ފުރަތަމަ ލެގުން ކުރި ހޯދާ މިޞްރު ވަރލްޑްކަޕް ޖާގައަކާ ގާތަށް ޖެހިލައިފި
ވަރލްޑްކަޕުން ފެންނާނީ ސަލާއާއި މާނޭގެ ތެރެއިން އެއް ކުޅުންތެރިއެއް
ަލަނޑަށްފަހު ސަލާހު އުފާފާޅުކުރަނީ
އެފްރިކާ ބައްރުގެ ވަރލްޑްކަޕް ޕްލޭއޮފް ފުރަތަމަ ލެގުގައި ސެނެގާލް ބަލިކޮށް, މިޞްރުން ވަރލްޑްކަޕްގެ ޖާގައަކާ ފިޔަވަޅަކަށް ގާތަށް ޖެހިލައިފިއެވެ.
ޕްލޭއޮފް ފުރަތަމަ ލެގުން މުޙައްމަދު ސަލާހުގެ މިޞްރު ކުރި ހޯދީ 1-0 ނެވެ. އެފްރިކާގެ ޗެމްޕިއަން ސެނެގާލް ކޮޅަށް ވަން ގޯލަކީ ބައިގޯލެކެވެ. ހަތަރުވަނަ މިނިޓްގައި ގޯލް ވަނީ ސަލާހު ފޮނުވާލި ބޯޅައެއް ދިފާއުކުރަން އުޅުމުގެ ތެރޭގައެވެ. މިޞްރުގައި ކުޅުނު ފުރަތަމަ ލެގުން, ލިވަޕޫލްގެ ފޯވާޑް ސަލާހުގެ ބޮޑު ހިއްސާއަކާއެކު ކުރި ހޯދުމުން, ކްލަބްގައި އޭނާގެ ޕާޓްނަރ މާނޭއަށް އޮތީ ދެވަނަ ލެގުން މޮޅުވުމެވެ. ދެވަނަ ލެގުގައި މިދެޓީމް ސެނެގާލްގެ ދަނޑުގައި ނިކުންނާނީ އަންނަ އަންގާރަ ދުވަހުއެވެ. މިއަހަރުގެ ނޮވެމްބަރ/ޑިސެމްބަރު މަހު ޤަތަރުގައި އޮންނަ ވަރލްޑްކަޕުން ޖާގަ ލިބޭނީ މީގެތެރެއިން އެއް ޓީމަކަށެވެ. އެހެންކަމުން ވަރލްޑްކަޕުން ފެންނާނީ ސަލާހު ނުވަތަ މާނޭގެ ތެރެއިން އެއް ކުޅުންތެރިއެކެވެ.
އެފްރިކަން ކަޕް އޮފް ނޭޝަންސް ސެނެގާލް އުފުލާލީ ފައިނަލްގައި މިޞްރު ބަލިކޮށްގެންނެވެ. ފައިނަލް މެޗު ސެނެގާލް ކާމިޔާބުކުރީ ޕެނަލްޓީގައި ކުރި ހޯދައިގެންނެވެ. އެކާމިޔާބީގައި މާނޭގެ އިތުރުން ޗެލްސީގެ ކީޕަރު މެންޑީގެ ދައުރު ބޮޑެވެ. ސެނެގާލްއަށް ދެވަނަ ލެގުން ކުރި ނުހޯދިއްޖެނަމަ މާނޭގެ އިތުރުން މެންޑީވެސް ވަރލްޑްކަޕުން ނުފެންނާނެއެވެ,
