައި ހިންގަމުން އަންނަ ކަމަށާއި، މިވަގުތު ޖުމްލަ 103 މަޝްރޫއުގެ މަސައްކަތްކުރަމުންދާ ކަމަށެވެ. އަދި 98 މަޝްރޫއެއްގެ މަސައްކަތް ނިމިފައިވާއިރު، މީގެތެރޭގައި ބޮޑު އަދި ކުދި މަޝްރޫއުތައްވެސް ހިމެނޭ ކަމަށެވެ. އާޒިމް ވިދާޅުވި މި ތިން އަހަރުތެރޭ ނިންމި މަޝްރޫއުތަކުގެ އަގު 3.5 ބިލިއަން ރުފިޔާއަށް އަރާކަމަށެވެ.
މިވަގުތު ސަރުކާރުގެ 6 ބިލިއަން ރުފިޔާގެ މަޝްރޫއު އެކުންފުނިން ކުރިއަށްގެންދާކަން ފާހަގަކުރައްވަމުން އާޒިމް ވިދާޅުވީ ކުންފުނީގެ އަމާޒަކީ، ފަށާފައިވާ ބޮޑެތި މަސައްކަތްތައް އަންނަ އަހަރުގެ ނިޔަލަށް ނިންމުން ކަމަށެވެ. އަދި އެމްޓީސީސީގެ މަސައްކަތެއް ފެންނަން ނެތް ރަށެއް ރާއްޖޭގައި ނޯންނާނެކަމަށް އާޒިމް ވިދާޅުވިއެވެ.
ސަރުކާރުގެ ހުރިހާ މުއައްސަސާތަކުން އެއްވިޝަނެއްގައި އެއް އަމާޒަކަށް މަސައްކަތް ކުރަމުން އަންނައިރު، ހުރިހާ މުއައްސަސާއަކުންވެސް އެމްޓީސީސީއަށް ބޭނުންވާ އެހީތެރިކަން ލިބެމުން އަންނަކަންވެސް އާޒިމްގެ ވާހަކަފުޅުގައި ފާހަގަކުރެއްވިއެވެ.
