ވަޅުލާފައި ހުރި ޑްރަގް މައްސަލައިގައި ހައްޔަރުކުރީ ޕީއެންސީގެ ކައުންސިލް މެމްބަރެއް
މަސްތުވާތަކެތި ފެނުނީ ފުލުހުންގެ ޑްރަގް އެންފޯރސްމެންޓް އެންޑް ނާކޮޓިކްސް އިންޓެލިޖެންސުން ބުރާސްފަތި ދުވަހުން ފެށިގެން މާލޭގައި ކުރިއަށްގެންދާ އޮޕަރޭޝަނެއްގައި
ޑްރަގްގެ މައްސަލާގައި ހައްޔަރުކުރީ ޕީއެންސީގެ ކައުންސިލް މެމްބަރ އަހުމަދު ހުސައިން
މާފަންނުގައި ހުރި ގެއެއްގެ ތަޅުންގަނޑު ދަށުގައި ވަޅުލާފައި ހުރި 42 ކިލޯގެ މަސްތުވާތަކެތީގެ މައްސަލައިގެ ތުހުމަތުގައި އިދިކޮޅު ކޯލިޝަންގެ ޕީއެންސީގެ ކައުންސިލް މެންބަރަކު ހައްޔަރުކޮށްފިއެވެ.
އެނގިފައިވާ ގޮތުގައި މި މައްސަލައިގެ ތުހުމަތުގައި ހައްޔަރުކޮށްފައިވާ އިސް މީހަކީ ޕީއެންސީގެ ކައުންސިލް މެންބަރެއް ކަމަށްވާ އަހުމަދު ހުސައިނެވެ. އޭނާ ވަނީ ނިމިދިޔަ ރައްޔިތުންގެ މަޖިލިސް އިންތިޚާބުގައި ޕީއެންސީގެ ޓިކެޓުގައި އަލިފުށީ ދާއިރާއަށް ވާދަކޮށްފައެވެ.
ޕޮލިސް ކޮމިޝަނަރު މުހައްމަދު ހަމީދު ހުކުރު ދުވަހު ހެނދުނު ކުރެއްވި ޓުވީޓެއްގައި ވިދާޅުވީ، މަސްތުވާތަކެތި ފެނުނީ ފުލުހުންގެ ޑްރަގް އެންފޯސްމެންޓް އެންޑް ނާކޮޓިކްސް އިންޓެލިޖެންސުން ބުރާސްފަތި ދުވަހުން ފެށިގެން މާލޭގައި ކުރިއަށްގެންދާ އޮޕަރޭޝަނެއްގައި ކަމަށެވެ. އޮޕަރޭޝަނުގައި ފެނިފައި ވަނީ ގާތްގަނޑަކަށް 42 ކިލޯގެ ހެރޮއިނެވެ.
ސީޕީ ހަމީދު ހުކުރު ދުވަހުގެ ރޭ ކުރެއްވި އިތުރު ޓްވީޓެއްގައި ވިދާޅުވީ, މި މައްސަލާގައި ތުހުމަތުކުރެވޭ އިސް މީހާ މިހާރު ހައްޔަރުކުރެވިފައިވާ ކަމަށެވެ. މި މައްސަލާގައި އޭނާއާއެކު އިތުރު މީހަކު ވެސް ވަނީ ހައްޔަރުކޮށްފައެވެ.
މީގެ ކުރިން ވެސް ގިނަ އަދަދެއްގެ މަސްތުވާތަކެއްޗާއެކު ޕީއެންސީގެ ކައުންސިލް މެންބަރަކު ހައްޔަރުކޮށްފައިވެއެވެ. 2020 ވަނަ އަހަރުގެ އޮކްޓޯބަރު މަހުގެ ތެރޭގައި 130 ކިލޯއާއެކު ހައްޔަރުކޮށްފައިވަނީ އެ ޕާޓީގެ މެންބަރެއް ކަމަށްވާ ޝަހީބް އިބްރާހީމެވެ. މައްސަލަ ފެންމަތިވުމާއެކު އެ ޕާޓީން ވަނީ އޭނާ ސަސްޕެންޑުކޮށްފައެވެ.
ގެއެއްގެ ތަޅުންގަނޑު ދަށުގައި ރައްކާކޮށްފައި ހުރި ގިނަ އަދަދެއްގެ މަސްތުވާތަކެތި އަތުލައިގެންފައިވާއިރު، މިހާރު ފުލުހުން ގެންދަނީ މާލެސިޓީގެ އިތުރުން އަތޮޅުތެރޭގައި އޮޕަރޭޝަންތައް ހިންގަމުންނެވެ.
އެގޮތުން މާޗް މަހުގެ 20 ވަނަ ދުވަހު ވެސް މޯލްޑިވްސް ކަސްޓަމްސް ސަރވިސްއިން ދިން މައުލޫމާތަކާ ގުޅިގެން ހިންގި އޮޕަރޭޝަނުގައި 17 ކިލޯގެ މަސްތުވާތަކެތި ހޯދައި ފުލުހުންގެ ބެލުމުގެ ދަށަށް ގެންގޮސްފައިވެއެވެ. މި ކޭހާގުޅިގެންވެސް ހަތަރު މީހަކު ހައްޔަރުކޮށްފައިވެއެވެ.
