ކުރެންދޫ ކައުންސިލް ރައީސް ހޮވުމާއި އިތުރު ބައި އިލެކްޝަންތަކެއްގެ ވޯޓުލުން ކުރިއަށް
މި އިންތިޚާބުތަކުގެ ވޯޓުލުން ހޮނިހިރު ދުވަހުގެ ހެނދުނު 8:00ގައި ވަނީ ފެށިފައި
ލޯކަލް ކައުންސިލް އިންތިޚާބުގެ ތެރޭގައި ނަގާފައިވާ މަންޒަރެއް
ޅ. ކުރެންދޫ ކައުންސިލްގެ ރައީސް އިންތިޚާބު ކުރުމަށާއި، ދެ ރަށެއްގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެމްބަރުން ހޮވުމަށް ބާއްވާ ބައި އިލެކްޝަންގެ ވޯޓުލުން ފެށިއްޖެއެވެ.
އިލެކްޝަންސް ކޮމިޝަން (އީސީ)ން މައުލޫމާތު ދޭ ގޮތުގައި މި އިންތިޚާބުތަކުގެ ވޯޓުލުން ހޮނިހިރު ދުވަހުގެ ހެނދުނު 8:00ގައި ވަނީ ފެށިފައެވެ. އެގޮތުން ފ. ނިލަންދޫ އަދި ދ. މީދޫ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެމްބަރަކު ހޮވުމަށް ބާއްވާ އިންތިޚާބުގެ އިތުރުން، ޅ. ކުރެންދޫ ކައުންސިލްގެ ރައީސް ހޮވުމަށް ބާއްވާ މި އިންތިޚާބުގައި އެ ރަށްރަށުގައި ބެހެއްޓިފައިވާ ވޯޓު ފޮށީގެ އިތުރުން، މާލޭގައިވެސް ވަނީ ވޯޓު ފޮއްޓެއް ބެހެއްޓިފައެވެ.
ކުރެންދޫގައި ބެހެއްޓިފައިވާ 1 ނަންބަރު ވޯޓު ފޮއްޓަށް ވޯޓު ލުމުގެ ހައްގު ލިބިފައިވަނީ 415 މީހުންނަށެވެ. ދެ ނަންބަރު ވޯޓު ފޮއްޓަށް ވޯޓުލުމުގެ ހައްގު 515 މީހުންނަށް ލިބިފައިވާއިރު، ނިލަންދޫގެ އެއް ނަންބަރު ވޯޓު ފޮއްޓަށް 531 މީހުންނަށް, އަދި ދެ ނަންބަރު ވޯޓު ފޮއްޓަށް 538 މީހުންނަށް ވޯޓު ލުމުގެ ހައްގު ލިބިގެންވެއެވެ.
އޭގެ އިތުރުން، މީދޫގައި ބެހެއްޓިފައިވާ 1 ނަންބަރު ވޯޓު ފޮއްޓަށް ވޯޓު ލުމުގެ ހައްގު 343 މީހުންނަށް ލިބިފައިވާއިރު, ދެ ނަންބަރު ވޯޓު ފޮއްޓަށް ވޯޓު ލުމުގެ ހައްގު ލިބިފައިވަނީ 318 މީހުންނަށެވެ.
މާލޭގައި ބެހެއްޓިފައިވާ ވޯޓު ފޮއްޓަށް ވޯޓު ލުމުގެ ހައްގު ލިބިފައިވަނީ 1383 މީހުންނަށެވެ.
މި އިންތިޚާބުތަކުގެ ވޯޓުލުން ކުރިއަށްދާނީ ހޮނިހިރު ދުވަހުގެ ހަވީރު 15:00އަށެވެ. އަދި ވޯޓު ގުނަން ފަށާނީ ވޯޓު ނަގައިނިމޭތާ 30 މިނެޓުގެ ހުސްވަގުތުކޮޅަކަށް ފަހުގައެވެ. މި އިންތިޚާބުތަކުގެ ރަސްމީ ނަތީޖާ އިއުލާން ކުރުމަށް ހަމަޖެހިފައިވަނީ މާރިޗު 28ވާ ހޯމަ ދުވަހުގައެވެ.
ކުރެންދޫގެ ކައުންސިލް ރައީސަކު ހޮވުމަށް ބައި އިލެކްޝަން ބާއްވަނީ އެ ކައުންސިލްގެ ރައީސަކަށް ކުރިން ހުރި އެމްޑީޕީގެ ކައުންސިލަރ އިބްރާހިމް ސިމާއު އެ މަގާމުން އިސްތިއުފާދެއްވުމާ ގުޅިގެންނެވެ.
އެމްޑީޕީން ވާދަކުރަނީ އަލީ ނަސީމް އެވެ. ޕީޕީއެމުން މި ދާއިރާއަށް ނެރެނީ ކުރިން ވެސް ކުރެންދޫ ކައުންސިލްގެ ރައީސްކަން ކުރެއްވި އިސްމާއީލް މަދީހުއެވެ.
