ސިޔާސީ ޕާޓީތަކުން އިންތިޒާމުކޮށްގެން ބާއްވާ ބައްދަލުވުންތަކާއި ސިޔާސީ ހަރަކާތްތައް ގާނޫނާއި ގަވާއިދުގެ ހުދޫދުގެ ތެރޭގައި ރާއްޖޭގެ ދާޚިލީ ހަމަޖެހުމާއި ދައުލަތުގެ ޚާރިޖީ ސިޔާސަތުތަކާއި ޚާރިޖީ ގުޅުންތަކަށް އިހުތިރާމްކުރުމާއެކު ކުރިޔަށްގެންދިޔުމަށް އިލެކްޝަންސް ކޮމިޝަން (އީސީ)ން ޕާޓީތަކަށް އިލްތިމާސްކޮށްފިއެވެ.

ސިޔާސީ ޕާޓީތަކުގެ ބެލެނިވެރި ފަރާތުގެ ހައިސިއްޔަތުން އީސީން ނެރެފައިވާ ނޫސްބަޔާނުގައި ވަނީ ދައުލަތުގެ ރަސްމީ އިދާރާތަކުން އަންގާ އެންގުންތަކަށް ބޯލެނބުމަށް ސިޔާސީ ޕާޓީތަކަށް އިލްތިމާސްކޮށްފައެވެ. އީސީން ބުނެފައިވަނީ ސިޔާސީ ޕާޓީތަކުގެ ގާނޫނުން ޕާޓީތަކަށް ސިޔާސީ ހަރަކާތްތައް ހިންގުމުގެ މަގު ފަހިކޮށްދީފައިވަނީ ގާނޫނު އަސާސީ އާއި ސިޔާސީ ޕާޓީގެ ގާނޫނާއި ގަވާއިދާއި ރާއްޖޭގައި އަމަލުކުރަމުންދާ ކަމާބެހޭ އެހެނިހެން ގާނޫނުތަކާއި ގަވާއިދުތަކުގެ ހުދޫދުގެ ތެރޭގައި ކަމަށެވެ. އީސީން ބުނީ ގާނޫނުތަކާއި ގަވާއިދުތަކުގެ ހުދޫދުގެ ތެރެއިން ކުރިޔަށްގެންދާ ސިޔާސީ ހަރަކާތްތަކަށް އަބަދުވެސް ކޮމިޝަނުން ފުރިހަމަ އެއްބާރުލުންދޭނެކަމަށެވެ.

އިލެކްޝަންސް ކޮމިޝަނުން ނޫސްބަޔާން ނެރެފައިމިވަނީ އިދިކޮޅު ކޯލިޝަނުން ހުކުރު ދުވަހު ނޭވާހޮޅިއަށް މި ނަމުގައި މާލޭގައި މުޒާހަރާކުރަން ތައްޔާރުވަމުން އަންނަނިކޮށެވެ. "ނޭވާހޮޅިއަށް" މިނަމުގައި އިދިކޮޅު ކޯލިޝަނުން ހިންގުމަށް ރާވާފައިވާ ހަރަކާތުގައި ކުށްކުރާ ގްރޫޕްތައް ބައިވެރިކުރާނެ ކަމުގެ މައުލޫމާތު ލިބިފައިވާ ކަމަށާއި، އެހެންކަމުން އެ އެއްވުން ކުރިއަށް ނުގެންދިޔުމަށް ފުލުހުން ވަނީ އަންގާފައެވެ. ބުދަ ދުވަހު ނެރުނު ނޫސްބަޔާނުގައި ފުލުހުން ބުނީ ގާނޫނު އަސާސީގެ 32 ވަނަ މާއްދާއިން ލިބިދޭ ސުލްޙަވެރިކަމާއެކު އެއްވެ އުޅުމުގެ މިނިވަންކަމުގެ ހައްގު ބޭނުންކުރުމުގެ ހަމަތައް، ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ގާނޫނުގައި ބަޔާންކޮށްފައިވާ ކަމަށެވެ.

ފުލުހުން ބުނީ 25 މާރޗް 2022 ވާ ހުކުރު ދުވަހު ހަވީރު 4:00ން ފެށިގެން އިރުއޮއްސި 6:00ށް، މާލޭގެ މަގުތަކާއި، ޕާޓީ އޮފީސް ސަރަހައްދާއި، ކާނިވާ ސަރަހައްދާއި، ރަސްފަންނު ސަރަހައްދާއި، ބޮޑުތަކުރުފާނު މަގާއި، މާލޭ ދެކުނުފަރާތު އުސްފަސްގަނޑު ސަރަހައްދުގައި ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އިން ބޭއްވުމަށް ރާވާފައިވާ އެއްވުމަކީ ސުލްހަވެރިކަމާއެކު އެއްވެއުޅުމުގެ މިނިވަންކަމުގެ ގާނޫނާއި އެއްގޮތަށް ބާއްވާ އެއްވުމެއް ނޫންކަމަށް ބެލެވޭ ތަފާތު ސަބަބުތައް ފެންނަން ހުރުމާއި، މިފަދަ އެއްވުމުގެ އާންމު ސަލާމަތާއި ރައްކާތެރިކަމަށް ބުރޫ އެރުމުގެ ފުރުސަތު ބޮޑުވެފައިވާތީ، މިއެއްވުން ނުބޭއްވުމަށް އެޕާޓީއަށް އަންގާފައިވާ ކަމަށެވެ.

