ކޮވިޑް-19އާއި ގުޅިގެން ދިމާވި ގޮންޖެހުންތަކާއެކު ކާމިޔާބު މަސައްކަތްތަކެއް ކުރެވިފައިވޭ: ކޮމިޝަނަރ އޮފް ޕްރިޒަންސް
25 މާރިޗު 2022 | ހުކުރު 07:45ސިއްހީ ފަރުވާ ގައިދީންނަށް ހަމަޖައްސައި ދެވުނު
އެކްސެލިންގ ބިޔޯންޑް އެމާރޖިންގ ޗެލެންޖާރސް – ކަރެކްޝަންސް އާފްޓަރ ގްލޯބަލް ޕެންޑެމިކްގެ ނަމުގައި ހިންގި ޓްރޭނިންގ ޕްރޮގްރާމްގެ ނިމުމުގެ ރަސްމިއްޔާތުގެ ތެރެއިން
ޖަލުތަކެއް ހިންގުމަކީ ވަރަށް ބުރަ މަސައްކަތެއް ކަމަށާއި، ކޮވިޑް-19އާއި ގުޅިގެން ދިމާވި ގޮންޖެހުންތަކާއެކު ކާމިޔާބު މަސައްކަތްތަކެއް ކުރެވިފައިވާ ކަމަށް ކޮމިޝަނަރ އޮފް ޕްރިޒަންސް އަހުމަދު މުޙައްމަދުފުޅު ވިދާޅުވެއްޖެއެވެ.
ކޮމިޝަނަރު މިހެން ވިދާޅުވީ ޔުނައިޓެޑް ނޭޝަންސް އޮފިސް އޮން ޑްރަގްސް އެންޑް ކްރައިމް (ޔޫއެންއޯޑީސީ)ގެ ގްލޯބަލް މެރިޓައިމް ކްރައިމް ޕްރޮގްރާމް (ޖީއެމްސީޕީ) އިން ސްރީލަންކާގެ ޕްރިޒަން އޮފިސަރުންނަށާއި މޯލްޑިވްސް ކަރެކްޝަނަލް ސަރވިސްގެ ޕްރިޒަން އޮފިސަރުންނަށް އެކްސެލިންގ ބިޔޯންޑް އެމާރޖިންގ ޗެލެންޖާރސް – ކަރެކްޝަންސް އާފްޓަރ ގްލޯބަލް ޕެންޑެމިކްގެ ނަމުގައި ހިންގި ޓްރޭނިންގ ޕްރޮގްރާމްގެ ނިމުމުގެ ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ.
ކޮމިޝަނަރު ވިދާޅުވީ ޖަލުތަކެއް ހިންގުމަކީ ވަރަށް ބުރަ މަސައްކަތެއް ކަމަށާއި، ކޮވިޑް-19އާއި ގުޅިގެން ވެސް ގިނަ ގޮންޖެހުންތަކާއި ކުރިމަތިލާން ޖެހުނު ކަމަށެވެ. ނަމަވެސް ހުރިހާ އިންތިޒާމެއް ވެސް ވަރަށް ފުރިހަމައަށް ހަމަޖެހިގެންދިޔަ ކަމަށް ކޮމިޝަނަރު ވިދާޅުވިއެވެ.
ކޮމިޝަނަރު ވިދާޅުވީ އެފަދަ ހާލަތުގައި ގައިދީންނާއި ބަންދު މީހުންނަށް ލިބެންވާ އަސާސީ އަދި އިންސާނީ ހައްގުތައް ޒަމާނީ ވަޞީލަތްތައް ބޭނުންކޮށްގެން މެދުނުކެނޑި ފޯރުކޮށްދެވުނު ކަމުގައެވެ. އެގޮތުން ވީޑީއޯ ކޯލް، ސްޕެޝަލިސްޓް ޑޮކްޓަރުންނަށް ޓެލެކޮންސަލްޓޭޝަން، އޮންލައިންކޮށް ޝަރީޢަތުގައި ބައިވެރިވުން، އޮންލައިންކޮށް ފައިސާ ފޮނުވުން ފަދަ ހައްލުތައް ހޯދުނު ކަމަށެވެ. މި ޒަމާނީ ހައްލުތަކުގެ ސަބަބުން ގައިދީންނާއި ބަންދުމީހުން އެއްތަނުން އަނެއްތަނަށް އުފުލުމުގައި ހިނގާ ޚަރަދުތަކާއި ދިމާވާ ދަތިތަކަށް ހައްލެއް ހޯދުނުކަމަށް ކޮމިޝަނަރު ފާހަގަކުރެއްވިއެވެ. އަދި ޕްރިޒަން އޮފިސަރުންވެސް ޖަލުގައި ބަންދުވެ ތިބެގެން ކުރި އަގުހުރި ޚިދުމަތުގެ އަގު ވަޒަންކޮށް، އެ ފަރާތްތަކަށް ޝުކުރު އަދާކުރެއްވިއެވެ.
