ބިދޭސީ މުވައްޒަފުގެ ފޮޓޯ އާންމު ކުރުމުން އޭނާއަށް ދަނީ އިންޒާރު ލިބެމުން: ފުލުހުން
26 މާރިޗު 2022 | ހޮނިހިރު 14:09މުޒާހަރާގައި މުވައްޒަފު މަސައްކަތް ކޮށްފައިވަނީ ފުލުހުންގެ މެޑިކަލް ޓީމާއެކު
ބިދޭސީ މުވައްޒަފު
އިދިކޮޅު ކޯލިޝަނުން ކުރިއަށް ގެންދިޔަ މުޒާހަރާގެ ތެރެއިން ފުލުހުންގެ ޓީމާއެކު ހަރަކާތްތެރިވި ބިދޭސީ މީހެއްގެ ފޮޓޯ އާންމު ކުރުމުން އޭނާއަށް އިންޒާރު ލިބެމުންދާ ކަމަށް ފުލުހުން ބުނެފިއެވެ.
ފުލުހުން ބުނީ އެމީހާ އަކީ ފުލުހުންގެ ޚިދުމަތުގެ ވަޒީފާގައި ސިއްހީ ހިދުމަތް ދޭ ބަހާގައި މަސައްކަތް ކުރާ ބިދޭސީ މުވައްޒަފެއް ކަމަށެވެ. އަދި 25 މާރޗު 2022 ގައި ބޭއްވި މުޒާހަރާގައި މުވައްޒަފު މަސައްކަތް ކޮށްފައިވަނީ ފުލުހުންގެ މެޑިކަލް ޓީމާއެކުގައި ކަމަށާއި ބައެއް ނޫސްތަކުން އެ މުވައްޒަފުގެ ފޮޓޯ އަދި މައުލޫމާތު ހާމަކުރި ގޮތުގެ ސަބަބުން މުވައްޒަފަށް އިންޒާރު ލިބެމުންދާކަމަށް މުވައްޒަފުގެ ފަރާތުން މައުލޫމާތު ދީފައިވާ ކަމަށް ވެސް ފުލުހުން ބުންޏެވެ.
ފުލުހުން ބިދޭސީ މީހާއަކީ ކޮން ޤައުމަކަށް ނިސްބަތްވާ މީހެއްކަން ހާމަކޮށްފައިނުވާއިރު ބައެއް މީޑިއާތަކުން ބުނަމުން ގެންދަނީ އޭނާއަކީ އިންޑިއާ މީހެއް ކަމަށެވެ.
ހުކުރު ދުވަހުގެ މުޒާހަރާގެ ތެރެއިން 11 މީހަކު ފުލުހުން ހައްޔަރުކޮށްފައިވެއެވެ. ރާއްޖެއެމްވީއަށް މައުލޫމާތުދެމުން އިތުބާރު ހުރި ފަރާތަކުން ބުނީ ރައީސް ޔާމީން މި މުޒާހަރާގައި ބައިވެރިވެވަޑައިނުގެންނެވީ ސެކިއުރިޓީ ސަބަބުތަކާއި ހުރެ ކަމަށެވެ. ނަމަވެސް މީގެ ކުރިން ވެސް އެމަނިކުފާނު ވަނީ އިންޑިއާ އައުޓް ކެމްޕެއިންގައި ރަށްރަށަށް ކުރި ދަތުރުތަކުގައި ބައިވެރިވެވަޑައިގެންފައެވެ. އަދި އެމަނިކުފާނު ވަނީ މިފަދަ އެއްވުންތަކުގައިވެސް ބައިވެރިވެވަޑައިގެންފައެވެ.
ހުކުރު ދުވަހުގެ މުޒާހަރާ ކުރިއަށް ގެންދިޔަ ގޮތާމެދު ހިތްހަމަނުޖެހިގެން އެ ޕާޓީގެ އާންމު މެމްބަރުން ތިބީ ރުޅިގަދަވެފައިކަމަށާއި މި މުޒާހަރާއަށް ރަށްރަށުން ވެސް ބައެއް މީހުން މާލެ އައިސްފައިވާއިރު، މުޒާހަރާގެ އަމާޒަށް ވާސިލް ނުވެ އެމީހުން ފުރަން ޖެހުމުން ރުޅި އައިސް ތިބި ކަމަށް ވަނީ މައުލޫމާތު ލިބިފައެވެ. އަދި ޕާޓީއަށް ހެޔޮ އެދިގެން މަސައްކަތް ކުރާ މެމްބަރުން ދުރުކުރުމަށްފަހު، ރަނގަޅަށް އިރުޝާދު ނުދީ، މުޒާހަރާއަށް ނުކުމެފައިވާ ކަމަށާއި، އެ މެމްބަރުން ތިބީ އެކަމާމެދުވެސް ހިތްހަމަނުޖެހިފައިކަމަށް ވަނީ މައުލޫމާތު ލިބިފައެވެ.
ރާއްޖެއެމްވީއަށް މައުލޫމާތު ދިން ފަރާތުން ބުނީ ޕާޓީގެ ލީޑަރޝިޕާއި މެމްބަރުންގެ މެދުގައި ވެސް މައްސަލަތައް ޖެހިފައިވާ ކަމަށެވެ. ހުކުރު ދުވަހު އިދިކޮޅުން ބޭއްވި މުޒާހަރާ ވެސް ނިމިގެން ދިޔައިރު އިދިކޮޅުން ބޭއްވީ އެޕާޓީން ބުނި ފަދަ "ބޮޑު މުޒާހަރާ" އެއް ނޫންކަން ވަނީ ފެނިގެން ގޮސްފައެވެ.