ފުލުހުން ބުނީ އެއްވުމުގައި ބައިވެރިވުމަށް ރަށްރަށުން މީހުން ގެންނަގޮތަށް ހަމަޖެހިފައިވާ ކަމަށް މައުލޫމާތު ލިބިފައިވާ ކަމަށެވެ. އަދި ގިނަ އަދަދެއްގެ ދުއްވާ އެއްޗެހި މާލޭގެ ބޮޑެތި މަގުތައް ބްލޮކްކޮށް ރައްޔިތުންނާއި އާންމު ދަތުރުފަތުރާއި ކަންތައްތައް ރޭވުމާއި، މާލޭގައި އުޅޭ ކުށްކުރާ ގްރޫޕްތައް ހޯދައި އެއްވުމުގައި ބައިވެރިކުރުމަށާއި އެއްވުމުގެ ސަލާމަތީ ކަންކަން ބެލެހެއްޓުމަށް ދަތިކުރުމުގެ ގޮތުން އެއްވަގުތެއްގައި އެކި ސަރަހައްދުތަކަށް ބައިބަޔަށް މީހުން ނުކުތުމަށް އެއްވުން އިންތިޒާމް ކުރާ ފަރާތުން ރާވަމުންދާ ކަމަށެވެ.

މި އެއްވުމަކީ ސުލްހަވެރިކަމާއެކު މިނިވަންކަމުގެ ގާނޫނާއި އެއްގޮތަށް ބާއްވާ އެއްވުމަކަށް ނުވާތީ މިއެއްވުމުގައި އެއްވެސް ފަރާތަކުން ބައިވެރި ނުވުމަށް ފުލުހުން ވަނީ އިލްތިމާސްކޮށްފައެވެ. އަދި ގާނޫނާއި ޚިލާފަށް އެއްވުން ބޭއްވުމަށް ފުރުސަތު ނުދޭނެ ކަމަށާއި، މިއެއްވުމުގައި ބައިވެރިވެ ގާނޫނާއި ޚިލާފު އަމަލުތަކަށް މަގުފަހިކުރުވާކަމަށް ތުހުމަތުކުރެވޭ އެއްގަމު އުޅަނދާއި ކަނޑު އުޅަނދު ބަލައި ފާސްކުރާނެ ކަމަށާއި އަދި މިފަދަ އެއްވުމެއް ބާއްވައިފިނަމަ އެއްވުން ރޫޅާލާ ގާނޫނާއި ޚިލާފުވާ ފަރާތްތަކާމެދު ގާނޫނީ އިމުގެ ތެރެއިން އަޅަންޖެހޭ ފިޔަވަޅުތައް އަޅާނެ ކަމަށް ވެސް ފުލުހުން ބުނެއެވެ.

މީގެ އިތުރުން ފުލުހުން ބުނީ ގާނޫނާއި ސުލްހަވެރިކަމާއެކު ބާއްވާ އެއްވުންތަކަށް ފޯރުކޮށްދޭންޖެހޭ ސަލާމަތާއި ރައްކާތެރިކަން ފޯރުކޮށްދޭނެކަމަށާއި އަދި އެފަދަ އެއްވުންތައް އޮންނަ ސަރަހައްދެއްގެ މަގުތަކާއި އެނޫންވެސް ތަންތަނުގެ ސަލާމަތީ ކަންކަމުގެ އިންތިޒާމް ހަމަޖައްސައިދޭނެ ކަމަށެވެ.

ފުލުހުންގެ ބަޔާނާއި ގުޅިގެން  ޕްރޮގްރެސިވް ކޮންގްރެސް ކޯލިޝަންގެ ވަގުތީ ލީޑަރު އަބްދުއްރަޙީމް އަބްދުﷲ (އަދުރޭ) ވަނީ ނޭވާހޮޅިއަށް މި ނަމުގައި އިދިކޮޅު ކޯލިޝަނުން ހިންގުމަށް ރާވާފައިވާ އެއްވުން އޮންނާނެ ކަމަށް ވިދާޅުވެފައެވެ. އިދިކޮޅު ކޯލިޝަނުން ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އަދުރޭ ވަނީ މި ހަރަކާތަކީ ރައްޔިތުންގެ ވަރަށް ބޮޑު ތާއީދެއް އޮތް ހަރަކާތެއްކަން ސަރުކާރަށާއި އިދާރާތަކަށް އެނގޭތީ، ސަރުކާރުން ހަރަކާތް ހުއްޓުވުމަށް މަސައްކަތް ކުރާ ކަމަށް ތުހުމަތު ކުރައްވާފައެވެ.