05 ދުވަހަށް ކުރިއަށް ގެންދިޔަ މި ޓްރޭނިންގ ޕްރޮގްރާމަށް އިޝާރަތް ކުރައްވައި ކޮމިޝަނަރު ވިދާޅުވީ މި ޓްރޭނިންގގެ ސަބަބުން އަވައްޓެރި ސްރީލަންކާގައި ކޮވިޑް-19 ޕެންޑެމިކްގެ ޙާލަތާއި އެގައުމުގެ ޕްރިޒަން އޮފިސަރުންގެ ތަޖުރިބާތައް އެމްސީއެސްގެ އޮފިސަރުންނާއި ޚިއްސާކޮށް، ދެފަރާތުންވެސް ކަންތައްތައް ދަސްކުރުމުގެ ފުރުސަތު ލިބުނު ކަމަށެވެ. މީގެއިތުރުން މި ޓްރޭނިންގއަކީ މީގެ ފެށުންކަމަށާއި، އިތުރު ގައުމުތަކާއި ގުޅިގެން މިފަދަ ޓްރޭނިންގ ޕްރޮގްރާމްތައް މުސްތަގުބަލްގައި ކުރިއަށް ގެންދަވާނެކަމަށް ކޮމިޝަނަރު ވިދާޅުވިއެވެ.
ޔޫއެންއޯޑީސީގެ ފަރާތުން އެސޯސިއޭޓް ކްރައިމް ޕްރިވެންޝަން އެންޑް ކްރިމިނަލް ޖަސްޓިސް އޮފިސަރ މރ. ޖޯޝުއާ އާޓޭޓާ ގޮންޒާލީޒް ވިދާޅުވީ މިފަދަ ޓްރޭނިންގ ޕްރޮގްރާމެއް ލަންކާ އާއި ރާއްޖޭގެ ޕްރިޒަން އޮފިސަރުންނަށް ކުރިއަށް ގެންދިއުމަކީ ގުޅުން ބަދަހިކުރުމަށް ލިބޭ އިތުރު ބާރެއް ކަމަށެވެ. އެމްސީއެސްއަށާއި ލަންކާގެ ޑިޕާރޓްމަންޓް އޮފް ޕްރިޒަންސްއަށް ޝުކުރު އަދާކުރައްވަމުން ވިދާޅުވީ ޖަލު ހިންގުމުގެ ނިޒާމު ކުރިއެރުވުމަށް މުސްތަގުބަލްގައި ވެސް އެހީތެރިކަން ފޯރުކޮށްދޭނެ ކަމަށެވެ.
މާފުށީގައި ކުރިއަށް ގެންދިޔަ މި ރަސްމިއްޔާތުގައި ބައިވެރިންނަށް ޓްރެއިނިންގ ފުރިހަމަ ކުރިކަމުގެ ލިޔުން ހަވާލުކޮށްފައިވެއެވެ.
މި ޓްރޭނިންގ ޕްރޮގްރާމް ހިންގުމުގެ ބޭނުމަކީ ޕްރިޒަން އޮފިސަރުން ތަމްރީން އަދި ތަރައްގީކޮށް ޔޫއެންގެ މިނިމަމް ސްޓޭންޑަޑް ފޯ ދަ ޓްރީޓްމަންޓް އޮފް ޕްރިޒަނަސް – ދަ ނެލްސަން މަންޑޭލާ ރޫލްސް އަށް އަހުލުވެރިކޮށް، ކޮވިޑް-19 ފަދަ ބަލިތައް ފެތުރުމުގެ ސަބަބުން ދިމާވެދާނެ މައްސަލަތަކާއި ގޮންޖެހުންތަކަށް ތައްޔާރުވެ، އެކަންކަން ހައްލުކުރާނެ އުކުޅުތައް ދަސްކޮށްދިނުމެވެ. އެގޮތުން މި ޓްރޭނިންގ ޕްރޮގްރާމްގައި ސްރީލަންކާގެ 09 ޕްރިޒަން އޮފިސަރުންނާއި ރާއްޖޭގެ 08 ޕްރިޒަން އޮފިސަރުން ބައިވެރިވެފައިވެއެވެ.
