މިޒަމާނުގެ ޓެކްނޮލޮޖީ އާއި ވަސީލަތްތައް ބޭނުންކޮށްގެން މަސްވެރިކަމަށް އިންގިލާބީ ބަދަލެއް ގެންނަން ޖެހޭ - މެމްބަރު ޝަރީފް
25 މާރިޗު 2022 | ހުކުރު 02:18ފިލިޕީންސް އަދި ސްޕެއިން ފަދަ ޤައުމުތަކަކީ މިހާރު މާ ގިނަ މަސް ބާނާ ޤައުމުތައް
މަސް ބާނާ ގޮތަށް ބަދަލު ގެނެސްގެން ނޫނީ މަހަށް ހަމަ އަގު ލިބުން ދަތިކަމަށް މެމްބަރު ޝަރީފް ވިދާޅުވި
މި ޒަމާނުގެ ޓެކްނޮލޮޖީއާއި ވަސީލަތްތައް ބޭނުންކޮށްގެން މަސްވެރިކަމަށް އިންގިލާބީ ބަދަލެއްގެންނަން ޖެހޭ ކަމަށް މަރަދޫ ދާއިރާގެ މެމްބަރު އިބްރާހިމް ޝަރީފު ވިދާޅުވެއްޖެއެވެ.
މަސްވެރިންނަށް ހަމަ އަގު ހޯދައިދިނުމާއި ގުޅޭ ގޮތުން ރައްޔިތުންގެ މަޖިލީހުގެ ބުދަ ދުވަހުގެ ޖަލްސާގައި ވާހަކަފުޅު ދައްކަވަމުން ޝަރީފު ވިދާޅުވީ، މަހަށް ހެޔޮ އަގު ލިބުން ނުވަތަ ހަމައަގު ލިބުން މިއީ އަބަދުވެސް މިހާރަކަށްއައިސް ކުރެވެމުންދާ ބަހުސެއް ކަމަށެވެ. ރާއްޖޭގެ މަހަށް ހަމައަގު ހޯދަން ބޭނުންނަމަ، މަސް ރައްކާކޮށްގެން، މަސް ދަމަހައްޓައިގެން، މަހުގެ އަގު ހޯދުމަށް ފުރުސަތު އޮތް ކަމަށް ޝަރީފު ވިދާޅުވިއެވެ.
ދެމެހެއްޓޭނެ ގޮތަކަށް ނޫން މެނުވީ މަހުގެ އަގު ކަނޑައަޅައިގެން އުޅުމަކީ ސަރުކާރަށް އޮބިއޮންނާނެ ވަރު ކަމެއް ނޫން ކަމަށާއި، ޚަރަދު ކުޑަކޮށް މަސް ބޭނޭނީ މި ޒަމާނުގެ ޓެކްނޮލޮޖީއާއި ވަސީލަތްތައް ބޭނުންކޮށްގެން މަސްވެރިކަމަށް އިންގިލާބީ ބަދަލެއް ގެނެސްގެން ކަމުގައި ޝަރީފު ވިދާޅުވިއެވެ. ޝަރީފު ވިދާޅުވީ، ހަމައެކަނި ޕޯލް އެންޑް ލައިނުން ބާނާ މަހަކުން އެކަށީގެންވާ އަގެއް މަހަށް ނުލިބޭނެ ކަމަށެވެ.
މަހަކީ ސީޒަނަލް އެއްޗަކަށް ވާތީ، ލޯ ސީޒަނުގައި މަހުގެ އަގު މައްޗަށް ދާނެ ކަމަށާއި، އެ ހިސާބަށް މަސް ރައްކާތެރިކުރެވޭނެ ޚަރަދު ކުޑަ ގޮތްތައް ހޯދައިގެން ނޫނީ، ހޯދަން އުޅޭ ހަމަ އަގު ހޯދުމަކީ ވެސް އަދި އެ އަގު ފޯރުކޮށްދިނުމަކީ ވެސް ސަރުކާރަށް ކުރެވޭނެ ކަމެއް ނޫން ކަމަށް މެމްބަރު ޝަރީފް ވިދާޅުވިއެވެ.
މިހާ ގިނަ ދުވަހު މަސްވެރި ޤައުމެއްގެ ގޮތުގައި އޮތް ނަމަވެސް މި ހުރިހާ ކަމަކަށް ކުރަންޖެހޭ އިންވެސްޓްމަންޓް އަދިވެސް ވަރަށް ބޮޑު ކަމަށް ޝަރީފް ވިދާޅުވިއެވެ.
އިންޑިއާގެ ޚަރަދުގައި ހުވަދޫ އަތޮޅުގައި މިހާރު ހުރި ފެކްޓަރީގެ ސްޓޯރޭޖު ކެޕޭސިޓީ އިތުރުކުރުމަށް މަސައްކަތް ކުރިއަށްދާއިރު އެފަދަ ސްޓޯރޭޖު ކެޕޭސިޓީތައް އިތުރުކުރެވި މަސް ބަންދުކުރެވޭނެ ގޮތް ވެގެން ނޫނީ މާކެޓް މައްޗަށް ދާ ވަގުތު ހަމަ އަގު ނުލިބޭނެ ކަމަށް ޝަރީފް ވިދާޅުވިއެވެ. ޝަރީފް ވިދާޅުވީ، ފެލިވަރު ޕްލާންޓުގައި ވެސް އިތުރު އިންވެސްޓުކޮށް މި ޒަމާނުގެ ޓެކްނޮލޮޖީ ބޭނުންކޮށްގެން މަސް ބަންދު ކުރުމުގެ މަސައްކަތް ނުކުރާނަމަ ފައިދާއެއް ނުކުރާނެ ކަމަށެވެ.
ފިލިޕީންސް އަދި ސްޕެއިން ފަދަ ޤައުމުތަކަކީ މިހާރު މާގިނަ މަސް ބާނާ ޤައުމުތައް ކަމަށާއި ކުރީގައި ހިކިމަސް ރާއްޖެއިން އެތެރެކުރާ ސްރީލަންކާއަކީ، އެއްގޮތަކަށްވެސް މަސް ނުބާނާ ޤައުމެއް ކަމަށް ޝަރީފް ވިދާޅުވިއެވެ. އެހެންނަމަވެސް ސްރީލަންކާއިން ވެސް މިދިޔަ އަހަރު ބޭނި މަސް ދިވެހިރާއްޖެއަށް ވުރެ 15000 ޓަނު އިތުރުކަމަށް ޝަރީފް ވިދާޅުވިއެވެ. އެހެންކަމުން ދުނިޔޭގެ މާކެޓަށް އަންނަ ބަދަލު ދިރާސާކޮށް މަސް ރައްކާތެރިކަމާއެކު ބެލެހެއްޓޭނެ އިންތިޒާމުތައް ހަމަޖައްސަން ޖެހޭ ކަމަށް މެމްބަރު ޝަރީފް ވިދާޅުވިއެވެ.
